Last updated on August 7th, 2026 at 02:08 pm
ಜೈ ತುಲುನಾಡ್ (ರಿ.) ಕಾರ್ಲ ಎಗ್ಗೆದ ಮುತಾಲಿಕೆಡ್ ‘ತುಲುಲಿಪಿ ಕಲ್ಪುಗ’ ಲೇಸ್ ಆಗಸ್ಟ್ 02 ತ ಐತಾರ ಬಜಗೋಲಿದ ಶ್ರೀ ಸಾಯಿ ಸಭಾಭವನ ಸಮೃದ್ಧಿ ಕಾಂಪ್ಲೆಕ್ಸ್ಡ್ ಜೈ ತುಲುನಾಡ್ (ರಿ.) ಕಾರ್ಲ ಎಗ್ಗೆದ ಗುರ್ಕಾರ್ಲು ಆಯಿನ ಮಹೇಶ್ ಕುಲಾಲ್ ಬೇಲಾಡಿ ಮೇರ್ನ ಗುರ್ಕಾರ್ಮೆಡ್ ನಡತುಂಡ್.
ಈ ಲೇಸ್ನ್ ಶ್ರೀ ಕೃಷ್ಣ ಎಲ್ ಶೆಟ್ಟಿ ಮೇರ್ ಉದಿಪನ ಮಲ್ತೆರ್. ಮೇರ್ ತುಲು ಲಿಪಿ ನನಲಾತ್ ಕಡೆಟ್ ಪಸರ್ದ್ ಬುಲೆವೊಡು, ಐಕ್ ರಾಜ್ಯಬಾಸೆದ ತಾನಮಾನ ತಿಕ್ಕೊಡು ಪಂದ್ ಪಂಡೆರ್.
ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಪದುಕೆರ್ ಆಯಿನ ಬೊಕ ಅಳುಪ ವಂಶಸ್ಥೆರಾಯಿನ ಡಾ. ಆಕಾಶ್ ರಾಜ್ ಜೈನ್ ಮೇರ್ ‘ಗೇನದ ಬೊಲ್ಪು’ ಪನ್ಪುನ ತುಲು ಲಿಪಿ ಮಸ್ತಿರೆನ್ ಕಲಸೆಗ್ ಬಾರ್ ಪಾಡುದ್ ಬುಡುಗಡೆ ಮಲ್ತೆರ್. ಆಕಾಶ್ ರಾಜ್ ಮೇರ್ ತುಲು ಬಾಸೆ, ತುಲು ಲಿಪಿತ ಬಗೆಟ್ ಜೈ ತುಲುನಾಡ್ ಎಗ್ಗೆ ಮಲ್ತೊಂದು ಇಪ್ಪುನ ಬೇಲೆನ್ ಪನೊಂದು ಮಾತೆರ್ನಲ ನೆಕ್ಕ್ ಸಾಕಾರ ಇತ್ತುಂಡ ಮಾತ್ರ ಗೆಂದರ ಸಾಧ್ಯ ಪಂಡೆರ್. ಮಾತ ಜಾಗೊಡ್ಲ ತುಲು ಪಾತೆರ್ನ ಒಟ್ಟುಗ್ ತುಲು ಲಿಪಿ ಕಲ್ಪುನಕುಲು ಉಮೇದ್ಡ್ ದುಂಬು ಬರೊಡ್ ಪಂದು ಪಂಡೆರ್. ಇನಿ ಬುಡುಗಡೆ ಮಲ್ತ್ನ ಮಸ್ತಿರೆ ನನಲಾತ್ ಜನಕ್ಲೆಗ್ ತೆರಿಯೋನರ ಸಾಕಾರ ಮಲ್ಪುಂದು ಪಂದ್ ಪಂಡೆರ್.
ಲೇಸ್ಡ್ ಬಿನ್ನೆರದ್ ವ್ಯವಸಾಯ ಸೇವಾ ಸಹಕಾರಿ ಸಂಘ ನೆತ್ತ ನಿರ್ದೇಶಕೆರಾಯಿನ ಶ್ರೀ ಸುಮಿತ್ ನಲ್ಲೂರ್, ಗ್ಯಾರಂಟಿ ಯೋಜನೆದ ಗುರ್ಕಾರ್ಲು ಶ್ರೀ ಅಜಿತ್ ಹೆಗ್ಡೆ, ಮದ್ಯಸ್ತೆರ್ ಶ್ರೀ ಸದಾನಂದ ಸಾಲಿಯಾನ್, ಬಜಗೋಳಿದ ಎಸ್. ಡಿ. ಎಮ್. ಸಿ ಗುರ್ಕಾರ್ಲು ಶ್ರೀ ಭಾಸ್ಕರ್ ಎಸ್ ಪೂಜಾರಿ, ಸಮಾಜ ಸೇವಕರಾಯಿನ ಗಾಯತ್ರಿ ಪ್ರಭು, ದೈವಾರಾಧಕೆ ಶ್ರೀ ರಾಜು ಪರವೆರ್, ಅಂಚೆನೆ ಜೈ ತುಲುನಾಡ್ ಕೇಂದ್ರ ಸಮಿತಿ ಗುರ್ಕಾರ್ಲು ಶ್ರೀ ಅಶ್ವಥ್ ತುಲುವೆ, ಜೈ ತುಲುನಾಡ್ ಕುಡ್ಲ ಬೊಕ್ಕ ಒಡಿಪು ಎಗ್ಗೆದ ಗುರ್ಕಾರ್ಲು ಅಂಚೃನೇ ಎಗ್ಗೆದ ಪದಾಧಿಕಾರಿಲು ಪಾಲ್ಪಡೆವೊಂಡೆರ್ .
