Last updated on December 12th, 2022 at 08:05 pm
ತುಳುನಾಡ್ದ ತಮೆರಿ ಒವ್ ಪನ್ದ್ ಕೇನ್ಡ ಅವ್ ತುಳುವೆರೆ ನಂಬೊಲಿಗೆದ ನೆಲ ಮೂಲದ, ಜಲ ಮೂಲದ, ಸೂತಲೆಕ್ಕ ಸುದ್ದದ, ಮಣ್ಣ ಮರಿತ ಸೇಂಕೆದ ದೈವಾರಾಧನೆ. ದೈವಾರಾಧನೆದ ಮೂಲ ಚೌಕಟ್ಟ್ ಡ್ ಬರ್ಪಿ ಕಟ್ಟಲೆಲೆಗ್ ಅವೆತನೇ ಆಯಿನ ಮಾನಾದಿಗೆ ಉಂಡು. ಆ ಕಟ್ಟಲೆದ ಉಲಯಿ ಜಾತಿ ನೀತಿ, ಸತ್ಯ ಧರ್ಮದ ನಿಲೆಟ್, ಪಾಡ್ದನ-ಮದಿಪು-ಪಾರಿ-ತೆಂಬರೆ-ಗಗ್ಗರ-ಸಿರಿತ ದುನಿಪುಗು ಮುಕ್ಕಾಲ್ ಮೂಜಿ ಗಲಿಗೆಡ್ ಮಾಣಿನ ಎಚ್ಚಿಡ್ ಉದಿತ್ ಬರ್ಪಿನಿ ದೈವೊಲು ಗೊಬ್ಬುನದ ಪಾಪೆಲು ಅತ್ತ್.
ದೈವಾಲಯದ ಕಟ್ಟಲೆಗ್ ಪರಿಧಿ ಪಾಡ್ದ್ ಅಲ್ಪ ಅವ್ವೇ ಪಾಡೊಡು ಪನಿಬೊಕ್ಕ, ದೈವೊಲೆನ ನಂಬೊಲಿಗೆದ ಕಟ್ಟಲೆಲೆಗ್ ದಾಯೆಗ್ ಪರಿಧಿ ಇಜ್ಜಿ? ಕೊಡಿಯಡಿಟ್ ಬರ್ಪಿನ ದೈವೊಲು ಮಾಣಿನ ತಾರ್ಕಿಕೊಡು ಮಾತ್ರ ಅತ್ತಂದೆ ನಾಲಯಿದ ಸುದ್ದೊಡುಲ, ಉಡಲ ಭಕ್ತಿಡ್ಲಾ ಬರ್ಪಿನಾಂಡ, ದೈವ ಚಾರಿಕಿದ ಪದಿನಾಜಿ ವರ್ಗೊಗು ಸಾಮಾಜಿಕ ಜವಾಬ್ದಾರಿ ಇಜ್ಜಾ?
ಇಂಚಪ್ಪೊಗು ಕಾಂತಾರ ಪನ್ಪಿನ ಪಿಚ್ಚರ್ ಬತ್ತ್ಂಡ್, ಬತ್ತ್ ದ್ ಅಗತ್ಂಡ್. ದೈವೊಲೆನ ಬಗೆಟ್ ಒರ ದಿಡ್ಕ ಲಕ್ಕಾವುನಲೆಕ್ಕ ಮಲ್ತ್ಂಡ್ ಆಂಡ ಆತೇ ದೈವೊಲೆನ ದುರುಪಯೋಗ ಆಪಿಲೆಕ್ಕಲಾ ಮಲ್ತ್ಂಡ್. ಪಿಚ್ಚರ್ದಕುಲು ‘ಉಂದೆಟ್ ಬರ್ಪಿನ ಏಸ ಆವಡ್ ದೈವದ ಹಾವಭಾವ ಆವಡ್ ಏರ್ಲಾ ಅನುಕರಣೆ ಮಲ್ಪರೆ ಬಲ್ಲಿ, ಉಂದು ಈ ದೈವೊಲೆನ್ ನಂಬುನ ಒಂಜಿ ಮಲ್ಲ ಸಮಾಜೊಗು ಬೇನೆ ಕೊರ್ಪುಂಡು’ ಪನ್ದ್ ಒಲ್ಪಲಾ ಪಿಚ್ಚರ್ಡ್ ಸೂಚನೆ ಕೊರ್ತುಜೆರ್. ಉಂದೆರ್ದಾವರ ಏರೇರ್ ಏಸ ಪಾಡೊಂದು,ಅರದಲ ಪೂಜೊಂದು, ಸಿರಿ ಕಟ್ಟೊಂದು, ಜೀಟಿಗೆ ಪತ್ತೊಂದು ನಲ್ಪುಲೆಕ್ಕ ಆತ್ಂಡ್.
