ಬೆಂಗಳೂರ್‌ದ ಪೂರ್ಣಪ್ರಜ್ಞ ವಿದ್ಯಾಪೀಠೊಡು ಪೇಜಾವರ ಸ್ವಾಮಿಲೆನ ಭೇಟಿ: ತುಳುವ ಮಹಾಸಭಾದ ನೂದು ವರ್ಸದ ಉಚ್ಚಯೊಗು ಶ್ರೀಲೆನ ಆಶೀರ್ವಾದ ಬೊಕ್ಕ ಮಾರ್ಗದರ್ಶನ

Last updated on October 30th, 2026 at 12:03 pm

ಬೆಂಗಳೂರು, ಅ. 30: ತುಳುವ ಮಹಾಸಭಾ ಇಂಟರ್ನ್ಯಾಷನಲ್ ಬೊಕ್ಕ ತುಳು ವರ್ಲ್ಡ್ ಫೌಂಡೇಶನ್‌ದ ನಿಯೋಗೊ 29 ಅಕ್ಟೋಬರ್ 2026, ಗುರುವಾರೊದಾನಿ, ಬೆಂಗಳೂರುದ ಪೂರ್ಣಪ್ರಜ್ಞ ವಿದ್ಯಾಪೀಠೊಡು ಉಡುಪಿ ಪೇಜಾವರ ಅಧೋಕ್ಷಜ ಮಠೊತ ಪರಮಪೂಜ್ಯ ಶ್ರೀ ಶ್ರೀ ಶ್ರೀ ವಿಶ್ವಪ್ರಸನ್ನ ತೀರ್ಥ ಸ್ವಾಮಿಲೆನ್ ತಿಕ್ಕ್‌ದ್ ಗೌರವಪೂರ್ವಕೊಡ್ ಬಿನ್ನಪುದೋಲೆನ್ (ವಿಜ್ಞಾಪನಾ ಪತ್ರ) ಕೊರಿಯೆರ್. ಪೂಜ್ಯ ಪೇಜಾವರ ಸ್ವಾಮಿಲು ಮಸ್ತ್ ಪ್ರೀತಿ-ವಾತ್ಸಲ್ಯೊಡು ವಿನಂತಿ ಪತ್ರೊನ್ ಸ್ವೀಕಾರ ಮಲ್ತ್‌ದ್, ತುಳು ಬಾಸೆ, ಸಂಸ್ಕೃತಿ ಬೊಕ್ಕ ತುಳುವೆರೆನ ಒತ್ತರ್ಮೆದ ಈ ಎಡ್ಡೆ ಬೇಲೆಗ್ ಆರೆನ ಬೊಕ್ಕ ಮಠೊತ ಸಂಪೂರ್ಣ ಬೆರಿತಾಂಗ್ ಬೊಕ್ಕ ಆಶೀರ್ವಾದೊದ ಪಾತೆರ ಕೊರಿಯೆರ್.

ಸಂಘಟನೆದ ಜಾಗತಿಕ ಪಯಣೊದ ಒಲವು: ಈ ಭೇಟಿದ ಪೊರ್ತುಡು ತುಳು ಮಹಾಸಭಾದ ರಾಜ್ಯಾಧ್ಯಕ್ಷೆರಾಯಿನ ಶ್ರೀ ದೇವೇಂದ್ರ ಹೆಗ್ಡೆ ಕೊಕ್ರಾಡಿ ಮೇರ್ ಸ್ವಾಮಿಲೆಗ್ ತುಳುವ ಮಹಾಸಭಾದ ಸುರುತ ಇತಿಹಾಸ, ಇತ್ತೆ ಜಾಗತಿಕ ಮಟ್ಟೊಡು ಸಾಗೊಂದುಪ್ಪುನ ಸಂಘಟನಾತ್ಮಕ ವಿಸ್ತರಣೆಲು, ಬೊಕ್ಕ ಬೇತೆ ಬೇತೆ ದೇಶ-ರಾಜ್ಯೊಲೆಡ್ ರೂಪು ಪಡೆವೊಂದುಪ್ಪುನ ಸಮಿತಿಲೆನ ಕೆಲಸ-ಕಾರ್ಯೊಲೆನ ಬಗೆಟ್ ವಿವರವಾದ್ ಒಲವು ಕೊರಿಯೆರ್. ಬರ್ಪಿನ 2028ನೇ ಇಸವಿದ ಸೆಪ್ಟೆಂಬರ್ 23ಕ್ ನಡಪರೆ ಉಪ್ಪುನ ‘ತುಳುವ ಮಹಾಸಭಾದ ಶತಮಾನೋತ್ಸವ’ದ ತಯಾರಿ ಬೊಕ್ಕ ಜಾಗತಿಕ ಮಟ್ಟದ ಯೋಜನೆಲೆನ ರೂಪುರೇಷೆನ್ ಸ್ವಾಮಿಲೆನ ದುಂಬು ದೀಯೆರ್.

