Last updated on August 21st, 2026 at 03:27 pm
ಮುಲ್ಕಿ, ಆ. 20: ತುಳುನಾಡ ಮುಲ್ಕಿಡ್ ಆಗಸ್ಟ್ 23 ತಾನಿ ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್ (ರಿ.) ಅಟ್ಟನೆ ಮಲ್ದಿನ ತುಳುವ ಜವನೆರೆ ಆಯನೊ ತುಳುನಾಡ್ ಕಾನ್ಕ್ಲೇವ್ 2026 ಡ್ 5 ತುಳು ಪುಸ್ತಕೊಲೆನ ಲೋಕಾರ್ಪಣೆ ಆವರೆ ಉಂಡು.
ಕಾರ್ನಾಡ್ ಮುಲ್ಕಿದ ಸರಕಾರಿ ಪದವಿ ಪೂರ್ವ ಕಾಲೇಜ್ದ ಸಭಾಂಗಣೊಡು ನಡಪುನ ಫೌಂಡೇಶನ್ದ ಈ ಲೇಸ್ಡ್ ಪ್ರತಿವರ್ಸೊದ ಲೆಕ ಒಂಜಾತ್ ತುಳು ಪುಸ್ತಕೊಲೆನ್ ಬುಡುಗಡೆ ಮಲ್ತೊಂದುಲ್ಲೆರ್.
ತುಳು ಪುಸ್ತಕೊಲೆನ ಸಂಖ್ಯೆ ಎಚ್ಚ ಆವೊಡು, ತುಳುವೆರೆಗ್ ತುಳುಟೇ ಓದುನ ಸೊತ್ತುಲು ತಿಕ್ಕುಲೆಕ ಆವೊಡು ಪನ್ದ್ ಎಂಕ್ಲ ವರ್ಸೊಲಾ ತುಳುನಾಡ್, ತುಳು ಸಂಸ್ಕೃತಿದ ಪೊಲಬು ಕೊರ್ಪುನ ಪುಸ್ತಕೊಲೆನ್ ಪ್ರಕಟ ಮಲ್ತೊಂದುಪ್ಪುವ, ಈ ವರ್ಸ ಬೀರದ ಬೊಲ್ಪು, ಅಪ್ಪೆ, ಕಾಂತಾಬಾರೆ, ಬೂದಾಬಾರೆ, ವಜ್ರದಾರಗೆ ಬೊಕ್ಕ ಕುಡೊರ ಅಚ್ಚಿ ಮಲ್ದಿನ ಜೀಟಿಗೆ ಪುಸ್ತಕೊಲೆನ್ ಬುಡುಗಡೆ ಮಲ್ತೊಂದುಲ್ಲ ಪನ್ದ್ ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್ದ ಅಂಗಸಂಸ್ಥೆ ಪುಣ್ಣಮೆ ಪಬ್ಲಿಕೇಶನ್ದ ಡೈರೆಕ್ಟರ್ ಪೃಥ್ವಿ ತುಳುವೆ ತುಳು ಸಮಾಚಾರ ಗ್ ಪನ್ಡೆರ್.
ಬುಡುಗಡೆ ಆಪಿನ ಪುಸ್ತಕೊಲೆನ ಒಲವು
- ಬೀರದ ಬೊಲ್ಪು: ತುಳುಕು ಮಂದಾರ ರಾಮಾಯಣದಂಚಿನ ಬಾರೀ ಉತ್ಕೃಷ್ಟ ಕೃತಿ ಕೊರ್ತಿನ ತುಳುವಾಲ್ಮೀಕಿ ಮಂದಾರ ಕೇಶವ ಭಟ್ರ್ ಶ್ರೀಕೃಷ್ಣನ ಬಾಲಲೀಲೆಲೆನ ಬಗೆಟ್ ಬರೆತಿನ ಈ ಕೃತಿನ್ ಫೌಂಡೇಶನ್, ಮಂದಾರ ಪ್ರತಿಷ್ಠಾನೊದ ಸಹಯೋಗೊಡು ಕುಡೊರ ಅಚ್ಚಿ ಮಲ್ತ್ ಪ್ರಕಟ ಮಲ್ತೊಂದುಂಡು.
- ಅಪ್ಪೆ: ಅಪ್ಪೆನ ಅತ್ತ್ಂಡ ಅಪ್ಪೆನ ಜಾಗೆಡ್ ಉಂತುದು ಸಾಂಕಿನಕ್ಲೆನ ಬಗೆಟ್ ಜೋಕುಲು, ಪುಲ್ಯರ್ಲು ಬರೆತಿನ ಕತೆಕ್ಲೆನ್ ಸಂಪೊಲಿತ್ದ್ ಮಲ್ದಿನ ಪುಸ್ತಕೊ
- ಕಾಂತಾಬಾರೆ ಬೂದಾಬಾರೆ ಒಂಜಿ ಸಮಗ್ರ ಅಧ್ಯಯನ: ಏಳಿಂಜೆದ ಸುಶಾನ್ ಕೋಟ್ಯಾನ್, ಮುಲ್ಕಿ ಒರ್ಮ್ಬ ಮಾಗಣೆದ ಕಾರ್ನಿಕ ಪುರ್ಸೆರ್, ಅಮರ್ ಬೀರೆರ್ ಕಾಂತಾಬಾರೆ ಬೂದಾಬಾರೆರೆನ ಬಗೆಟ್ ಪಾಡ್ದನೊಲೆನ್ ಸಂಪೊಲಿತ್ದ್ ಮಲ್ದಿನ ಒಂಜಿ ಸಮಗ್ರ ಅಧ್ಯಯನ ಕೃತಿ
- ವಜ್ರದಾರಗೆ: ತುಳುವ ಮಣ್ಣ್, ಆಚರಣೆಲೆನ ಬಗೆಟ್ ಇತ್ತಿನೆನ್ ಇತ್ತಿಲೆಕ ಬರೆಪುನ ಚಾತುರ್ಪುದ ಬರವುಗಾರೆ ಹರ್ಷ ತುಳುನಾಡ್ ಮೆರನ ಅಜತಿ ಬರವುಲೆನ ಸಂಕಲನ.
- ಜೀಟಿಗೆ: ತುಳು ಲಿಪಿ ಕಲ್ಪುನ ಈ ಮಸ್ತಿರೆ 2 ಸಾರೊರ್ದು ಎಚ್ಚ ಪ್ರತಿ ಸೇಲ್ ಆದ್ ಇತ್ತೆ ಮೂಜನೇ ಅಚ್ಚಿ ಆದ್ ಬುಡುಗಡೆಗ್ ರೆಡಿ ಆತ್ಂಡ್.