Last updated on October 29th, 2026 at 12:39 pm
ಉಳ್ಳಾಲ ಅಕ್ಟೋಬರ್ 29: ಶಾಲೆಗ್ ಪೋವೊಂದಿತ್ತಿನ 9ನೇ ಕ್ಲಾಸ್‌ದ ಅಪ್ರಾಪ್ತ ಪೊಣ್ಣನ್ ಮಂಗೆ ಮಲ್ತ್ದ್ ಕಾರ್ಡ್ ಕಿಡ್ನಾಪ್‌ ಮಲ್ದಿನ ಬಾಗಲಕೋಟೆ ಮೂಲದ ಜವನನ್ ಉಳ್ಳಾಲ ಪೊಲೀಸೆರ್ ರಪಕ್ಕ ಕಾರ್ಯಾಚರಣೆ ಮಲ್ತ್ದ್ ಕೈದ್‌ ಮಲ್ತ್‌ದೆರ್. ಬಾಗಲಕೋಟೆ ಮೂಲದ, ಇತ್ತೆ ಸಾರ್ನೆದ ಬೇಲೆ ಮಲ್ತೊಂದುಪ್ಪುನ ಗೂಡಾಸಾಬ್ ಯಾನೆ ಆಶಿಫ್ (23) ಕೈದಾತಿನ ಆರೋಪಿ.
ಉಳ್ಳಾಲ ತಾಲೂಕ್‌ದ ಕಲ್ಲಾಪು ಕೈತಲ್ ಬಾಡಾಯಿದ ಇಲ್ಲಡ್‌ ಇಪ್ಪುನ ಬಾಗಲಕೋಟೆ ಮೂಲದ ಇರ್ವೆರ್ ಅಪ್ರಾಪ್ತ ಪಲಿ ಸಂಗಡಿ ಕೈತಲ್ದ ಕನ್ನಡ ಮಾಧ್ಯಮ ಶಾಲೆಡ್ ಕಲ್ತೊಂದುಲ್ಲೆರ್. ಅಂಗಾರೆ ಕಾಂಡೆ ಅಪ್ಪೆಅಮ್ಮೆ ಇರ್ವೆರ್ ಪೊಣ್ಣು ಜೀಕುಲೆನ್ಲಾ ಏಪೊಲ್ದಲೆಕ ಶಾಲೆಗೆ ಕಡಪುಡ್ದಿತ್ತೆರ್. ಆಂಡ, ಇರ್ವೆರೆದ್‌ ಒರ್ತಿ 9ನೇ ಕ್ಲಾಸ್‌ಡ್‌ ಕಲ್ತೊಂದುಪ್ಪುನ ಮಲ್ಲ ಮಗಲ್ ಶಾಲೆಗ್ ಬೈದಿಲಜ್‌ ಪನ್ದ್ ಶಾಲೆದ ಟೀಚರ್‌ ಅಪ್ಪೆ ಅಮ್ಮಗ್‌ ಫೋನ್‌ ಮಲ್ತ್‌ ತೆರಿಪಾದೆರ್. ಇಂದೆರ್ದಾವರ ಪೋಡಿನ ಇಲ್ಲದಕುಲು ಒರ್ಮೆಲಾ ನಾಡ್ಯೆರ ಪತ್ತ್‌ದೆರ್.
