Last updated on July 20th, 2026 at 08:25 am
ಕಾಸ್ರೋಡ್, ಜು. 20: ಅಪ್ಪೆ ಅಮ್ಮೆ ಪೇಂಟೆಗ್ ಪೋದಿತ್ತಿನ ಪೊರ್ತುಡು, 12 ವರ್ಸ ಪ್ರಾಯೊದ ಆಣ್ ಒರಿ ಬಲ್ಲ್ ಪಾಡೊಂದಿನ ಸ್ಥಿತಿಟ್ ತಿಕ್ಕ್ದಿನ ನಡಪು ಕಾಸ್ರೋಡ್ ಜಿಲ್ಲೆದ ಬದಿಯಡ್ಕ ಪೊಲೀಸ್ ಸ್ಟೇಶನ್ ಸೀಮೆದ ಬೆದ್ರಂಪಳ್ಳಡ್ ಕೋಡೆ, ಐತಾರ ಮಧ್ಯಾಹ್ನ ನಡತ್ದ್ಂಡ್.
ತೀರ್ದಿನ ಆಣನ್ ಶ್ರೀಹರಿ (12) ಪನ್ದ್ ಗುರ್ತ ಪತ್ತ್ದೆರ್.
ತೀರ್ದಿನ ಶ್ರೀಹರಿ ಬಣ್ಪುತ್ತಡ್ಕ ಎಯುಪಿ ಶಾಲೆಡ್ 7ನೇ ಕ್ಲಾಸ್ ಕಲ್ತೊಂದಿತ್ತ್ದ್, ರಬ್ಬರ್ ತೋಟೊಡು ಟ್ಯಾಪಿಂಕ್ ಕಾರ್ಮಿಕೆರಾದ್ ಬೆನೊಂದಿತ್ತಿನ ಪ್ರಕಾಶನ್ ಬೊಕ್ಕ ಸುನಿತಾ ದಂಪತಿಲೆನ ಮಗೆ. ಮೂಲತಃ ಪತ್ತನಂತಿಟ್ಟ ಜಿಲ್ಲೆದ ಅಡೂರ್ ನಿವಾಸಿಲಾಯಿನ ಮೊಕುಲು ಕರಿನ ಕೆಲ ಸಮೆರ್ದಿಂಚಿ ಬೆದ್ರಂಪಳ್ಳದ ರಬ್ಬರ್ ತೋಟೊದ ಕಾರ್ಮಿಕೆರ ವಸತಿ ಗೃಹೊಟು ಇತ್ತೆರ್.
ಐತಾರ ಮಧ್ಯಾಹ್ನ ಶ್ರೀಹರಿನ ಅಪ್ಪೆ ಅಮ್ಮೆ ಇಲ್ಲಗ್ ಬೋಡಾಪಿನ ಸಾಮಾನ್ ಕನಯೆರ ಮಾರ್ಕೆಟ್ಗ್ ಪೋದಿತ್ತೆರ್. ಪಿರ ಇಲ್ಲಗ್ ಬತ್ತ್ದ್ ತೂನಗ ಕ್ವಾರ್ಟರ್ಸ್ದ ಎದುರುದ ಬಾಕಿಲ್ ಉಲಯಿರ್ದ್ ಚಿಲ್ಕ ಪಾಡ್ದಿನ ತೋಜಿದ್ ಬೈದ್ಂಡ್. ಪಾಕ ಸರ್ತಿ ಲೆತ್ತ್ಂಲಾ ಶ್ರೀಹರಿ ಬಾಕಿಲ್ ದೆಪ್ಪಂದಿನೆರ್ದಾವರ ಪೋಡಿನ ಅಪ್ಪೆಅಮ್ಮೆ ಬಾಕಿಲ್ ಪುಡತ್ದ್ ಉಲಯಿ ಪೊಗ್ಗುದೆರ್.
ಈ ಪೊರ್ತುಡು ಒಂಜಿ ಅದೆತ ಉಲಯಿ ಶ್ರೀಹರಿ ಬಲ್ಲ್ ಪಾಡೊಂದಿನ ಸ್ಥಿತಿಟ್ ತಿಕ್ಕ್ದೆ. ಅಪಗನೇ ಆಯನ್ ಆಸ್ಪತ್ರೆಗ್ ಲೆತೊಂದು ಪೋಂಡಲಾ, ಡಾಕ್ಟರ್ ಆಣ್ ತೀರ್ದೆ ಪನ್ದ್ ತೆರಿಪಾದೆರ್.
ಪುನೊನು ಮರಣೋತ್ತರ ಪರೀಕ್ಷೆಗ್ ಕಾಸ್ರೋಡ್ ಜನರಲ್ ಆಸ್ಪತ್ರೆದ ಶವಾಗಾರೊಗು ಕಡಪುಡ್ದೆರ್.
ಜಾಗೆಗ್ ಬತ್ತಿನ ಬದಿಯಡ್ಕ ಪೊಲೀಸೆರ್ ಪರಿಶೀಲನೆ ಮಲ್ತ್ದ್ ಪ್ರಕರಣ ದಾಕಲ್ತೊಂದೆರ್. ಎಚ್ಚಿಗೆ ಜಡ್ತೆ ನಡತೊಂದುಂಡು.