Last updated on July 20th, 2026 at 12:55 pm
ಕುಡ್ಲ, ಜು. 20: ತುಳುನಾಡ ಸಾಂಸ್ಕೃತಿಕ ಪೆರ್ಮೆ, ತುಳು ಚಿತ್ರರಂಗೊದ ಕಿರೀಟಗ್ ಕುಡೊಂಜಿ ರಾಷ್ಟ್ರೀಯ ಪ್ರಶಸ್ತಿ ಗೋಡಿದ್ಂಡ್. ಇಂಚಿಪ ಪ್ರಕಟ ಆಯಿನ ಪ್ರತಿಷ್ಠಿತ 72ನೇ ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿಲೆಡ್ ನಿರ್ದೇಶಕೆ ಶಿವಧ್ವಜ್ ಶೆಟ್ರೆನ ಸಾರಥ್ಯೊದ ‘ಇಂಬು’ ಸಿನಿಮಾ ‘ಅತ್ಯುತ್ತಮ ತುಳು ಚಿತ್ರ’ ಪ್ರಶಸ್ತಿನ್ ಗೆಂದ್ದ್ ತುಳುನಾಡ ಸಿನಿಲೋಕೊಡು ಪೊಸ ಇತಿಹಾಸ ಬರೆತ್ಂಡ್.
ಪಿಚ್ಚರ್ ಸ್ಟುಡಿಯೋದ ಲಾಂಛನೊಡು ಪ್ರಶಾಂತ್ ರೈ ಕಟ್ಟ್ದಿನ ಈ ಚಿತ್ರೊಗು, ಶಿವಧ್ವಜ್ ಶೆಟ್ರೇ ಕಥೆ, ಚಿತ್ರಕಥೆ ಬೊಕ್ಕ ಸಂಭಾಷಣೆ ಬರೆತೆರ್. ಇಂದು ತುಳು ಸಿನಿಮಾ ರಂಗೊಗು ಒದಗ್ದ್ ಬೈದಿನ ಎಣ್ಮನೇ ರಾಷ್ಟ್ರೀಯ ಗೌರವ ಆದುಂಡು.
ದಾದ ಉಂದು ‘ಇಂಬು’ ದ ಕಥೆ?
ಉಂದು ಕಾಲಿ ಒಂಜಿ ಸಿನಿಮಾ ಅತ್ತ್, ಗ್ರಾಮೀಣ ಭಾರತೊದ, ತುಳುನಾಡ್ದ ಮುಗ್ಧತೆ ಬೊಕ್ಕ ಇನಿತ ಡಿಜಿಟಲ್ ಯುಗೊತ ನಡುತ ಘರ್ಷಣೆಗ್ ಪತ್ತ್ದಿನ ಕನ್ನಡಿ. ಊರ್ದ ಧರ್ಮನಿಷ್ಠೆ, ಅನಕ್ಷರಸ್ಥೆ ಆಂಜೊವು, ಬೂತಕಟ್ಟುನ ‘ಬಾಲಣ್ಣ’ನ ಸುತ್ತ ಈ ಕಥೆ ತಿರ್ಗುಂಡು. ಬಂಙೊಲೆನ ನಡುಟುಲಾ ತನ್ನ ದೈವ ಚಾಕಿರಿನ್ ನಿಷ್ಠೆಡ್ ನಡಪಾವೊಂದು ಪೋಪಿನ ಬಾಲಣ್ಣೆ, ಮಗಲೆನ್ ಕಲ್ಪಾವುನ ಕನ ಕಟ್ಟಿನಾರ್. ಆಂಡ, ಆರೆನ ಕೈಕ್ ಒಂಜಿ ಸ್ಮಾರ್ಟ್ ಫೋನ್ ತಿಕ್ಕಿನೇ ಇಡೀ ಜೂವನೊನೇ ಅಂಚಿಂಚಿ ಆಪುಂಡು.
ಊರುಡು ದೇವೆರೆಲೆಕಂತಿನ ಬಾಲಣ್ಣೆ ಮೊಬೈಲ್ ತಿಕ್ಕಿ ಬೊಕ್ಕ ಆರೆಗೇ ತೆರಿಯಂದೆ ಮಲ್ದಿನ ತಪ್ಪುರ್ದಾವರ ತರೆಕಂತ ಪಾಡುನೇಟ ಎತ್ತುನೆನ್ ಈ ಸಿನಿಮಾ ತೋಜಾದ್ಂಡ್.
