Last updated on November 22nd, 2026 at 10:46 am
ಬಂಟ್ವಾಳ, ನ.22: ಡ್ರೈವರ್ನ ಅಂಕೆ ತತ್ತಿನ ಒಂಜಿ ಕಾರ್ ಸಾದಿ ಬರಿಟ್ ಉಂತಾದಿತ್ತಿನ ಕಾರ್ ಬೊಕ್ಕ ರಿಪೇರಿಗ್ ಉಂತಾದಿತ್ತಿನ ಕ್ರೇನ್ಗ್ ಪಿರವುರ್ದ್ ಎಡ್ತಿನೆರ್ದಾವರ ಇರ್ವೆರ್ ಮೆಕ್ಯಾನಿಕ್ನಕುಲು ಸೇರ್ದ್ ಮೂವೆರೆಗ್ ಗಡಿಕುಲಾತಿನ ನಡಪು ರಾಷ್ಟ್ರೀಯಪೆರ್ಸಾದಿದ ಬಿ.ಸಿ.ರೋಡ್-ಧರ್ಮಸ್ಥಳ ಸಾದಿದ ಕಳ್ಳಿಮಾರ್ ಡ್ ನಡತ್ದ್ಂಡ್.

ಪುಂಜಾಲಕಟ್ಟೆ ನಿವಾಸಿ ಯು. ಮಹಮ್ಮದ್, ಆರೆನ ಮಗಲೆನ್ ಕಾರ್ಡ್ ಕುಡ್ಲಗ್ ಲೆತೊಂದು ಪೋನಗ ಕಳ್ಳಿಮಾರ್ದ ಇಂಜಿನಿಯರಿಂಗ್ ಶಾಪ್ ಒಂಜೆತ ಎದುರು ಈ ನಡಪು ನಡತ್ದ್ಂಡ್.
ಈ ಪೊರ್ತುಡು ಸಾದಿ ಬರಿಟ್ ಒಂಜಿ ಕಾರ್ ಉಂತುದಿತ್ತ್ಂಡ್. ಕೈತಲ್ಡೇ ಒಂಜಿ ಕ್ರೇನ್ನ್ ರಿಪೇರಿಗ್ ಉಂತಾದಿತ್ತೆರ್, ಮಾಧವ ಪಿಟ್ಟರ್ ರಿಪೇರಿ ಬೇಲೆ ಮಲ್ತೊಂದಿತ್ತೆರ್. ಪುನೀತ್ ಸಜೀಪ ಪನ್ಪಿನಾರ್ ಬೈಕ್ಡ್ ಕಲೊಂದು ಆರೆಡ ಪಾತೇರೊಂದಿತ್ತೆರ್ಗೆ. ಈ ಪೊರ್ತುಡು ಕುಡ್ಲದಂಚಿ ಪೋವೊಂದಿತ್ತಿನ ಕಾರ್ ಡ್ರೈವರ್ನ ಅಂಕೆ ತತ್ತ್ದ್ ಸುರುಕಕ ಸಾದಿ ಬರಿಟ್ ಉಂತಾದಿತ್ತಿನ ಕಾರ್ಗ್ ಎಡ್ತ್ದ್, ಬೊಕ್ಕ ಕ್ರೇನ್ಗ್ ಎಡ್ತ್ದ್ಂಡ್. ಎಡ್ತೆದ ಬರಸ್ಗ್ ಉಂತಾದಿತ್ತಿ ಕಾರೊ ಸುಮಾರ್ 100 ಮೀಟರ್ ದೂರೊಗು ರಟ್ಟ್ದ್ ಉಂತುದುಂಡು. ಬೆರ್ಮೆರೆ ದಯೆಟ್ ಕಾರ್ಡ್ ಏರ್ಲಾ ಇಜ್ಜಂದಿನೆರ್ದಾವರ ಮಲ್ಲ ಅನಾಹುತ ತತ್ತ್ದ್ಂಡ್.
ಇಂದೆತ ನಡುಟು ಕ್ರೇನ್ ರಿಪೇರ್ ಮಲ್ತೊಂದಿತ್ತಿನ ಮಾಧವ ಪಿಟ್ಟರ್ ಬೊಕ್ಕ ಬೈಕ್ಡ್ ಇತ್ತಿನ ಪುನೀತ್ ಸಜೀಪ ಗಾಡಿಲೆನ ನಡುಟು ತಿಕ್ಕ್ದ್ ಬೂರೊಂದೆರ್. ಉಂದೆನ್ ತೂದು ಅಪಗನೇ ಅಡೆಗ್ ಬತ್ತಿನ ಕೈತಲ್ದಕುಲು ಬಾರೀ ಬಂಙ ಬತ್ತ್ದ್ ಇರ್ವೆರೆನ್ಲಾ ಪಿದಯಿ ದೆತ್ತ್ದೆರ್.
ಕಾರ್ ಡ್ರೈವರ್ ಯು. ಮಹಮ್ಮದ್ ಗ್ಲಾ ಗಡಿಕುಲಾದಿತ್ತ್ದ್, ಮೂವೆರೆನ್ ಆಸ್ಪತ್ರೆಗ್ ಲೆತೊಂದು ಪೋಯೆರೆ ವ್ಯವಸ್ಥೆ ಮಲ್ತ್ದೆರ್. ಇಂದೇ ಸಾದಿಯೆ ಪೋವೊಂದಿತ್ತಿನ ಬಂಟ್ವಾಳ ಶಾಸಕೆ ರಾಜೇಶ್ ನಾಯ್ಕ್ ಮೇರ್ ಎಡ್ತೆದ ವಿಷಯ ತೆರಿದ್ ಜಾಗೆಗ್ ಬತ್ತ್ದ್ ಗಡಿಕುಲಾತಿನಕಲೆನ್ ಆಸ್ಪತ್ರೆಗ್ ಲೆತೊಂದು ಪೋಯೆರ ಬೋಡಾಪಿನ ವ್ಯವಸ್ಥೆ ಮಲ್ತ್ದೆರ್. ಜಾಗೆಗ್ ಬಂಟ್ವಾಳ ಸಂಚಾರ ಪೊಲೀಸೆರು ಬತ್ತ್ದ್ ಪರಿಶೀಲನೆ ಮಲ್ತ್ದೆರ್.