Last updated on July 23rd, 2026 at 11:52 am
ಸುಳ್ಯ, ಜು. 23: ಕೌಟುಂಬಿಕ ಉಪದ್ರ ಬೊಕ್ಕ ಮನಸ್ತಾಪೊರ್ದಾವರ ಪೊಂಜೊವು ಒರ್ತಿ ಅನುಮಾನಾಸ್ಪದವಾದ್ ತೀರ್ದಿನ ಪ್ರಕರಣೊಡು, ಆಲೆನ್ ಕೆರ್ತೆರ್ ಪನ್ಪಿನ ಒಯಿಲ್ದ ಮಿತ್ತ್ ತೀರ್ದಿನಾರೆನ ಮಾಮು, ಮಾಮಿ ಬೊಕ್ಕ ಮೈತಿದಿನ್ ಸುಳ್ಯ ಪೊಲೀಸೆರ್ ಕೋಡೆ ಬುಧವಾರ ಕೈದ್ ಮಲ್ತ್ದೆರ್.
ಪುತ್ತೂರು ತಾಲೂಕ್ದ ಕೆದಂಬಾಡಿ ನಿವಾಸಿ ಜುಬೈದಾ ಪನ್ಪಿನಾರೆನ ಮಗಲ್ ಫಾತಿಮತ್ ನಿಶಾನ ತೀರ್ದಿನಾರ್. ಪ್ರಕರಣೊಗು ಸಂಬಂಧಿತ್ದ್ ತೀರ್ದಿನಾರೆನ ಮಾಮು ಸಿ.ಪಿ. ಅಲವಿ , ಮಾಮಿ ಅಯಿಷಾ ಸಿ.ಎ. ಬೊಕ್ಕ ಮೈತಿದಿ ಫಸಿಲಾ ಸಿ.ಎ. ಪನ್ಪಿನಕಲೆನ್ ಪೊಲೀಸೆರ್ ಕೈದ್ ಮಲ್ತ್ದ್ ವಿಚಾರಣೆ ಮಲ್ತೊಂದುಲ್ಲೆರ್.
ನಾಲ್ ವರ್ಸೊಗು ಪಿರವು ಫಾತಿಮತ್ ನಿಶಾನ ಮೆರೆನ ಮದಿಮೆ ಆದಿತ್ತ್ಂಡ್. ಜುಲೈ 18ದ ರಾತ್ರೆ ನಿಶಾನ ಆರೆನ ಅಪ್ಪೆ ಜುಬೈದಾ ಗ್ ಫೋನ್ ಮಲ್ತ್ದ್, “ಕಂಡನ್ಯನ ಇಲ್ಲಡ್ ಮಾಮು, ಮಾಮಿ ಬೊಕ್ಕ ಮೈತ್ದಿ ಮಾನಸಿಕ ಬೊಕ್ಕ ದೈಹಿಕವಾದ್ ಬಾರೀ ಉಪದ್ರ ಕೊರೊಂದುಲ್ಲೆರ್” ಪನ್ದ್ ಬುಲ್ತೊಂದು ಪನ್ದಿತ್ತೆರ್ಗೆ. ಅಪ್ಪೆ-ಮಗಲೆನ ಪಾತೆರಕತೆ ಆವೊಂದಿತ್ತಿಲೆಕನೆ ನಡುಕು ಬತ್ತಿನ ಮಾಮು ಅಲವಿ, ನಿಶಾನ ನ ಕೈರ್ದ್ ಫೋನ್ ಒಯ್ತೊಂದು, “ನಿನ್ನ ಮಗಲೆನ್ ಕೆರ್ಪೆ” ಪನ್ದ್ ಅಪ್ಪೆ ಜುಬೈದಾ ಗ್ ಪೋಡಿಕಟ್ಟಾದೆಗೆ.
ಫೋನ್ದ ಬೆರಿಟೇ ಪೋಡಿನ ಅಪ್ಪೆ ಜುಬೈದಾ ಮಗಲೆನ್ ತೂವರೆ ಆಲೆನ ಇಲ್ಲಗ್ ಪಿದಡ್ನಗ, ನಿಶಾನ ತೀರ್ದಿನ ಸುದ್ದಿ ತೆರಿದ್ ಬೈದ್ಂಡ್. ಕೌಟುಂಬಿಕ ಉಪದ್ರ ಕೊರ್ದು ಆರೋಪಿಲು ಸೇರೊಂದೆ ಮಗಲೆನ್ ಕೆರ್ತೆರ್ ಪನ್ದ್ ಅಪ್ಪೆ ಜುಬೈದಾ ಸುಳ್ಯ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದೆರ್. ಒಯಿಲ್ದ ಆಧಾರೊಡು ಸುಳ್ಯ ಪೊಲೀಸ್ ಸ್ಟೇಶನ್ಡ್ ಕೆರ್ತಿನ ಬೊಕ್ಕ ಗೃಹ ಹಿಂಸಾಚಾರ ಪ್ರಕರಣ ದಾಕಲ್ತೊಂದಿನ ಪೊಲೀಸೆರ್, ಜುಲೈ 22 ತಾನಿ ಮೂವೆರೆನ್ ದಸ್ತಗಿರಿ ಮಲ್ತಿತ್ತ್ದ್, ನ್ಯಾಯಂತಡೆದ ಎದುರು ಲೆತೊಂದು ಪೋಪ ಪನ್ದ್ ತೆರಿಪಾದೆರ್.