ಕುಸಲ್ದರಸೆ ನವೀನ್ ಡಿ. ಪಡೀಲ್ರೆನ ಅಭಿನಯ
ತುಳುನಾಡ ಕುಸಲ್ದರಸೆ ‘ಹಾಸ್ಯ ಚಕ್ರವರ್ತಿ’ ಪನ್ದೇ ಪುದರಾತಿನ ನವೀನ್ ಡಿ. ಪಡೀಲ್ ಮೇರ್ ಈ ಸಿನಿಮಾ ಡ್ ‘ಬಾಲಣ್ಣೆ’ ಆದ್ ಬಣ್ಣ ಪೂಜಿದ್ ಗಂಭೀರ ಬೊಕ್ಕ ಚಾತುರ್ಪುದ ನಟನೆನ್ ತೋಜಾದೆರ್. ಬಾಲಣ್ಣನ ಪಾತ್ರೊಗು ಜೂವ ದಿಂಜಾದಿನ ಆರೆನ ನಟನೆನ್ ಇಡೀ ದೇಶೊನೇ ಗುರ್ತ ಪತ್ತ್ದಿನವು ಇಡೀ ತುಳು ಚಿತ್ರರಂಗೊಗು ಪೆರ್ಮೆದ ವಿಚಾರ. ಈ ಗೆಲ್ಮೆ ತುಳು ಚಿತ್ರರಂಗೊಗು ನನಲಾತ್ ಎಡ್ಡೇನ ಸಿನಿಮಾಲೆನ್ ಕನಯೆರೆ ಉಮೇದ್ ದಿಂಜಾದ್ಂಡ್.
18 ವರ್ಸೊರ್ದು ಬೊಕ್ಕ ಶಿವಧ್ವಜ್ ಶೆಟ್ರೆನ ಕೈಕ್ ನ್ಯಾಷನಲ್ ಅವಾರ್ಡ್
ದುಂಬು ಎಡ್ಡೆ ಅಂಶೊಲು ಇತ್ತ್ಂಡಲಾ ‘ಕೊರಮ್ಮ’ (ತುಳು), ‘ಈ ಮಣ್ಣು’(ಕನ್ನಡ) ಬೊಕ್ಕ ‘ನಾಪುಟ್ಟುನ ಮಣ್ಣು’(ಕೊಡವ) ಸಿನಿಮಾಲೆಗ್ ಪ್ರಶಸ್ತಿ ತಿಕ್ಕ್ದಿಜ್ಜಂಡ್, ಇತ್ತೆ ಶೆಟ್ರೆನ ‘ಇಂಬು’ ಚಿತ್ರೊಗು ಪ್ರಶಸ್ತಿ ತಿಕ್ಕ್ದಿನವು ಎಂಕ್ ಇಂಬು ತಿಕ್ಕಿಲೆಕ ಆಂಡ್ ಪನ್ದ್ ಶೆಟ್ರ್ ಪನ್ಡೊನ್ದೆರ್.
ಇಂಚಿಪ ಆತೇ 55 ವರ್ಸ ಪತ್ತ ಮಲ್ತಿನ ತುಳು ಚಿತ್ರರಂಗೊದ ಇತಿಹಾಸೊಡು ರಾಷ್ಟ್ರೀಯ ಪ್ರಶಸ್ತಿಲೆನ ಸಾದಿ ಬಾರೀ ರೋಚಕ ಆದುಂಡು. 1994 ಡ್ ರಿಚರ್ಡ್ ಕ್ಯಾಸ್ಟೆಲಿನೊ ಮೆರೆನ ನಿರ್ದೇಶನೊದ ‘ಬಂಗಾರ್ ಪಟ್ಲೆರ್’ ಸಿನಿಮಾ ಸುರುತ ಸರ್ತಿ ರಾಷ್ಟ್ರೀಯ ಪ್ರಶಸ್ತಿ ಗೆಂದ್ದ್ ಇತಿಹಾಸ ಮಲ್ತಿತ್ತ್ಂಡ್. ಇತ್ತೆ 72ನೇ ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿಡ್ ‘ಇಂಬು’ ಚಿತ್ರೊದ ಈ ಮಲ್ಲ ಗೆಲ್ಮೆದೊಟ್ಟುಡು, ತುಳುನಾಡ ಕಲಾ ಪ್ರತಿಭೆ ಜಾಗತಿಕ ಮಟ್ಟೊಡು ಕುಡೊರ ತನ್ನ ಗೆಲ್ಮೆದ ಕೊಡಿ ರಾಪಾದ್ಂಡ್.
ರಾಷ್ಟ್ರೀಯ ಪ್ರಶಸ್ತಿ ಗೆಂದಿನ ಬೇತೆ ತುಳು ಪಿಚ್ಚರ್
1. ಬಂಗಾರ್ ಪಟ್ಲೆರ್
2. ಕೋಟಿ ಚೆನ್ನಯ್ಯ
3. ಗಗ್ಗರ
4. ಮದಿಪು
5. ಪಡ್ಡಾಯಿ
6. ಪಿಂಗಾರ
7. ಜೀಟಿಗೆ
8. ಇಂಬು