ಪಿಚ್ಚರ್ ಮಲ್ತಿನಕಲೆಗ್ ಉಂದೊಂಜಿ ಬೇರ ಆತೇ, ಆಂಡ ನಂಬೊಲಿಗೆ ತುಳುವೆರೆಗ್ಲಾ ಬೇರ ಆಂಡಾ? ಕುಡ ಕಾಂತಾರ-2 ಮಲ್ಪೊಡಾ ಪನ್ದ್ ದೈವದ ಕೇಂಡ್ ಗೆ ದೈವ ಕುಡುಮೊಡು ಕೇನ್ಲೆ ಪಂಡೆಗೆ. ಉಂದು ಸಮ ಪನ್ದ್ ಏರೆಗ್ ತೋಜುಂಡು? ಅಪಗಾಂಡ ನನ ಏರ್ಲಾ ದಾಲ ಒವ್ ಸ್ಟೇಜಿಡ್ ದೈವದ ಅನುಕರಣೆ ಮಲ್ತ್ಂಡಲ ತುಳುವೆರ್ ಬೊಬ್ಬೆ ಪಾಡರೆ ಬಲ್ಲಿ! ಮಲ್ಲಾಯಗ್ ಒಂಜಿ ನ್ಯಾಯ ಪಾಪದಾಯಗ್ ಒಂಜಿ ನ್ಯಾಯ ಆವರೆ ಬಲ್ಲಿ.
ಎಂಕಲೆನಲ್ಪ ಬಬ್ಬು ಸ್ವಾಮಿನ ವರ್ಸಲ ಕೋಲ ಆಪುಂಡು ಅಲ್ಪ ಯಾನ್ ತೂಯಿನಿ ಕೋಲ ಕಟ್ಟುನ ನಲಿಕೆದರೆನ ನಿಷ್ಟೆ. ಅರೆನ ಬಾಯಿಡ್ ಒಂಜೇ ಪಾತೆರ ಬರ್ಪಿನಿ ಬಬ್ಬುಗು ಮಲ್ಲಾಯೆ ಎಲ್ಯಾಯೆ ಮಾತಲಾ ಒಂಜೇ, ಎಲ್ಲೆ ಯಾನ್ ಕೊರಿನ ನುಡಿ ಬಬ್ಬುನ ಪುದರ್ಡ್ ಪೋಪುಂಡು ಅಂಚಾದ್ ಮಣ್ಣ್ ಗ್ ಅಪಚಾರ, ತುಳುನಾಡ ದೈವ ಕಟ್ಟ್ ಗ್ ಅಪಚಾರ, ಪೊಸತ್ ತೋಡುನಂಚಿನ ನುಡಿ ಕೊರಯೆ ಪನ್ದ್. ಆ ನಿಷ್ಟೆ ಇತ್ತೆ ಕೆಲವೆರೆಡ ತೋಜುಜಿ.
ಒರಿ ಮಾನವೆ ದೈವದ ಅರದಲ ಪೂಜಿದ್, ಕಡ್ಸಲೆ ಪತ್ತೊಂದು, ಮೊಗ ಏರ್ದ್ ಬನ್ನಗ ಆಯೆ ಮಾನವೆ ಆದಿಪ್ಪುಜೆ, ತುಳುವೆರೆಗ್ ಆಯೆ ಅಪ್ಪೆ ತಮ್ಮಲೆ ತಮೆರಿದ ದೈವ ಆಪೆ. ನೇಮ ಕಟ್ಟಿನ ಮಣ್ಣ್ ದ ಕಲತ ಕಾರ್ನಿಕ ಮೆರೆಪಾವುನ ಒರಿ ಸುಧಾರಕೆ ಆಪೆ. ಅಂಚಾದುಪ್ಪುನಗ ದಾದ ನುಡಿ ಕೊರ್ಪ ಪನ್ಪಿನ ಜವಾಬ್ದಾರಿದ ಮಿತ್ತ್ ನುಡಿಪೊಡು, ದಾಯೆಗ್ ಪಂಡ ಎಲ್ಲೆ ಅವ್ ಏರ್ಲಾ ಪಂಬದೆ-ಪರವೆ-ನಲಿಕೆದಾರ್-ಪೂಜಾರಿ ನುಡಿತಿನಿ ಪನ್ಪುಜೆರ್. ಅವ್ ಜುಮಾದಿ, ಪಂಜುರ್ಲಿ, ಬಬ್ಬು ನುಡಿಯಿನಿ ಅವ್ವೇ ತುಳುವೆರೆಗ್ ಶಾಸನ.
