ಬಂಟ್ವಾಳ: ಮರ ಬೂರ್ದು ಬಾಲೆ ತೀರ್ದಿನ ಪ್ರಕರಣ- ಕಲ್ಲಡ್ಕ ಶ್ರೀರಾಮ ವಿದ್ಯಾಕೇಂದ್ರೊದ ಆಡಳಿತ ಮಂಡಳಿದ ಮಿತ್ತ್ ಕೇಸ್

Last updated on July 26th, 2026 at 08:36 am

ಬಂಟ್ವಾಳ , ಜು. 26: ಜುಲೈ 22 ತಾನಿ ಬಂಟ್ವಾಳ ಗ್ರಾಮಾಂತರ ಸ್ಟೇಷನ್ ಸೀಮೆದ ಬರಿಮಾರ್ ಪನ್ಪಿನಲ್ಪ ಶಾಲೆದ ಬಸ್‌ದ ಮಿತ್ತ್ ಮರ ಬೂರ್ದು ಬಸ್‌ಡ್ ಇತ್ತಿನ ಬಾಲೆ ಒರ್ತಿ ತೀರ್ದಿನ ನಡಪುಗು ಸಂಬಂಧಿತ್‌ದ್ ಗಾಡಿದ ಇನ್ಶೂರೆನ್ಸ್ ಬೊಕ್ಕ ಎಫ್‌ಸಿ ಇಜ್ಜಂದಿನೆರ್ದಾವರ ಕಲ್ಲಡ್ಕ ಶ್ರೀರಾಮ ವಿದ್ಯಾಕೇಂದ್ರೊದ ಆಡಳಿತ ಮಂಡಳಿದ ಮಿತ್ತ್ ಪೊಲೀಸೆರ್ ಪ್ರಕರಣ ದಾಕಲ್ತೊಂದೆರ್.

ನಡಪುದ ಬಗೆಟ್ ಬಂಟ್ವಾಳ ಗ್ರಾಮಾಂತರ ಪೊಲೀಸ್‌ ಸ್ಟೇಷನ್‌ಡ್ ಯು.ಡಿ.ಆರ್ ಸಂಖ್ಯೆ 35/20026 ಕಲಂ 194 BNS ಕಾಯ್ದೆದ ಪ್ರಕಾರ ಪ್ರಕರಣ ದಾಕಲಾದಿತ್ತ್ಂಡ್. ಜಡ್ತೆದ ಪೊರ್ತುಡು ಪ್ರಾದೇಶಿಕ ಸಾರಿಗೆ ಅಧಿಕಾರಿ ಲೆರ್ದ್ ಶಾಲೆದ ಬಸ್‌‌ದ ದಾಕಲೆಲೆನ ಮಾನ್ಯತೆದ ಬಗೆಟ್ ವರದಿ ಗೆತೊಂದಿತ್ತ್‌ದ್, ನಡಪು ನಡತಿನ ಪೊರ್ತುಡು ಗಾಡಿದ ಇನ್ಶೂರೆನ್ಸ್ ಬೊಕ್ಕ ಎಫ್‌ಸಿ ಲ್ಯಾಪ್ಸ್ ಆದಿತ್ತಿನವು ತೆರಿದ್ ಬೈದ್ಂಡ್.

ಆತೇ ಅತ್ತಂದೆ ಗಾಡಿನ್ ಶ್ರೀರಾಮ ವಿದ್ಯಾ ಕೇಂದ್ರೊದ ಪುದರ್‌ಡ್ ರಿಜಿಸ್ಟರ್ ಮಲ್ಪಂದೆ, ಬೇತೆ ಟ್ರಸ್ಟ್ ಒಂಜೆತ ಪುದರ್‌ಡ್ ಇತ್ತ್ಂಡ್. ಅಗತ್ಯ ದಾಕಲೆಲು ದಾಂತೆ ಜೋಕುಲೆನ ಸುರಕ್ಷತೆಗ್ ತೆಟ್ಟ್ ಮಲ್ಪುನಂಚಿನ ಗಾಡಿನ್ ಸಾರ್ವಜನಿಕ ಜಾಗೆಡ್ ಬೇಜವಾಬ್ದಾರಿಡ್ ಬುಡ್ಪುನೆಕ್ ನೆವನ ಆತಿನ ಶ್ರೀರಾಮ ವಿದ್ಯಾ ಕೇಂದ್ರ ಕಲ್ಲಡ್ಕದ ಆಡಳಿತ ಮಂಡಳಿ ಮುಖ್ಯಸ್ಥೆರ್ ಬೊಕ್ಕ ಬೇತೆಕ್ಲೆನ ಮಿತ್ತ್ ಬಂಟ್ವಾಳ ಗ್ರಾಮಾಂತರ ಸ್ಟೇಶನ್‌ಡ್ ಅ.ಕ್ರ:109/2026, ಕಲಂ 125 BNS, ಕಲಂ 196,192(1) IMV Act ದ ಪ್ರಕಾರ ಪ್ರಕರಣ ದಾಕಲ್ತೊಂದು ಜಡ್ತೆ ಮಲ್ತೊಂದುಲ್ಲೆರ್.