Last updated on August 20th, 2026 at 08:00 am
ಪುತ್ತೂರ್, ಆ. 20: ಮೆಸ್ಕಾಂ (ಮಂಗಳೂರು ವಿದ್ಯುತ್ ಸರಬರಾಜು ಕಂಪನಿ) ಲೈನ್ಮ್ಯಾನ್ ಒರಿ ದಿಂಜಿದ್ ಪರತೊಂದಿತ್ತಿನ ಸುದೆನ್ ಮೀಂದ್ದ್ ಕಡತ್ದ್, ಕಡಿನ ಕರೆಂಟ್ ವಯರ್ನ್ ಕುಡ ಜೋಡ್ಯಾದಿನ ನಡಪು ಪುತ್ತೂರ್ ಕೈತಲ್ದ ಬೆಟ್ಟಂಪಾಡಿದ ದೂಮಡ್ಕ ಪನ್ಪಿನಲ್ಪ ನಡತ್ದ್ಂಡ್. ಜೂವೊದ ಲೆಕ್ಕ ದೆಪ್ಪಂದೆ ಕರೆಂಟ್ ಲೈನ್ ಸಮ ಮಲ್ಪುನ ಮುಕೇನ ಲೈನ್ಮ್ಯಾನ್ ಆರೆನ ಕರ್ತವ್ಯನಿಷ್ಠೆ ತೋಜಾದೆರ್.
ದೂಮಡ್ಕಡೆ ಆದ್ ಪರಪುನ ಸೀರೆ ಸುದೆಟ್ ಕರೆಂಟ್ ವಯರ್ ಕಡಿದ್ ಬೂರ್ದಿನೆರ್ದಾವರ ಸುತ್ತಮುತ್ತದ ಜಾಗೆಲೆಡ್ ಕರೆಂಟ್ ಇಜ್ಜಂಡ್. ಅಂಚಾದ್ ಬೆಟ್ಟಂಪಾಡಿ ಮೆಸ್ಕಾಂ ಕಚೇರಿಡ್ ಲೈನ್ಮ್ಯಾನ್ ಆದುಪ್ಪುನ ಬಂದೇ ನವಾಜ್ ಮೇರ್ ಕರೆಂಟ್ ಲೈನ್ ಸಮ ಮಲ್ಪುನ ಜಬದರಿಗೆ ಗೆತೊಂಡೆರ್.
ಸುದೆತ ನೀರ್ ಬಾರೀ ಬರಸ್ಡ್ ದಿಂಜಿದ್ ಪರತೊಂದಿತ್ತ್ಂಡಲಾ, ನೀರ್ದ ಒಯ್ಲ್ನ್ಲಾ ಗೆನ್ಪಂದೆ ನವಾಜ್ ಸುದೆ ಮೀಂದ್ದ್, ಕಡಿನ ಕರೆಂಟ್ ವಯರ್ನ್ ಪಿರ ತಿಕ್ಕಾದ್ ಲೈನ್ ಸಮ ಮಲ್ತೆರ್.
ದಿಂಜಿದ್ ಪರಪುನ ಸುದೆನ್ ಲೈನ್ಮ್ಯಾನ್ ಮೀಂದ್ದ್ ಕಡತ್ದ್ ಬೇಲೆ ಮಲ್ದಿನ ದೃಶ್ಯೊಲೆನ ವಿಡಿಯೋ ಸಾಮಾಜಿಕ ಬಲೆತ್ತಾನೊಡು ವೈರಲ್ ಆತ್ಂಡ್. ಸಾರ್ವಜನಿಕ ಸೇವೆದ ಮಿತ್ತ್ ಆರೆನ ಬದ್ಧತೆ ಬೊಕ್ಕ ತಂಕೊನು ಜನ ಪುಗರೊಂದುಲ್ಲೆರ್.