ಗ್ಯಾರಂಟಿ ಯೋಜನೆದ ಗುರ್ಕಾರ್ಲು ಅಜಿತ್ ಹೆಗ್ಡೆ ಮೇರ್ ತುಲು ಕಾಲಿ ಒಂಜಿ ಜಾಗಗ್ ಇಪ್ಪುನವತ್ತ್, ಅವ್ ಮಾತ ಬಾಸೆಲು ಇಪ್ಪುನ ಈ ನಾಡ್ಡ್ ತುಲುಕ್ ಐತನೆ ಆಯಿನ ಲಿಪಿ ಉಂಡು. ತುಲು ಪಾತೆರ್ನಕುಲು ಇತ್ತುಂಡಲ ಲಿಪಿತ ಬಗ್ಗೆ ಸುಮಾರ್ ಜನಕ್ ತೆರಿದುಜಿ ನೆತ್ತ ಬೇಲೆನ್ ಜೈ ತುಲುನಾಡ್ ಎಗ್ಗೆ ಬೇಲೆ ಮಲ್ತೊಂದು ಬರೊಂದ್ ಉಂಡು ಪಂಡ್ ಪಂಡೆರ್.
ಲೇಸ್ಡ್ ಒಡಿಪು ಎಗ್ಗೆದ ಪ್ರಚಾರ ಸಮಿತಿದ ನಿದಯoತೆರ್ ಆಯಿನ ಪ್ರಶಾಂತ್ ಕುಂಜೂರ್ (ತುಲುಲಿಪಿ ಮಸ್ತಿರೆ ಎಡಿಟರ್ )ಮೆರೆಗ್ ಸಾಲ್ ಪಾರ್ದು ಮಾನಾದಿಗೆ ಮಲ್ತೆರ್.
ಜೈ ತುಲುನಾಡ್ (ರಿ.) ಕಾರ್ಲ ಎಗ್ಗೆದ ಗುರ್ಕಾರ್ಲು ಶ್ರೀ ಮಹೇಶ್ ಕುಲಾಲ್ ಬೇಲಾಡಿ ಮೇರ್ ಗುರ್ಕಾರ್ಮೆದ ರಡ್ಡ್ ಪಾತೆರ ಪಂಡೆರ್.
ಲೇಸ್ನ್ ಸೌಮ್ಯ ಕುಂದರ್ ಮೇರ್ ಸುದಾರ್ತೆರ್, ಸಮನ್ವಿ ಮೇರ್ ಸುಗಿಪು ಪಂಡೆರ್, ಜೈ ತುಲುನಾಡ್ (ರಿ.) ಕಾರ್ಲ ಎಗ್ಗೆದ ಒತ್ತು ಪನವುದ ಪಾಲವೆರ್ ಗೌತಮಿ ಮೇರ್ ಬಿನ್ನೆರೆನ್ ಎದ್ಕೊಂಡೆರ್, ಅಂಚೆನೆ ಕಾರ್ಯಂತೆರ್ ಅಕ್ಷತಾ ಮೇರ್ ಸಂಘಟನೆದ ಬಗೆಟ್ ಪ್ರಾಸ್ತಾವಿಕ ಪಾತೆರ ಪಂಡೆರ್, ಒತ್ತು ಗುರ್ಕಾರ್ಲು ನಿತಿನ್ ನಲ್ಲೂರ್ ಮೇರ್ ಮಾತೆರೆಗ್ಲಾ ಸೊಲ್ಮೆ ಸಂದಾಯಿತ ಮಲ್ತೆರ್.
ಲೇಸ್ದ ಕಡೆಕ್ ಬೈದಿನ ಮಾತ ಊರುದ ಜನಕುಲೆಗ್ ಒಂಜಿ ದಿನತ್ತ ತುಲು ಲಿಪಿ ಕಾರ್ಯಗಾರಡ್ ತುಲು ಲಿಪಿ ಕಲ್ಪಾದಿ ಕಿರಣ್ ತುಲುವೆ ಮೇರ್ ತುಲು ಲಿಪಿ ಕಲ್ಪಾಯೆರ್.