Last updated on December 20th, 2022 at 03:00 pm
ಡಿಸೆಂಬರ್ 18, 2022 ನೇ ಐತಾರದಾನಿ ದೂರೊದ ಅರ್ಜೆಂಟೀನಾ ಬೊಕ್ಕ ಫ್ರಾನ್ಸ್ ದೇಶೊಲೆನ ನಡುಟು ಫೀಫಾ ವಿಶ್ವಕಪ್‌ದ ಫೈನಲ್ ಫುಟ್ಬಾಲ್ ಗೊಬ್ಬು ಇತ್ತ್ಂಡ್. ಗೊಬ್ಬು ಸಮ ಸಮ ಆದ್ ಪಿರ ಪೆನಾಲ್ಟಿ ಮುಟ್ಟ ಪೋದಿತ್ತಿನ ಈ ಗೊಬ್ಬು ಅರ್ತಿಕಾರೆರೆಗ್ ತಮ್ಮನದ ವನಸ್‌ರ್ದ್ ಕಮ್ಮಿ ಇತ್ತಿಜಿ.
ಈ ಕತೆ ಈತೆಟೇ ಉಂತುದುಂಡ ಮಲ್ಲೆ ಇಜ್ಜಂಡ್, ಆಂಡ ಕಾಂತಾರ ಪನ್ಪಿ ಒಂಜಿ ಪಿಚ್ಚರ್‌ರ್ದಾವರ ನಮ್ಮ ಸಂಸ್ಕೃತಿಗ್ ಆವೊಂದುಪ್ಪುನ ಅಪಚಾರೊಲು ಫುಟ್ಬಾಲ್‌ದ ಕಲ ಮುಟ್ಟಲಾ ಎತ್ತ್‌ದ್ಂಡ್.
ಕಾಂತಾರ ಪಿಚ್ಚರ್‌ದ ಕಡೆಟ್ ದೈವೊದ ಒರು ಬತ್ತ್‌ದ್ ಬೂರ್ದಿತ್ತಿನ ಹೀರೋನ ಬರಿಟ್ ಕಲ್ಕುನ ಸೀನ್‌ನ್ ಎಡಿಟ್ ಮಲ್ತ್‌ದ್ ಆ ಜಾಗೆಲೆಡ್ ಲಿಯೋನೆಲ್ ಮೆಸ್ಸಿ ಬೊಕ್ಕ ಡಿಯಾಗೋ ಮರಡೋನಾ ಪನ್ಪಿ ರಡ್ಡ್ ಫುಟ್ಬಾಲ್ ಗೊಬ್ಬುಗಾರೆರೆ ಫೋಟೋ ಗೋಡ್ಯಾದ್ ತುಳುವೆರೆ ಸಂಸ್ಕೃತಿಗ್, ತುಳುವೆರೆಗ್ ಮಕ್ಕರ್ ಮನ್ಪುಲೆಕ ಉಲಬಲೆಟ್ ಪಟ್ಟೊಂದುಲ್ಲೆರ್.
ಪೊಕ್ಕಡೆ ಪೊಕ್ಕಡೆ ದೈವೊಲ್ನ ಪುದರ್ ದೆಪ್ಪೆರೆ ಪೋಡ್ಯೆದಿನ ಕಾಲ ಇತ್ತ್ಂಡ್. ಇತ್ತೆ ಕಾಲ ಬದಲಾತ್ಂಡ್. ಕೊಡಿಯಡಿಕ್ ಪೋದು ಸ್ವಾಮಿ ದೈವೊಲೆ ಪಂದ್ ಪತ್ತ್ ಬಿರೆಲ್ ಒಪ್ಪ ಮಲ್ತ್ ಭಗ್ತಿಡ್ ತರೆ ತಗ್ಗಾದ್ ಕೊರಿ ಪುರ್ಸಾದ ನಟ್ಟೊಂಡ ಯಾರುಜಿ. ದೈವೊದ ನಲಿಕೆನ್ ಮೊಬೈಲ್‌ಡ್ ಶೂಟ್ ಮಲ್ತ್‌ದ್ ನಾಲ್ ಜಿಗಿಜಿಗಿ ಎಡಿಟ್ ಮಲ್ತ್‌ದ್, ಅವೆಕೊಂಜಿ ಡಿಜೆ ನಾ, ವರಾಹರೂಪಂ ಪದೊನಾ ಪಾಡ್ದ್ ಸ್ಟೇಟಸ್ ಪಾಡಿಜಿಂಡ, ರೀಲ್ಸ್ ಮಲ್ತಿಜಿಂಡ ನೇಮದಡೆ ಪೋಯಿಲೆಕ್ಕಾಪುಜಿ.
ಏಪ ಮುಟ್ಟ ತುಳುವೆರ್ ಈ ಒಂಜಿ ಪರ್ಕಟ್ ಬುದ್ದಿ ಬುಡ್ಪುಜೆರಾ, ಅಡೆ ಮುಟ್ಟ ನಮಕ್ ಪಿದಯಿದಕುಲು ಮನ್ಪುನ ಆನಾಚಾರೊಲೆನ ಎದುರು ಪಾತೆರ್ಯೆರ ನೈತಿಕವಾದ್ ಒವ್ವೇ ಹಕ್ಕ್ ಇಪ್ಪುಜಿ. ಅಂಚ ಪಂದ್ ಕಣ್ಣೆದುರು ನಮ್ಮ ಸಂಸ್ಕೃತಿ ಆಚರಣೆಲೆಗ್ ಆಪಿನ ಅನ್ಯಾಯ ಅನಾಚಾರೊಲೆನ ಬಗ್ಗೆ ಸೊರ ದೆರ್ಪುನ ತುಳುವೆರಾಯಿನ ಮಾತೆರೆನಲಾ ಕರ್ತವ್ಯ.
ನಮ ದೈವೊಲೆನ್ ಸೋಷಿಯಲ್ ಮೀಡಿಯಾಗ್ ಕನತಿನೆಟ್ ಇನಿ ಘಟ್ಟೊದ ಮಿತ್ತ್ ನಮ್ಮ ದೈವೊಲ್ನ ಪುದರ್‌ಡ್ ಬೊರ್ಚಂದಿನ ಬೇಲೆಲು ನಡತೊಂದುಲ್ಲ, ಛದ್ಮವೇಷೊಗ್ಲಾ ದೈವಾರಾಧನೆ ಎತ್ತ್‌ದ್ಂಡ್, ಮಲ್ಲ ಸ್ಟೇಜ್‌ಲೆನ ರಂಗ್ ಎಚ್ಚಯೆರ ಒಂಜಿ ಬರಿಟ್ ಆಟೊದ ಕುಡೊಂಜಿ ಬರಿಟ್ ಭೂತೊದ ಒರು ಬೋಡೆ. ಈತ್ ಯಾರಂದಿನೆಕ್ ಇತ್ತೆ ಒವ್ವಾ ಪರದೇಸೊದಕ್ಲೆನ ಮೀಮ್, ಟ್ರೋಲ್‌ಗ್ ಲೈಕ್ಸ್, ವೀವ್ಸ್ ಬರ್ರ ನಮ್ಮ ಆಚರಣೆಲು ಬೋಡಾಂಡ್.
ಉಂದು ಮಾತ ಏಪ ಉಂತೆರೆ? ತುಳುವೆರ್ ತನ್ಕುಲೆನ್ ಮಾರೊನುನೆನ್ ಏಪ ಉಂತಾಯೆರೆ?