Last updated on October 5th, 2026 at 12:18 pm
ಮಣಿಪಾಲ, ಅ. 05: ಎಂಐಟಿ (MIT) ಕ್ಯಾಂಪಸ್‌ಡ್ ಜೋಕುಲು ಬೊಕ್ಕ ಪೋಷಕೆರೆಗ್ ಬ್ಯಾಟರಿ ಗಾಡಿದ ಸೇವೆ ಕೊರೊಂದಿತ್ತಿನ ‘ಇಂಡಿಯಾಂಟಾ ಇ ಮೊಬಿಲಿಟಿ’ ಕಂಪನಿಗ್ ಲಕ್ಷಗಟ್ಲೆ ರೂಪಾಯಿ ದಗೆ ಮಲ್ದಿನ ಪ್ರಕರಣೊಗು ಸಂಬಂಧಿತ್‌ದ್ ಆಜಿ ಜನ ಆರೋಪಿಲೆನ್ ಪೊಲೀಸೆರ್ ಕೈದ್ ಮಲ್ತ್‌ದೆರ್.
ವಿಜಯನಗರ ಜಿಲ್ಲೆದ ಕೂಡ್ಲಿಗಿದ ಸಿದ್ದಮೂರ್ತಿ ಜಿ. (29), ಆತ್ರಾಡಿದ ಶಿವರಾಜ್ ನಾಯ್ಕ (30), ಚಿತ್ರದುರ್ಗದ ಸುದೀಪ್ (30), ಮಂಜೇಶ್ವರದ ಜಿತೇಶ ಕಾಂಚನ್ (29), ಬೆಳಗಾವಿದ ಮುತ್ತಣ್ಣ ಅಢೀನವರ (32) ಬೊಕ್ಕ ಬೋಲ್ತೇರ್ ನಾವೂರ್‌ದ ಎಂ.ಬಿ. ಅವಿನಾಶ್ (24) ಕೈದಾತಿನ ಆರೋಪಿಲು. ಕಂಪೆನಿಡ್ ಡ್ರೈವರ್ ಆದ್ ಬೆನೊಂದಿತ್ತಿನ ಈ ಆರೋಪಿಲು ಏಪ್ರಿಲ್ 1 ರ್ದ್ ಪ್ರಯಾಣಿಕೆರೆಡ ಗೆತೊನುನ ಕಾಸ್‌ನ್ ಸಂಸ್ಥೆದ ಅಧಿಕೃತ ಕ್ಯೂಆರ್ (QR) ಕೋಡ್‌ಗ್ ಗೆತೊನಂದೆ, ಅಕ್ಲೆನ ವೈಯಕ್ತಿಕ ಮರ್ಚೆಂಟ್ ಕ್ಯೂಆರ್ ಕೋಡ್‌ಗ್ ಗೆತೊನೊಂದಿತ್ತೆರ್. ಇಂಚ ಒಟ್ಟಾತಿನ ₹12,00,000 ಕಾಸ್‌ನ್ ಆರೋಪಿ ಮುತ್ತಣ್ಣ ಅಢೀನವರ ಆಯನ ಬೊಡೆದಿ ಐಶ್ವರ್ಯನ ಬ್ಯಾಂಕ್ ಅಕೌಂಟ್‌ಗ್ ಕಡಪುಡ್ದ್ ಕಂಪೆನಿಗ್ ನಂಬಿಕೆ ದ್ರೋಹ ಬೊಕ್ಕ ದಗೆ ಮಲ್ತ್‌ದೆರ್.
ಈ ಬಗೆಟ್ ಕಂಪೆನಿ ಬರೆಪಾದಿನ ಒಯಿಲ್‌ದ ಜಡ್ತೆ ಮಲ್ತಿನ ಮಣಿಪಾಲ ಪೊಲೀಸೆರ್, ಅಕ್ಟೋಬರ್ 2 ತಾನಿ ಆರೋಪಿಲೆನ್ ಕೈದ್ ಮಲ್ತ್‌ದ್ ನ್ಯಾಯಂತಡೆದ ಎದುರು ಲೆತೊಂದು ಪೋತೆರ್. ಎಚ್ಚಿಗೆ ಜಡ್ತೆಗ್ ಆರೋಪಿಲೆನ್ ಪೊಲೀಸ್ ಕಸ್ಟಡಿಗ್ ಗೆತೊಂದೆರ್.
maṇipāla: Dupicate QR Code galasd Company g ₹12 lakṣa dage; āji jana kaid!
maṇipāla, Oct. 05: MIT campus d jōkulu bokka pōṣakeregụ Battery gāḍida sēve korondittina ‘Indianta E Mobility’ company gụ lakṣagaṭle rūpāyi dage maldina prakaraṇogu saṁbandhitụdụ āji jana ārōpilenụ polīser kaid maltụderụ.
vijayanagara jilleda kūḍligida Siddamoorti G (29), ātrāḍida Shivaraj Nayka (30), citradurgada Sudeep (30), manjēśvarada Jithesh Kanchan (29), beḷagāvida Muttannaa Adhinavara (32) bokka bōltēr nāvūrụ da M. B. Avinash (24) kaidātina ārōpilu. Company d driver ād benondittina ī ārōpilu ēpril 1 rd prayāṇikereḍa getonuna kāsụ n saṁstheda adhikr̥ta QR Code g getonande, aklena vaiyaktika Merchant QR Code g getononditter. iñca oṭṭātina ₹12,00,000 kāsn ārōpi Muttaṇṇa Adhinavara āyana boḍedi Aishwarya na Bank Account gụ kaḍapuḍd company gụ naṁbike drōha bokka dage maltder.
ī bageṭ Company barepādina oyilda jaḍte maltina maṇipāla polīser, akṭōbar 2 tāni ārōpilen kaid maltd nyāyantaḍeda eduru letondu pōter. eccige jaḍteg ārōpilen polīs kasṭaḍig getonder.