ದೈವದ ಕೋಲ, ಮಾಣ್ಯೆಚ್ಚಿದ ಅನುಕರಣೆ ಸ್ಟೇಜಿಡ್ ಮಲ್ಪರೆ ಬಲ್ಲಿ ಪನ್ದ್ ತುಳುನಾಡ್ ಡ್ ಅಲಿಖಿತ ನಿಯಮ ಇತ್ತ್ಂಡ್. ಅಂಚಾದ್ ಅವ್ ಪೂರಾ ಉಂತುದಿತ್ತ್ಂಡ್. ಆಂಡ ಕಾಂತಾರ ಬತ್ತಿಬೊಕ್ಕ ಗಟ್ಟದಕಲೆರ್ದ್ ಪತ್ತಿನ, ತೆಲುಗುದಕುಲು, ಹಿಂದಿದಕುಲು ಏಸ ಪಾಡೊಂದು ಬತ್ತಿನ ತೂಯ. ಉಂದೆನ್ ತೂನಗ ನಿಕಲೆನ ನಂಬೊಲಿಗೆ ಪುಲೆಯುಜಾ? ನೆತ್ತೆರ್ ಕೊದ್ಯುಜಾ ಕಡೇಕ್ ಬೆಸರಾಂಡಲ ಆಪುಜಾ? ನಿಕುಲು ರಡ್ಡ್ ಕೈ ನೀಡ್ ದ್, ಸೆರಂಗ್ ನೀಡ್ ದ್ ಅಪ್ಪೆ ದೈವನೇ ಪನ್ದ್ ನಂಬುನೆನ್ ಜನಕುಲು ಇಂಚ ಕೋಂಗಿ ಕಟ್ಟುನೆನ್ ತೂನಗ ದಾಲಾ ಆಪುಜಾ?
ದೈವೊಗು ಅಪಮಾನ ಆಂಡ್, ಅನಾಚಾರ ಆಂಡ್ ಪನ್ದ್ ಬೊಕ್ಕ ದೊಂಡೆ ಪುಲೆಯುಲೆಕ್ಕ ಕಲ್ಕುನೆರ್ದ್ ಉಂದು ಪೂರಾ ದಾಯೆಗ್ ಆಂಡ್ ಪನ್ದ್ ಒರ ಗೆರೆಪುಲೆ. ಉಂದು ಉಂತೊಡು, ನನ ದುಂಬಗ್ ದೈವೊಲು ಕೊಡಿಯಡ್ ಬುಡ್ದ್ ಜಪ್ಪರೆ ಬಲ್ಲಿ. ಮಲ್ಲ ಮಲ್ಲ ದೈವ ವಿಮರ್ಶಕೆರ್, ಜಾನಪದ ವಿದ್ವಾಂಸೆರ್ ಪನ್ದ್ ತಿರುಗುನಕುಲು ರಡ್ಡ್ ನಾಲಯಿಡ್ ಪಾತೆರಿಯರೆ ಬಲ್ಲಿ. ಎಲ್ಯಾಯಗ್ ಎಂಚ ನ್ಯಾಯ ಅಪಚಾರ ಪಾತೆರುವರಾ ಅಂಚೆನೆ ಮಲ್ಲಕಲೆಗ್, ಮುಂಡಸ್ದಕಲೆಗ್, ಕಾಸ್ದಕಲೆಗ್ಲಾ ಪನ್ಲೆ. ಒಂಜಿ ವೇಳೆ ಪನ್ಜರ್ಡ ಎಲ್ಲೆ ಮಾದ್ರೆಂಗಿಗ್ ಡಿ.ಜೆ ಪಾಡ್ದ್ ಗಗ್ಗರ ಪತೊಂದು, ಸಿರಿ ಕಟ್ಟ್ ದ್ ನಲ್ತೆರ್ಡ ಅವೆನ್ ತಡೆಪುನ ನೈತಿಕತೆ ನಿಕಲೆಗ್ ಇಜ್ಜಿ. ಅಕುಲೆಗ್ ಮಲ್ಪರೆ ಬುಡಿಯರ್ ಎಂಕುಲು ದಾಯೆ ಮಲ್ಪರೆ ಬಲ್ಲಿ ಪಂಡ ದಾದ ಸದು ಕೊರ್ಪರ್?
ಕಡೆಕಾದ್ ತುಳುವೆರೆ ನೆಂಪು ದೀಲೆ, ಇನಿ ತುಳುನಾಡ್ ಒರಿದ್ಂಡ, ತುಳುವೆರೆಡ್ ಸಭ್ಯ ಸಂಸ್ಕೃತಿ ಒರಿದ್ಂಡ ಅವೆತ ಬೇರ್ ದೈವಾರಾಧನೆಡ್ ಉಂಡು. ಉಂದು ಅಜೆ ತತ್ತ್ಂಡ ಎಲ್ಲೆ ತಮೆರಿದಾಂತಿ ಬೇಲಿದ ತೂನ ಆವು ತುಳುನಾಡ್. ಸೂತೊಟ್ಟುಗು ಗೊಬ್ಬಡೆ, ಮರಿ ಮಣ್ಣ್ ಕೊಡಪುಲೆಕ್ಕ ಮಲ್ಪಡೆ, ಜೀಟೆಗೆ ಮಾಡ ಪೊತ್ತಾವುಲೆಕ್ಕ ಮಲ್ಪಡೆ, ಕಡ್ಸಲೆ ನೆಲಕ್ ಊರಾವಡೆ. ಮಣ್ಣ್ ತುಚ್ಚಿಂಡ ಮಾನಿ ಸಂತಾನ ಮುತ್ತುದು ಪೋವು.
