Last updated on October 5th, 2026 at 11:38 am
ಮಲ್ಪೆ,ಅ. 05: ಮಲ್ಪೆದ ಬಾಬುತೋಟ ಡಕ್ಕೆದ ಕೈತಲ್ ಸೆಪ್ಟೆಂಬರ್ 28ದ ರಾತ್ರೆ ನಡತಿನ ಆಂಧ್ರಪ್ರದೇಶ ಮೂಲೊದ ಪರಮೇಶಿ ಪರಮ್ ವೇಲಿ (55) ನ್ ಕೆರ್ತಿನ ಪ್ರಕರಣೊದ ಆರೋಪಿನ್ ಪತ್ತುನೆಟ್ ಮಲ್ಪೆ ಸ್ಟೇಶನ್ ಪೊಲೀಸೆರ್ ಯಶಸ್ವಿ ಆತೆರ್. ಹುಬ್ಬಳ್ಳಿದ ಆರೋಗ್ಯದಾಸ್ ಕಾಮಿ (55) ಕೈದಾತಿನ ಆರೋಪಿ.
ಮಲ್ಪೆ ಬಂದರ್ ಪ್ರದೇಶೊಡು ಗುಜಿರಿ ಪೆಜ್ಜೊಂದು ಜೂವನ ಕರಿತೊಂದಿತ್ತಿನ ಪರಮೇಶಿ ಡ ಸೆಪ್ಟೆಂಬರ್ 28ದ ರಾತ್ರೆ ಒವ್ವಾ ನೆವನೊಗು ಲಡಯಿ ಮಲ್ದಿನ ಆರೋಪಿ ಆರೋಗ್ಯದಾಸ್, ಪರಮೇಶಿನ್ ಜೆತ್ತಿನಲ್ಪನೇ ಪರ್ತೆದ ಕೈದ್‌ಡ್ ಕುತ್ತ್‌ದ್ ಕೆರ್ದ್ ಅಲ್ಪರ್ದ್ ಪದ್ರಾಡಾತೆ. ಸೆಪ್ಟೆಂಬರ್ 29ದ ಕಾಂಡೆ ಕೈತಲ್‌ದಕುಲು ತೂನಗ ಪರಮೇಶಿ ಗೋಣಿದ ಮಿತ್ತ್ ನೆತ್ತೆರ್‌ದ ಮಡುಟು ಪುನ ಆದ್ ಬೂರ್ದಿನ ತೋಜಿದ್ ಬೈದ್ಂಡ್. ಈ ಬಗೆಟ್ ಮಲ್ಪೆ ಪೊಲೀಸ್ ಸ್ಟೇಷನ್‌ಡ್ ಕೊಲೆ ಪ್ರಕರಣ ದಾಕಲಾದಿತ್ತ್ಂಡ್.
ಪ್ರಕರಣೊದ ಜಡ್ತೆ ಮಲ್ತಿನ ಪೊಲೀಸೆರ್, ಕಾರ್ಯಾಚರಣೆ ಮಲ್ತ್‌ದ್ ಆರೋಪಿ ಆರೋಗ್ಯದಾಸ್‌ನ್ ಹುಬ್ಬಳ್ಳಿಡ್ ಕೈದ್ ಮಲ್ತ್‌ದೆರ್. ಒಡಿಪು ಡಿವೈಎಸ್ಪಿ ಬೆಳ್ಳಿಯಪ್ಪ ಕೆ.ಯು. ಬೊಕ್ಕ ಮಲ್ಪೆ ವೃತ್ತ ನಿರೀಕ್ಷಕೆ ರಾಮಚಂದ್ರ ನಾಯಕ್ ಮೊಕಲೆನ ಮಾರ್ಗದರ್ಶನೊಡು, ಮಲ್ಪೆ ಪೊಲೀಸ್ ಉಪನಿರೀಕ್ಷಕೆ ಅನೀಲ್ ಕುಮಾರ್ ಡಿ., ಸಿಬ್ಬಂದಿ ವಿಶ್ವನಾಥೆ, ಆದರ್ಶ್ ಬೊಕ್ಕ ಕುಬೇರೆ ಇತ್ತಿನ ವಿಶೇಷ ಕೂಟ ಈ ಕಾರ್ಯಚರಣೆ ಮಲ್ತ್‌ದ್ಂಡ್.
malpe: ḍakkeda kaital āṁdhra pradēśa mūloda āṁjovūnu kertina prakaraṇa; hubbaḷḷiḍ ārōpin kaid maltina polīser!
malpe, Oct. 05: malpeda bābutōṭa ḍakkeda kaital sepṭeṁbar 28da rātre naḍatina āṁdhrapradēśa mūloda paramēśi param vēli (55) n kertina prakaraṇoda ārōpin pattuneṭ malpe station polīser yaśasvi āter. hubbaḷḷida ārōgyadās kāmi (55) kaidātina ārōpi.
malpe baṁdar pradēśoḍu gujiri pejjoṁdu jūvana karitoṁdittina paramēśi ḍa sepṭeṁbar 28da rātre ovvā nevanogu laḍayi maldina ārōpi ārōgyadās, paramēśin jettinalpanē parteda kaidḍ kuttd kerd alpard padrāḍāte. sepṭeṁbar 29da kāṁḍe kaitaldakulu tūnaga paramēśi gōṇida mitt netterda maḍuṭu puna ād būrdina tōjid baidṁḍ. ī bageṭ malpe polīs sṭēṣanḍ kole prakaraṇa dākalādittṁḍ.
prakaraṇoda jaḍte maltina polīser, kāryācaraṇe maltd ārōpi ārōgyadāsn hubbaḷḷiḍ kaid maltder. oḍipu DYSP beḷḷiyappa ke.yu. bokka malpe vr̥tta nirīkṣake rāmacaṁdra nāyak mokalena mārgadarśanoḍu, malpe polīs upanirīkṣake anīl kumār ḍi., sibbaṁdi viśvanāthe, ādarś bokka kubēre ittina viśēṣa kūṭa ī kāryacaraṇe maltdṁḍ.