Last updated on September 13th, 2026 at 11:17 am
ಪುತ್ತೂರ್, ಸೆ. 13: ನೆಹರು ನಗರದ ವಿವೇಕಾನಂದ ವಿದ್ಯಾವರ್ಧಕ ಸಂಘ(ರಿ) ರ್ದ್ 45ನೇ ವರ್ಸೊದ ಗಣೇಶೋತ್ಸವ ಗೌಜಿಡ್ ನಡಪರೆ ಉಂಡು. ಇಂದೆತ ಲೆಕ್ಕೊಡು ವಿವೇಕಾನಂದ ವಿದ್ಯಾವರ್ಧಕ ಸಂಘೊದ ನಿರೆಲ್ಡ್ ಕಾರ್ಯಚರಣೆ ಮಲ್ತೊಂದುಪ್ಪುನ ಬೇತೆ ಬೇತೆ ವಿದ್ಯಾಸಂಸ್ಥೆಲು ಒಟ್ಟುಸೇರ್ದ್ ಸೆ. 14 ರ್ದ್ ಸೆ. 16 ಮುಟ್ಟ ಮೂಜಿ ದಿನೊತ ಗರ್ದ್ಗೌಜಿದ ಗಣೇಶೋತ್ಸವ ಕರಿತೊಂದುಂಡು.
ಸೆ. 14 ತಾನಿ ಕಾಂಡೆ ಶಿವಪೇಟೆರ್ದ್ ಮೆರವಣಿಗೆಡ್ ಮೂರ್ತಿನ್ ಕನತ್ದ್ ವಿವೇಕಾನಂದ ಕ್ಯಾಂಪಸ್ದ ಕೇಶವ ಸಂಕಲ್ಪ ಸಭಾಭವನೊಡು ಪ್ರತಿಷ್ಠಾಪನೆ ಮಲ್ಪುವೆರ್. ವಿವೇಕಾನಂದ ವಿದ್ಯಾವರ್ಧಕ ಸಂಘೊದ ಶೆರಿಯ ನಿವೃತ್ತ ಉದ್ಯೋಗಿ ನಾರಾಯಣ ಕೆ ಮೇರ್ ತುಡರ್ ಅರ್ಲಾವೆರ್. ವಿವೇಕಾನಂದ ವಿದ್ಯಾವರ್ಧಕ ಸಂಘೊದ ಅಂಗ ಸಂಸ್ಥೆಲೆರ್ದ್ ಮೂಜಿ ದಿನ ಬೇತೆ ಬೇತೆ ವಿಧ ಸಾಂಸ್ಕೃತಿಕ ಕಾರ್ಯಕ್ರಮೊಲು ನಡಪುವ. ಒಟ್ಟುಗು ಊರುದಕಲೆರ್ದ್ ಭಜನೆ ಬೊಕ್ಕ ರಂಗಪೂಜೆ ನಡಪುಂಡು. ವಿವೇಕಾನಂದ ಕಾಲೇಜ್ದ ಅಧ್ಯಾಪಕೆರೆನ ಮುತಾಲಿಕೆಡ್ ಗಣಹೋಮ, ಮಹಾಪೂಜೆ, ಪ್ರಸಾದ ಪಟ್ಟುನೆತ ಒಟ್ಟುಗು ಬೇತೆ ಬೇತೆ ಧಾರ್ಮಿಕ ಕಾರ್ಯಕ್ರಮೊಲು ನಡಪುವ. ಸೆ.15ತ ಕಾಂಡೆ ಗಣಪತಿ ಹವನ, ಸಾಂಸ್ಕೃತಿಕ ಕಾರ್ಯಕ್ರಮೊಲು, ಗಣೇಶೋತ್ಸವದ ಲೆಕ್ಕೊಡು ಪ್ರತಿ ವರ್ಸೊದ ಲೆಕ ಈ ಸರ್ತಿಲಿ ಕಾಲೇಜ್ದ ಜೋಕುಲೆಗ್ ಅಟ್ಟನೆ ಆತಿನ ಗೊಬ್ಬುದ ಪಂತೊಲೆಡ್ ಗೆಂದಿನಕಲೆಗ್ ಇನಾಮು ಪಟ್ಟುನ ಬೊಕ್ಕ ಸಭಾ ಕಾರ್ಯಕ್ರಮ ನಡಪರೆಗುಂಡು, ಕಾರ್ಯಕ್ರಮೊಡು ಅಖಿಲ ಭಾರತೀಯ ಸಾಹಿತ್ಯ ಪರಿಷದ್ ಮಂಗಳೂರು ಇಂದೆತ ಕಾರ್ಯದರ್ಶಿ ಲತೇಶ್ ಬಾಕ್ರಬೈಲು ಪಾಲ್ಪಡೆಯೆರೆ ಇತ್ತ್ದ್, ಕಾರ್ಯಕ್ರಮೊದ ಗುರ್ಕಾರ್ಮೆನ್ ವಿವೇಕಾನಂದ ವಿದ್ಯಾವರ್ಧಕ ಸಂಘೊದ ಅಧ್ಯಕ್ಷೆರ್ ಕೃಷ್ಣ ಕುಮಾರ್ ಶೆಟ್ಟಿ ವಯಿತೊನುವೆರ್. ವಿದ್ಯಾವರ್ಧಕ ಸಂಘೊದ ಕಾರ್ಯದರ್ಶಿ ವಿಜಯ ನಾರಾಯಣ ಕೆ.ಎಂ ಒತ್ತುಪಾಲ್ ಇಪ್ಪುವೆರ್.
ಗಣೇಶೋತ್ಸವದ ಅಕೇರಿದ ದಿನ ದಿನ ಸೆ. 16ತಾನಿ ಸಾಂಸ್ಕೃತಿಕ ಕಾರ್ಯಕ್ರಮ ಆದ್ ಮಧ್ಯಾಹ್ನ ಮಹಾಪೂಜೆ ನಡಪುಂಡು, ಅಪರಾಹ್ನ 2 ಗಂಟೆಗ್ ಗಣಪತಿನ ವೈಭವೊದ ಶೋಭಯಾತ್ರೆ ಪಿದಡ್ದ್ ಹಾರಾಡಿದ ಗುವೆಲ್ಡ್ ವಿಸರ್ಜನೆ ಆವರೆ ಉಂಡು.
ವಿವೇಕಾನಂದ ವಿದ್ಯಾವರ್ಧಕ ಸಂಘೊರ್ದು ಪೊಸತಾದ್ ಸುರು ಮಲ್ದಿನ, ಸ್ವಯಂ ಆರತಿ ಈ ಸರ್ತಿದ 45ನೇ ಶ್ರೀ ಗಣೇಶೋತ್ಸವಡ್ ವಿಶೇಷವಾದುಂಡು. ಅಟ್ಟುಗು ರಂಗಪೂಜೆ, ಸರ್ವಸೇವೆ, ಮಹಾಪೂಜೆ, ಗಣಪತಿ ಹವನ, ಪರಕೆದ ಸೇವೆ, ಪಂಚಕಜ್ಜಾಯ, ವಿದ್ಯಾರಕ್ಷೆ, ಕರ್ಪೂರಾರತಿ ಸೇವೆಲು ನಡಪುಂಡು ಪನ್ದ್ ಪ್ರಕಟಣೆ ತೆರಿಪಾದ್ಂಡ್.