Last updated on October 13th, 2026 at 11:35 am
ಕುಡ್ಲ, ಅ. 13: ಬೊಡೆದಿಗ್ ಅನೈತಿಕ ಸಂಬಂಧ ಉಂಡು ಪನ್ದ್ ಎನ್ನ್‌ದ್, ಕಂಡನ್ಯೆನೇ ಬೀಸತ್ತಿ ಪಾಡ್ದ್ ಭೀಕರವಾದ್ ಬೊಡೆದಿನ್ ಕೆರ್ತಿನ ನಡಪು ಕಾವೂರು ಪೊಲೀಸ್ ಸ್ಟೇಶನ್ ಸೀಮೆದ ಪಂಜಿಮೊಗೇರ್ ಗ್ರಾಮೊದ ಉರುಂಡಾಡಿಗುಡ್ಡೆ ಪನ್ಪಿನಲ್ಪ ನಡತ್‌ದ್ಂಡ್. ಮಹಾರಾಷ್ಟ್ರ ಮೂಲೊದ ಸೋನಾಲಿ (30) ತೀರ್ದಿನಾರ್. ವಿಜಯಪುರ ಜಿಲ್ಲೆ ಬಸವನ ಬಾಗೇವಾಡಿ ತಾಲೂಕ್‌ದ ಮಾರ್ಕಬನಹಳ್ಳಿದ ಶಿವಪ್ಪ ಮಾದರ್ ಪನ್ಪಿನಾರೆನ ಮಗೆ ಶಿವಲಿಂಗಪ್ಪೆ (40) ಕೈದಾತಿನ ಆರೋಪಿ. ಈ ಬಗೆಟ್ ಕುಡ್ಲ ಸಿಟಿ ಪೊಲೀಸ್ ಕಮಿಷನರ್ ಸುಧೀರ್ ಕುಮಾರ್ ರೆಡ್ಡಿ ಅಧಿಕೃತ ಒಲವು ಕೊರ್ತೆರ್.
ಕುಡ್ಲ ಪೇಂಟೆದ ಕಾವೂರು ಪೊಲೀಸ್ ಸ್ಟೇಶನ್ ಸೀಮೆದ ಪಂಜಿಮೊಗೇರ್ ಗ್ರಾಮೊದ ಉರುಂಡಾಡಿಗುಡ್ಡೆದ ಬಾಡಾಯಿದ ಇಲ್ಲಡ್ ಇತ್ತೆರ್ ಈ ದಂಪತಿ. ಅಕ್ಟೋಬರ್ 12 ತಾನಿ ಕಂಡನಿ ಬೊಡೆದಿನ ನಡುಟು ಬೊಡೆದಿನ ಅನೈತಿಕ ಸಂಬಂಧೊದ ಶಂಕೆಡ್ ಬಾರೀ ಲಡಯಿ ಆತ್ಂಡ್. ಪಾತೆರೊಗು ಪಾತೆರ ಬುಲೆದ್ ಪಿಸ್‌ರ್‌ಡ್ ಆರೋಪಿ ಶಿವಲಿಂಗಪ್ಪೆ, ಇಲ್ಲಡಿತ್ತಿನ ಬೀಸತ್ತಿಡ್ ಬೊಡೆದಿ ಸೋನಾಲಿಗ್ ತಾರಾಮರ ಕುತ್ತ್‌ದ್ ಕೆರ್ತಿನ ಪ್ರಾಥಮಿಕ ಜಡ್ತೆಡ್ ತೆರಿದ್ ಬೈದ್ಂಡ್ ಪನ್ದ್ ಪೊಲೀಸೆರ್ ತೆರಿಪಾದೆರ್.
ಈ ಭೀಕರ ನಡಪುದ ಬೆರಿಟೇ ಕಾವೂರು ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲ್ತೊಂದೆರ್. ಕಾವೂರು ಪೊಲೀಸೆರ್ ದೆಂಗ್‌ತಪ್ಪಾಯೆರೆ ತೂವೊಂದಿತ್ತಿನ ಆರೋಪಿ ಶಿವಲಿಂಗಪ್ಪನ್ ಪತ್ತ್‌ದೆರ್. ಕೈದಾತಿನ ಆರೋಪಿನ್ ನ್ಯಾಯಂತಡೆದ ಎದುರು ಲೆತೊಂದು ಪೋದಿತ್ತ್‌ದ್, ಪ್ರಕರಣೊದ ಬಗೆಟ್ ಕಾವೂರು ಪೊಲೀಸೆರ್ ಜಡ್ತೆ ಮಲ್ತೊಂದುಲ್ಲೆರ್ ಪನ್ದ್ ಪೊಲೀಸ್ ಆಯುಕ್ತೆ ಸುಧೀರ್ ಕುಮಾರ್ ರೆಡ್ಡಿ ತೆರಿಪಾಯೆರ್.