Last updated on July 15th, 2026 at 02:16 pm
ಕುಡ್ಲ, ಜು. 15: ಕಡಲ್ ಸ್ಟುಡಿಯೋಸ್ ಬೊಕ್ಕ ಮಾಯಿಲು ಫಿಲ್ಮ್ಸ್ ಸಂಸ್ಥೆಲು ‘ಸಂದೇಶ ಫೌಂಡೇಶನ್ ಫಾರ್ ಕಲ್ಚರ್ ಆಂಡ್ ಎಜುಕೇಶನ್ (ರಿ.)’ ಒಟ್ಟುಸೇರಿಗೆಡ್ ವಿಶೇಷ ಸಾಂಸ್ಕೃತಿಕ ಕಾರ್ಯಕ್ರಮ ಒಂಜೆತ ಅಟ್ಟನೆ ಮಲ್ತ್ದೆರ್. ಬರ್ಪಿ ಜುಲೈ 19, 2026ನೇ ಐತಾರದಾನಿ ನಂತೂರ್ದ ಸಂದೇಶ ಫೌಂಡೇಶನ್ ಸಭಾಂಗಣೊಡು ಈ ಲೇಸ್ ನಡಪರೆ ಉಂಡು. ತುಳುನಾಡ್ದ ವಿಶಿಷ್ಟ ಸಂಸ್ಕೃತಿ ಬೊಕ್ಕ ಕಲಾ ಪ್ರಕಾರೊಲೆನ ಪೊಲಬು ಪಟ್ಟೆರ ಈ ಅಪರೂಪೊದ ಸಮಾರಂಭೊದ ಅಟ್ಟನೆ ಮಲ್ತಿತ್ತ್ದ್, ಸಾರ್ವಜನಿಕೆರೆಗ್ ಲೆಪ್ಪು ಕೊರ್ತೆರ್.
ಈ ಲೇಸ್ ಐತಾರ ಕಾಂಡೆ 9:30ಕ್ಕ್ “ಕುದ್ಕ ಬಚ್ಚಿರೆ” ಪನ್ಪಿ ತುಲು ಎಲ್ಯ ಕತೆಕುಲೆನ ಮಸ್ತಿರೆ ಬುಡುಗಡೆ ಬೊಕ್ಕ ಬಹುಮಾನ ಪಟ್ಟುನೆತ ಒಟ್ಟುಗು ಸುರು ಆವರೆ ಉಂಡು. ಬೊಕ್ಕ ಕಾಂಡೆ 10:00 ಗಂಟೆಗ್ “ಕಂಗುಲು-ಕರ್ಂಗೋಲು” (ಒಂಜಿ ಒಸರ್ದ ರಡ್ಡ್ ದಂಡ್ಲು) ಪನ್ಪಿ ವಿಶಿಷ್ಟ ಡಾಕ್ಯುಮೆಂಟರಿ ಚಿತ್ರೊದ ಪ್ರದರ್ಶನ ನಡಪುಂಡು. ತುಳು ಬೊಕ್ಕ ಕನ್ನಡ ಬಾಸೆಲೆಡ್ ಮೂಡ್ದ್ ಬೈದಿನ, ಒಟ್ಟು 108 ನಿಮಿಷೊದ ಈ ಸಾಕ್ಷ್ಯಚಿತ್ರ ತುಳುನಾಡ್ದ ಜಾನಪದ ಆಚರಣೆದ ಪೊರ್ಲು ಪೊಲ್ಸುನು ತೋಜಾವರೆ ಉಂಡು.
ಈ ಲೇಸ್ದ ಮಲ್ಲ ಬಿನ್ನೆರಾದ್ ಸಂದೇಶ ಫೌಂಡೇಶನ್ದ ನಿರ್ದೇಶಕೆರಾಯಿನ ಫಾ. ರೋಶನ್ ರೊಸರಿಯೋ, ಫೌಂಡೇಶನ್ದ ಟ್ರಸ್ಟಿ ರೋಯ್ ಕ್ಯಾಸ್ಟಿಲಿನೊ, ಪುಗರ್ತೆದ ಜಾನಪದ ಬೊಕ್ಕ ರಂಗಭೂಮಿ ಕಲಾವಿದೆರಾಯಿನ ಶೀನಾ ನಾಡೋಳಿ ಬೊಕ್ಕ ತುಳು ಸಾಹಿತಿಲಾಯಿನ ಅತ್ರಾಡಿ ಅಮೃತ ಮೊಕುಲು ಪಾಲ್ಪಡೆವರೆ ಉಲ್ಲೆರ್. ಸಾಂಸ್ಕೃತಿಕ ಆಸಕ್ತೆರ್ ಬೊಕ್ಕ ಕಲಾಭಿಮಾನಿಲು ಎಚ್ಚಿಗೆ ಸಂಖ್ಯೆಡ್ ಪಾಲ್ಪಡೆದ್ ಲೇಸ್ನ್ ಗೆಂದಾವೊಡು ಪನ್ದ್ ಸಂಘಟಕೆರ್ ಬಿನ್ನಪು ಮಲ್ತೊಂದೆರ್.
