Last updated on August 9th, 2026 at 12:20 pm
ಒಡಿಪು, ಆ. 09 : ಪೆರಿಯಡ್ಕ ಕೈತಲ್ದ ಪಡ್ಡಂ ದ ಒಂಜಿ ಕಂಡೊಡು ಅಪರೂಪೊದ ನೀರ್ನಾಯಿ ತೂಯೆರ ತಿಕ್ಕ್ದಿತ್ತ್ದ್, ಮುಲ್ಪದಕಲೆಡ ಸೋದ್ಯ ಉಂಡು ಮಲ್ದ್ಂಡ್.
ಆಗಸ್ಟ್ 7ತ ಶುಕ್ರವಾರ ರಾತ್ರೆ ಮುಲ್ಪದ ರೈತೆ ರಾಘವೇಂದ್ರೆ ಪನ್ಪಿನಾರ್ ಆರೆನ ಕಂಡೊನು ಟ್ರ್ಯಾಕ್ಟರ್ಡ್ ದತ್ತೊಂದುಪ್ಪುನಗ ಅಸಾಮಾನ್ಯ ಪ್ರಾಣಿಯೊಂಜಿ ತೂವರೆ ತಿಕ್ಕ್ದ್ಂಡ್. ಕಂಡೊಡು ಇತ್ತಿನ ಪ್ರಾಣಿನ್ ತೂಯಿನ ರಾಘವೇಂದ್ರೆರ್, ಅವು ನೀರ್ನಾಯಿ ಪನ್ದ್ ಗುರ್ತ ಪತ್ತ್ದೆರ್. ತೂವರೆ ತಿಕ್ಕಿನ ನೀರ್ನಾಯಿ ಅಪಗನೇ ಅಲ್ಪರ್ದ್ ಪೋವಂದೆ, ಮನದಾನಿ ಶನಿವಾರ ಕಾಂಡೆಲಾ ಅಂಚೆನೇ ಅವ್ವೇ ಪ್ರದೇಶೊಡು ವಿಶ್ರಾಂತಿ ಮಲ್ತೊಂದುಪ್ಪುನ ತೋಜಿದ್ ಬೈದ್ಂಡ್. ಉಂದೆರ್ದಾವರ ಕೈತಲ್ದಕುಲು ಬಾರೀ ಸೋದ್ಯೊಡು ಅವೆನ್ ತೂತೆರ್.
ಸಾಮಾನ್ಯವಾಗದ್ ಸುದೆ, ಕೆರದು, ತಾರ್ ಸೇರ್ದ್ ನೀರ್ದ ಮೂಲೊಲೆನ ಸುತ್ತಮುತ್ತ ಇಪ್ಪುನ ನೀರ್ನಾಯಿ, ಕಂಡೊಡು ತೂವರೆ ತಿಕ್ಕುನು ಅಪರೂಪಗೆ. ತುಳುನಾಡ್ಡ್ ಅಲ್ಪಲ್ಪ ಈ ಪ್ರಾಣಿಲು ಉಲ್ಲ, ಆಂಡಲಾ ಬಾರೀ ನಾಚಿಗೆ ಸ್ವಭಾವ ಆಯಿನೆರ್ದಾವರ ನರಮಾನ್ಯನ ಕಣ್ಣಗ್ ತೂವರೆ ತಿಕ್ಕುನು ಬಾರೀ ಬಾರೀ ಅಪರೂಪ.