Last updated on July 16th, 2026 at 08:20 am
ವಾಷಿಂಗ್ಟನ್, ಜುಲೈ 16: ಅಮೆರಿಕೊದ ಯೂಟಾ ರಾಜ್ಯೊದ ಶಾಪಿಂಗ್ ಮಾಲ್ ಒಂಜೆಟ್ ಬಾರೀ ಆಘಾತಕಾರಿ ನಡಪು ನಡತ್ದ್ಂಡ್. ಭಾರತೀಯ ಮೂಲೊದ ಉದ್ಯೋಗಿ ಒರಿಯನ ಧರ್ಮೊನು ಕೇನ್ದ್ ಆರೆಗ್ ಜನಾಂಗೀಯ ಪಗೆಟ್ ಬೀಸತ್ತಿ ಪಾಡ್ದೆರ್.
ವೆಸ್ಟ್ ವ್ಯಾಲಿ ಸಿಟಿತ ‘ವ್ಯಾಲಿ ಫೇರ್ ಮಾಲ್’ಡ್ ಸೋಮಾರ ಈ ನಡಪು ನಡತ್ದ್ಂಡ್. ಮಾಲ್ದ ಒಂಜಿ ಅಂಗಡಿಡ್ ಭಾರತೀಯ ಮೂಲೊದ ಸೊಹೈಲ್ ಪನ್ಪಿನಾರ್ ಬೇಲೆ ಮಲ್ತೊಂದಿತ್ತೆರ್. 48 ವರ್ಸೊದ ಪೀಟರ್ ಮೈಕೇಲ್ ಲಾರ್ಸೆನ್ ಪನ್ಪಿನ ಆರೋಪಿ ಸೊಹೈಲ್ ರೆನಡೆ ಬತ್ತ್ದ್ ಸುರುಕು ಪರ್ಯೆರ ಒಂಜಿ ಬಾಟ್ಲಿ ನೀರ್ ಕೇನ್ದೆ. ಬೊಕ್ಕ ಅಕುಲಿರ್ವೆರೆ ನಡುಟು ಪಾತೆರೊಗು ಪಾತೆರ ಬುಲೆದ್ಂಡ್ಗೆ.
ಆ ಅಂಗಡಿದ ಬರಿತ ಬಂಗಾರ್ದ ಕಟ್ಟೆಡ್ ಬೇಲೆ ಮಲ್ಪುನ ಲೂನಾ ನುನೆಜ್ ತೆರಿಪಾಯಿ ಲೆಕ, “ಆರೋಪಿ ಲಾರ್ಸೆನ್ ಸೊಹೈಲ್ನಡೆ ಬತ್ತ್ದ್ ‘ಈ ಒಲ್ಪರ್ದ್ ಬೈದ?’ ಪನ್ದ್ ಕೇನ್ದೆ. ಅವೆಕ್ ಸೊಹೈಲ್, ‘ಏನ್ ಭಾರತೊದಾಯೆ, ಎನ್ನ ಪುದರ್ ಸೊಹೈಲ್’ ಪನ್ದ್ ಪನ್ಡೆ. ಅಪಗನೇ ಲಾರ್ಸೆನ್ ‘ಈ ಮುಸ್ಲಿಮ್ ಆ?’ ಪನ್ದ್ ಕೇನ್ಡಿನೆಕ್ ಸೊಹೈಲ್ ‘ಅಂದ್’ ಪನ್ಡೆರ್. ಸೊಹೈಲ್ ನೀರ್ದ ಬಾಟ್ಲಿ ಕೊರ್ಯೆರ ತಿರ್ಗಿನೇ, ಲಾರ್ಸೆನ್ ಬೀಸತ್ತಿ ಗೆತೊಂದು ತಾರಾಮರ ಕುತ್ತುದೆ” ಪನ್ದ್ ತೆರಿಪಾದೆರ್. ಲೂನಾ ನುನೆಜ್ ಮೇರ್ ಸೊಹೈಲ್ನ ಕಾಪೆರ ಜೋಡು, ಕುರ್ಚಿ ಸೇರ್ದ್ ಕೈಕ್ ತಿಕ್ಕಿನೆನ್ ಮಾತಾ ಆರೋಪಿನ ಮಿತ್ತ್ ದಕ್ಕ್ದೆರ್.
ಸೊಹೈಲ್ ರೆಗ್ 15 ಸರ್ತಿ ಬೀಸತ್ತಿಡ್ ಕುತ್ತುದಿತ್ತ್ದ್, ಇತ್ತೆ ಆರೆಗ್ ಆಸ್ಪತ್ರೆಡ್ ಪಾಕ ಶಸ್ತ್ರಚಿಕಿತ್ಸೆ ನಡತ್ದ್ಂಡ್, ಆಂಡಲಾ ಗಾತಿದ ಸ್ಥಿತಿಟ್ ಉಲ್ಲೆರ್ ಪನ್ದ್ ತೆರಿದ್ ಬೈದ್ಂಡ್. ಸೊಹೈಲ್ನ ಮಿತ್ತ್ ದಾಳಿ ಆನಗ, ಸಾರ್ವಜನಿಕೆರ್ ಸಕಾಯೊಗು ಬೈದೆರ್. ಬೊಕ್ಕ ಅಲ್ಪ ಇತ್ತಿನಕುಲು ಒಂತೆ ಜನ ಆರೋಪಿನ್ ಪತ್ತ್ದ್ ಪೊಲೀಸೆರ್ ಬರ್ಪಿನೇಟ ಪತ್ತ್ರ್ದ್ ದೀದಿತ್ತೆರ್.
ಮುಸ್ಲಿಮೆರೆನ್ ಕೆರ್ಪುನನೇ ಎನ್ನ ಉದ್ದೇಶ:
ಕೈದಾತಿನ ಆರೋಪಿ ಪೀಟರ್ ಮೈಕೇಲ್ ಲಾರ್ಸೆನ್ ತನಿಖಾಧಿಕಾರಿಲೆನ ಎದುರು ಆಯನ ತಪ್ಪುನು ಒತ್ತೊಂದೆ. ಏನ್ ಮುಸ್ಲಿಮೆರೆನ್ ಕೆರ್ಪುನ ಉದ್ದೇಶೊಡೇ ಸೊಹೈಲ್ ಮುಸ್ಲಿಂ ಪನ್ದ್ ಪತ್ತ ಮಲ್ತೊಂದು ಬೀಸತ್ತಿ ಪಾಡ್ದೆ ಪನ್ದ್ ಪನ್ಡೊನ್ದೆ. ಆಯನ ಮಿತ್ತ್ ಕೆರ್ಪುನ ಪುನೆಪು ಬೊಕ್ಕ ನಿಷೇಧಿತ ಮಾರಕಾಸ್ತ್ರ ಕಾಯ್ದೆದ ಅಡಿಟ್ ಪ್ರಕರಣ ದಾಕಲ್ತೊಂದು ಸಾಲ್ಟ್ ಲೇಕ್ ಕೌಂಟಿ ಕರ್ಪಿಲ್ಲಡ್ ದೀತೆರ್.