ಗೌರವ ಸಲಹೆಗಾರೆರ್ ಬೊಕ್ಕ ಮಾರ್ಗದರ್ಶಕೆರ್ ಆಯೆರೆ ಬಿನ್ನಪು:
ತುಳುವ ಮಹಾಸಭಾದ ಸ್ಥಾಪಕೆರಾಯಿನ ಮಹಾತ್ಮೆ ದಿವಂಗತ ಶ್ರೀ ಶ್ರೀನಿವಾಸ ಉಪಾಧ್ಯಾಯ ಪಣಿಯಾಡಿಯೆರ್ ಡಿಪುದ ಪುಣ್ಯಭೂಮಿದಾರಾದಿತ್ತ್‌ದ್, ಅರೆನ ನೆನೆಪುಡು ಶತಮಾನೋತ್ಸವೊದ ಪರ್ಬೊನ್ ಒಡಿಪುದ ಧರ್ಮಪೀಠೊದ ಅಂಗಣೊಡೇ ನಡಪಾವುನೆ ಮಸ್ತ್ ಸೂಕ್ತವಾಯಿನವು. ಈ ಐತಿಹಾಸಿಕ ಆಚರಣೆಗ್ ಪೂಜ್ಯ ಪೇಜಾವರ ಶ್ರೀಕುಲು ‘ಗೌರವ ಸಲಹೆಗಾರೆರ್ ಬೊಕ್ಕ ದಿವ್ಯ ಮಾರ್ಗದರ್ಶಕೆರ್’ ಆದ್ ಲೇಸ್‌ದ ಗುರ್ಕಾರ್ಮೆ ದೆತೊನೊಡು ಪಂದ್ ನಿಯೋಗೊ ಶ್ರದ್ಧಾಪೂರ್ವಕೊಡು ವಿನಂತಿ ಮಲ್ತೊಂಡು.

ಸ್ವಾಮಿಲೆನ ಆಶೀರ್ವಚನ ಬೊಕ್ಕ ಭರವಸೆ:
ನಿಯೋಗದ ವಿನಂತಿಗ್ ಸ್ಪಂದನೆ ಮಲ್ತಿನ ಸ್ವಾಮಿಲು, ಒಡಿಪುಡು ನಡಪರೆ ಉಪ್ಪುನ ಶತಮಾನೋತ್ಸವ ಲೇಸ್‌ಗ್ ಶ್ರೀಮಠದ ಸಂಪೂರ್ಣ ಸಹಕಾರ ಬೊಕ್ಕ ಮಾರ್ಗದರ್ಶನ ಇಪ್ಪುಂಡು ಪನ್ದ್ ಪಾತೆರ ಕೊರಿಯೆರ್. ಅತ್ತಂದೆ ಒತ್ತುಪಾಲ್ ಇತ್ತಿನ ಮಾತಾ ಪದಾಧಿಕಾರಿಲೆಗ್ ಅನುಗ್ರಹ ಮಂತ್ರಾಕ್ಷತೆ ಕೊರ್ದು ಆಶೀರ್ವಾದ ಮಲ್ತೆರ್.

ಈ ಭೇಟಿದ ಪೊರ್ತುಡು ತುಳುವ ಮಹಾಸಭಾ ಇಂಟರ್ನ್ಯಾಷನಲ್ ಬೊಕ್ಕ ತುಳು ವರ್ಲ್ಡ್ ಫೌಂಡೇಶನ್ ನಿಯೋಗೊಡು ರಾಜ್ಯಾಧ್ಯಕ್ಷೆರಾಯಿನ ಶ್ರೀ ದೇವೇಂದ್ರ ಹೆಗ್ಡೆ ಕೊಕ್ರಾಡಿ, ರಾಜ್ಯ ಪ್ರಧಾನ ಕಾರ್ಯದರ್ಶಿ ಶ್ರೀ ಹರ್ಷೇಂದ್ರ ಜೈನ್ ಮಾಳ, ರಾಜ್ಯ ಪ್ರಧಾನ ಸಂಚಾಲಕೆರಾಯಿನ ಶ್ರೀ ಅಭಿಷೇಕ್ ಕೆ. ಕಾರ್ಕಳ, ಬೆಂಗಳೂರು ವಲಯ ಅಧ್ಯಕ್ಷೆರಾಯಿನ ಶ್ರೀ ಪುರುಷೋತ್ತಮ ಚೇಂಡ್ಲಾ, ಬೆಂಗಳೂರು ವಲಯ ಕಾರ್ಯದರ್ಶಿ ಶ್ರೀ ಶಾಂತಾರಾಮ್ ವಿ. ಶೆಟ್ಟಿ, ಬೆಂಗಳೂರು ವಲಯ ಪ್ರಧಾನ ಸಂಚಾಲಕೆರಾಯಿನ ಶ್ರೀ ಶಿವಾನಂದ ಸಾಲ್ಯಾನ್ ಬೊಕ್ಕ ಖ್ಯಾತ ಜ್ಯೋತಿಷಿ ಶ್ರೀ ಬಿ. ಎಲ್. ಸುಭಾಷ್‌ಚಂದ್ರ ಜೈನ್ ಆರ್ ಒತ್ತುಪಾಲ್ ಇತ್ತೆರ್.