ಮೂಲ್ಕಿ- ಕೆರೆಕಾಡ್ ಗ್ರಾಮಸ್ಥೆರೆರ್ದ್ ಪೊಲೀಸ್ ಸ್ಟೇಷನ್ಗ್ ಮುತ್ತಿಗೆ

Last updated on December 21st, 2022 at 05:35 pm

ಮೂಲ್ಕಿ- ಕರಿನ ಕೆಲವು ದಿನೊತ ಪಿರವು ಮುಲ್ಕಿ ಪೊಲೀಸ್ ಠಾಣಾ ವ್ಯಾಪ್ತಿದ ಕೆರೆಕಾಡ್ ಪನ್ಪಿನವುಲು ಆರೋಪಿ ಹಳೆಯಂಗಡಿ ಇಂದಿರಾ ನಗರದ ನಿವಾಸಿ ದಾವುದ್ ಹಕೀಮ್ ಪನ್ಪಿನಾಯೆ ಅಪ್ರಾಪ್ತ ಪೊಣ್ಣನೊಟ್ಟುಗು ಅಸಭ್ಯವಾದ್ ನಡತೊನಿನ ಪ್ರಕರಣೊದ ಬಗೆಟ್ ಮುಲ್ಕಿ ಪೊಲೀಸೆರ್ ಪ್ರಕರಣದ ತನಿಖೆಡ್ ತಾರತಮ್ಯ ಮಲ್ತೊಂದುಲ್ಲೆರ್ ಪನ್ದ್ ಆರೋಪ ಮಲ್ತ್ ಕೆರೆಕಾಡ್ ಗ್ರಾಮಸ್ಥೆರ್ ಮುಲ್ಕಿ ಪೊಲೀಸ್ ಠಾಣೆಗೆ ಮುತ್ತಿಗೆ ಪಾಡ್ದ್ ಪಿಸಿರ್ ತೂಪಾಯೆರ್. ಪ್ರತಿಭಟನಾಕಾರೆರ್ ಮುಲ್ಕಿ ಪೊಲೀಸ್ ಇನ್ಸ್ಪೆಕ್ಟರ್ ಕುಸುಮಾದಾರ್ ಮೆರೆಡ ಒಯಿಲ್ ಕೊರಿಯೆರ್.

ಪ್ರತಿಭಟನೆಡಿತ್ತಿನ ಪೊಂಜೊವುಲು ಪಾತೆರ್ದ್ ಪೊಣ್ಣಡ ಅಸಭ್ಯವಾದ್ ನಡತೊನಿನ ಆರೋಪಿನ ವಿರುದ್ಧ ಕಠಿಣ ಕ್ರಮ ಕೈಕೊರೊಡು ಅಂಚೆನೆ ಬೆಳ್ಳಾಯರ್ ಪಡು ಪಣಂಬೂರು, ಕಲ್ಲಾಪು, ಜಾಗೊಲೆಡ್ ಕರಿನ ಕೆಲವು ತಿಂಗೊಲುರ್ದ್ ದುಷ್ಕರ್ಮಿಲೆರ್ದ್ ಅಸಭ್ಯ ವರ್ತನೆದಂಚಿನ ಅಹಿತಕರ ನಡಕೆ ನಡತೊಂದುಂಡು, ಪೋಡಿದ್ ಬದುಕುನ ಪರಿಸ್ಥಿತಿ ಬೈದ್ಂಡ್. ಇತ್ತೆನೇ ಮುಲ್ಕಿ ಪೊಲೀಸೆರ್ ಕಾರ್ಯಪ್ರವತ್ತರಾದ್ ಆರೋಪಿಲೆನ್ ಪತ್ತ್ ದ್ ಕಠಿಣ ಕ್ರಮ ದೆತೊನೊಡು ಪನ್ದ್ ಪಂಡೆರ್. ಈ ಪೊರ್ತುಡು ಮುಲ್ಕಿ ಮೂಡಬಿದಿರೆ ಕ್ಷೇತ್ರ ಸಮಿತಿ ಬಿಜೆಪಿ ಗುರ್ಕಾರೆ ಸುನೀಲ್ ಅಳ್ವ, ಸತೀಶ್ ಅಂಚನ್, ಶೈಲೇಶ್, ವಿನೋದ್ ಕುಮಾರ್, ಹಿಂದು ಜಾಗರಣ ವೇದಿಕೆದ ಬಾಲಕೃಷ್ಣ ಮುಂಚೂರು, ಸಮಿತ್ ರಾಜ್ ದರೆಗುಡ್ಡೆ, ಪುಷ್ಪರಾಜ್ ಕುಳಾಯಿ, ಸಂದೀಪ್ ಹೆಗ್ಡೆ, ಪೂರ್ಣಿಮಾ ಹಳೆಯಂಗಡಿ,ಚಂದ್ರಕಲಾ ಹಳೆಯಂಗಡಿ ಬಾಕಿದಕುಲು ಇತ್ತೆರ್.