Last updated on July 16th, 2026 at 10:31 am
ಉಬಾರ್ ಜು. 16 : ಪ್ರೈವೇಟ್ ಬಸ್ಲೆನ ನಡುತ ಟೈಮಿಂಗ್ಸ್ ವಿಚಾರೊಗು ಆಕೊಂದಿನ ನಡಪು ಉಬಾರ್ ಬಸ್ ಉಂತಡೆಡ್ ನಡತ್ದ್ಂಡ್. ಪ್ರಯಾಣಿಕೆರ್ ಬಸ್ಸ್ದ ಉಲಯಿ ಕುಲ್ಲುದುಪ್ಪುನಗನೇ ಪೊಗ್ಗಿನ ಕುಡೊಂಜಿ ಬಸ್ ದ ಕಂಡಕ್ಟರ್ ಒರಿ ಕರ್ಬದ ರಾಡ್ಡ್ ಕುಡೊರಿ ಕಂಡಕ್ಟರ್ಗ್ ಭೀಕರವಾದ್ ಆಕ್ದಿತ್ತ್ದ್, ಒರಿಯಗೊರಿ ಆಕೊಂದು ಇರ್ವೆರ್ ಕಂಡಕ್ಟರ್ನಕುಲ್ಲಾ ಆಸ್ಪತ್ರೆಗ್ ದಾಕಲಾತೆರ್.
ಕುಡ್ಲ-ಉಬಾರ್ ಮಾರ್ಗೊದ ‘ಅರಾಫಾ’ ಬಸ್ ಕಂಡಕ್ಟರ್ ನೌಶಾದ್ ಬೊಕ್ಕ ‘ಲಕ್ಷ್ಮೀ’ ಬಸ್ ದ ಕಂಡಕ್ಟರ್ ಖಲಂದರ ಯಾನೆ ಶಾಹೀದ್ ಒರಿಯಗೊರಿ ಆಕೊಂದಿನಕುಲು.
ಅಂಗಾರೆ ಬಯ್ಯಡ್ ಉಬಾರ್ ಬಸ್ ಉಂತಡೆಡ್ ರಡ್ಡ್ ಬಸ್ ಸಿಬ್ಬಂದಿಲೆನ ನಡುಟು ಟೈಮಿಂಗ್ಸ್ ವಿಚಾರೊಡು ಪಾತೆರೊಗು ಪಾತೆರ ಬುಲೆದ್ಂಡ್. ಈ ಪೊರ್ತುಡು ‘ಲಕ್ಷ್ಮೀ’ ಬಸ್ಸ್ದುಲಯಿ ಜನೊಕುಲು ಕುಲ್ಲುದುಪ್ಪುನಗನೇ ಅರಾಫಾ ಬಸ್ ಕಂಡಕ್ಟರ್ ನೌಶಾದ್ ಕೈಟ್ ಕರ್ಬದ ರಾಡ್ ಪತೊಂದು ಪೊಗ್ಗುದೆ. ಪ್ರಯಾಣಿಕೆರೆ ಕಣ್ಣೆದುರುಡೇ ಖಲಂದರ ಯಾನೆ ಶಾಹೀದ್ನ ತರೆ ಬೊಕ್ಕ ಮೆಯಿಕ್ ರಾಡ್ಡ್ ಅಮಾನವೀಯವಾದ್ ಆಕ್ದೆ.
ಕರ್ಬದ ರಾಡ್ ದಾಳಿರ್ದ್ ತಪ್ಪಾವೊನ್ರ ತೂಯಿನ ಶಾಹೀದ್ ಲಾ ತಿರ್ಗ್ದ್ ನೌಶಾದ್ ಗ್ ಕೈಟ್ ಆಕ್ದೆ. ಬಸ್ಸ್ದ ಸೀಟ್ಲೆನ ನಡುಟು ನಡತಿನ ಈ ಕೊಲಲಡ್ ಇರ್ವೆರೆ ತರೆ ಬೊಕ್ಕ ಕೈಕಾರ್ಗ್ ಗಡಿಕುಲಾತ. ಇತ್ತೆ ಗಡಿಕುಲಾತಿನ ಇರ್ವೆರೆನ್ಲಾ ಪುತ್ತೂರ್ ಸರ್ಕಾರಿ ಆಸ್ಪತ್ರೆಗ್ ದಾಕಲ್ತ್ದ್ ಮರ್ದ್ ಮಲ್ತೊಂದುಲ್ಲೆರ್. ಸಾರ್ವಜನಿಕ ಜಾಗೆಡ್ ಮಾರಕಾಸ್ತ್ರೊಲೆಡ್ ಆಕೊಂದು, ಪ್ರಯಾಣಿಕೆರೆ ಜೂವೊಗು ಎಚ್ಚಿಕಮ್ಮಿ ಆಪಿನ ಪೋಡಿಗೆ ಉಂಡುಮಲ್ತಿನೆಕ್ ಉಬಾರ್ ಪೊಲೀಸೆರ್ ಇರ್ವೆರೆ ಮಿತ್ತ್ ಪ್ರಕರಣ ದಾಕಲ್ತೊಂದೆರ್.