Last updated on July 13th, 2026 at 12:23 pm
ಕುಡ್ಲ, ಜು. 13: ಕರಿನ ಸನಿಯಾರ ಪೊರ್ತು ಕನ್ತ್ದ್, ತಿಂಗೊಲು ದೇಬೆರ್ ಬಾನ ಏರೊಂದು ಬರ್ಪುನ ಪೊರ್ತುಡೊಂಜಿ ಬೆಸರ್ದ ಸಂಗತಿ ಪಾಕ ಜನೊಕ್ಲೆನ್ ಎತ್ತ್ದಿತ್ತ್ಂಡ್. 17 ಭಾಷೆಲೆಡ್ ಸುಮಾರ್ 48,000 ರ್ದ್ ಜಾಸ್ತಿ ಪದ ಪನ್ತಿನ ಲೆಜೆಂಡರಿ ಗಾಯಕಿ ಜಾನಕಿಅಮ್ಮ ಪನ್ದೇ ಪುದರಾದಿತ್ತಿನ ಕುಯಿಲ್ ಎಸ್. ಜಾನಕಿ ಮೇರ್ ತೀರ್ಯೆರ್ ಪನ್ಪಿ ಸುದ್ದಿ.
ತುಳುವೆರೆಗ್ ಎಸ್. ಜಾನಕಿ ಪನ್ನಗ ಸುರುಕು ನೆನೆಪಾಪುನವು ಪ್ರೊ. ಬಿ. ಎ. ವಿವೇಕ ರೈಕುಲು ಬರೆತಿನ ಎವರ್ಗ್ರೀನ್ ತುಳು ಹಿಟ್ “ಎಕ್ಕಸಕ ಎಕ್ಕಸಕ ಎಕ್ಕಸಕ್ಕಲಾ… ಅಕ್ಕ ಪನ್ಡ್ದ್ ಲೆಪ್ಪುನಕುಲು ಬತ್ತೆರಿತ್ತೆಲಾ…”. ಸಾಹಿತ್ಯೊಡು ತನ್ನನೇ ಆಯಿನ ಪೊರ್ಲು ಇತ್ತಿನ ಈ ಪದೊಕು ಜೂವ ಕೊರ್ದು ನನಲಾತ್ ಪೊರ್ಲು ಎಚ್ಚಾಯಿನಾರ್ ಎಸ್. ಜಾನಕಿ ಅಮ್ಮ. ಅಂಚ ಪನ್ದ್ ಆರ್ ತುಳುಟು ಪನ್ತಿನಿ ಉಂದು ಒಂಜೇ ಪದೊನಾ??
ಅತ್ತ್, ಉಂದು ಒಂಜೇ ಅತ್ತ್. ಉಂದೆಕ್ ದುಂಬುಲಾ, ಉಂದೆರ್ದ್ ಬೊಕ್ಕಲಾ ಆರ್ ಒಂಜಾತ್ ತುಳು ಪಿಚ್ಚರ್ಲೆನ ಪದೊಕು ಸೊರ ಕೊರ್ತೆರ್. ಅವೆಟ್ ‘ಡಿಂಗಿರಿ ಮಾಮ ಡಿಂಗಿರಿ ಮಾಮ’
‘ಅಪ್ಪೆ ಮನಸ್ ಬಂಗಾರ’
‘ಯೌನವದಾನೆ ಸುಂದರಿ ಯಾನ್’
‘ಯಮುನಾ ತುದೆ ನಲಿಪುನ ಜಾಗೊಡು’
‘ಮೊಲ್ನ ತೆಲಿಕೆಗ್ ಅರಲು ಮಲ್ಲಿಗೆ’
‘ಚಳಿಚಳಿ ಚಳಿಚಳಿ.. ಇಂಪುತಂಪು ಜಾಗೆ ಉಂದು ಸ್ವರ್ಗಯಾ’
‘ನೀರ್ಡೆ ನೀಲ ಬಾನೊದ ಬಿಂಬೊ’ ಪದೊಕುಲು ನಮಕ್ ಇತ್ತೆಲಾ ಯೂಟ್ಯೂಬ್ ಕೇನರೆ ತಿಕ್ಕುಂಡು.
ಆರ್ ಪನ್ತಿನ ಮಾತಾ ತುಳುಪದೊಕುಲೆನ ಪಟ್ಟಿ ಎಂಕ್ಲೆಗ್ ತಿಕ್ಕ್ಜಿಂಡಲಾ, ಆರ್ ಸೊರ ಕೊರ್ತಿನ ಪಿಚ್ಚರ್ಲೆನ ಪಟ್ಟಿ ನಾಡ್ದ. ನಿಕಲೆಗ್ ಒವ್ಲಾ ಆರ್ ಪನ್ತಿನ ತುಳು ಪದ ತೆರಿದ್ ಇತ್ತ್ಂಡ ಕಮೆಂಟ್ ಮಲ್ತ್ ತೆರಿಪಾಲೆ.
1. ದಾರೆದ ಬುಡೆದಿ 1971
2. ಪಗೆತ ಪುಗೆ 1972
3. ಬೀಸತ್ತಿ ಬಾಬು 1972
4. ಉಡಲ್ದ ತುಡರ್ 1973
5. ಕೋಟಿ ಚೆನ್ನಯ 1973
6. ಯಾನ್ ಸನ್ಯಾಸಿ ಆಪೆ 1973
7. ಬಯ್ಯ ಮಲ್ಲಿಗೆ 1974
8. ಬೊಳ್ಳಿದೋಟ 1977
9. ಕರಿಯಣಿ ಕಟ್ಟಂದಿ ಕಂಡನೆ 1978
10. ಕಾಲ 1997