ನಾಪತ್ತೆ ಆತಿನ ಅಪ್ರಾಪ್ತ ಪೊಣ್ಣನ್ ಗೂಡಾಸಾಬ್ ಯಾನೆ ಆಶಿಫ್ ಶಾಲೆದ ಕೈತಲ್ ಬೆರಿಯೆ ಓಂಗೊಂದು ಬತ್ತ್‌ದ್‌ ಪಾತೆರ್ಪಾವುನೆನ್ ಪೊಣ್ಣು ದುಂಬೇ ತನ್ನ ಅಪ್ಪೆಡ ತೆರಿಪಾದಿತ್ತಲ್. ಈ ಬಗೆಟ್ ಆರೋಪಿಗ್ ಪೊಣ್ಣನ ಅಪ್ಪೆಅಮ್ಮೆ ಎಚ್ಚರ್ಗೆಲಾ ಕೊರ್ದಿತ್ತೆರ್. ಆಂಡಲಾ ಆರೋಪಿ ಅಪ್ರಾಪ್ತ ಪೊಣ್ಣನ್ ಮಂಗೆ ಮಲ್ತ್ದ್ ಕಾರ್ಡ್ ಕಿಡ್ನಾಪ್‌ ಮಲ್ತ್‌ದೆ ಪನ್ದ್ ಅರೋಪ ಮಲ್ತ್ದ್, ಪೊಣ್ಣನ ಅಪ್ಪೆ ಅಂಗಾರೆ ಬಯ್ಯಡ್ ಉಳ್ಳಾಲ ಪೊಲೀಸ್ ಪೋಲೀಸ್‌ ಸ್ಟೇಶನ್‌ಡ್‌ ಒಯಿಲ್‌ ಬರೆಪಾದೆರ್.
ಒಯಿಲ್‌ ದಾಕಲಾವೊಂದಿತ್ತಿನೇ ಉಳ್ಳಾಲ ಪೊಲೀಸೆರ್ ರಪಕ್ಕ ಕಾರ್ಯಾಚರಣೆ ಮಲ್ತ್ದ್, ಅಂಗಾರೆ ರಾತ್ರೆನೇ ಸೋಮೇಶ್ವರ ಕೈತಲ್ ಆರೋಪಿ ಗೂಡಾಸಾಬ್‌ನ್ ಉಲಕೈ ಮಲ್ತೊಂದೆರ್. ಆತೇ ಅತ್ತಂದೆ, ಕಿಡ್ನಾಪ್‌ ಆತಿನ ಅಪ್ರಾಪ್ತ ಪೊಣ್ಣನ್ ರಕ್ಷಣೆ ಮಲ್ತ್‌ದೆರ್. ಆ ಪೊಣ್ಣನ ಸ್ಟೇಟ್‌ಮೆಂಟ್ ಗೆತೊಂದಿನ ಪೊಲೀಸೆರ್, ಆರೋಪಿನ ಮಿತ್ತ್ ಪ್ರಕರಣ ದಾಕಲ್ತೊಂದು ನ್ಯಾಯಂತಡೆದ ಎದುರು ಲೆತೊಂದು ಪೋತೆರ್.
Ullala: Shaaleg Povondittina 9ne Class-da Ponnan Kidnap Maltina Bagalakoteda Kaarmike
Ullala, October 29: Shaaleg povondittina 9ne class-da apraptha ponnan mange malt’d car-d kidnap maltina Bagalakote moolada javanen Ullala police’r rapakka kaaryaacharane malt’d kaid maltder. Bagalakote moolada, itte saarneda beele maltonduppuna Goodasab yane Ashif (23) kaidaatina aaropi.
Ullala talukda Kallapu Kaithal Badaayida illad ippuna Bagalakote moolada irver apraptha pali sangadi Kaithalda Kannada medium shaaled kaltonduller. Angaare kaande appe-amme irver ponnujikulenla eppoladale shaaleg kadapudittder. Aanda, irvered orti 9ne class-d kaltonduppuna malla magal shaaleg baidilaj pand shaaled teacher appe-ammag phone malt teripaader. Inderdaavara podina illadakulu ormelala naadyere pattder.
Naapatte aatina apraptha ponnan Goodasab yane Ashif shaaled kaithal beriye ongond battd paaterpaavunene ponnu dumbe than appeḍ teripaadittal. Ee baget aaropig ponnana appe-amme echcharga korittder. Aandala aaropi apraptha ponnan mange malt’d car-d kidnap maltde pand aaropa malt’d, ponnana appe angaare bayyad Ullala Police Station-d complaint barepaader.
Complaint daaklaavondittine Ullala police’r rapakka kaaryaacharanene malt’d, angaare raatre-ne Someshwara kaithal aaropi Goodasab-n ulakai maltonder. Aate attanda, kidnap aatina apraptha ponnan rakshane maltder. Aa ponnana statement getondina police’r, aaropina mitth prakaran daakalthond nyaayaalayada eduru lettond poter.