ಪುಗಾರ್ತೆದ ಬರವುಗಾರ್ತಿ ಸಾರಾ ಅಬೂಬಕ್ಕರ್ ತೀರಿಯೆರ್

Last updated on January 10th, 2023 at 03:53 pm

ಪುಗಾರ್ತೆದ ಕನ್ನಡ ಬರವುಗಾರ್ತಿ ನಮ್ಮ ತುಳುನಾಡ್’ದಾರಾಯಿನ ಸಾರಾ ಅಬೂಬಕ್ಕರ್ ತೀರಿಯೆರ್. ಅರೆಗ್ 86 ವರ್ಸ ಪಿರಯ ಆದಿತ್ತ್ಂಡ್. ಅಂಗಾರೆ ಮದ್ಯಾಹ್ನ 1 ಗಂಟೆಗ್ ಕಾಸಾಗಿ ಆಸ್ಪತ್ರೆಡ್ ತೀರಿಯೆರ್. ಮೇರ್ ಕುಡ್ಲದ ಹ್ಯಾಟ್ ಹಿಲ್ ದಲ್ಪ ಬದುಕೊಂದಿತ್ತೆರ್. ನಾಲ್ ಆನ್ ಜೋಕುಲು ಅಂಚೆನೆ ಸಾರ ಸಾರ ಅಭಿಮಾನಿಲೆನ್ ಬುಡ್ದ್ ಪೋಯೆರ್.

ಕಾಸ್ರೋಡುದ ಮಲಯಾಳಂ ಪಾತೆರುನ ಕುಟುಮೊಡು ವಕೀಲೆರಾದಿತ್ತಿನ ಪಿ.ಅಹಮದ್ ಬೊಕ್ಕ ಝೈನಬಿ ಪನ್ಪಿ ದಂಪತಿಗ್ ಜೂನ್ 30, 1936 ಟ್ಟ್ ಮೇರ್ ಪುಟ್ಟಿಯೆರ್. ಮೆರೆನ ಸುರುತ ಕಾದಂಬರಿ ‘ಚಂದ್ರಗಿರಿಯ ತೀರದಲ್ಲಿ’ ಬಾರೀ ಪುಗಾರ್ತೆನ್ ಪಡೆದಿತ್ತ್ಂಡ್. ಮೇರ್ ಕಾದಂಬರಿ, ಕತಾಸಂಕಲನ, ನಾಟಕ, ಪ್ರವಾಸಕತನ ಇಂಚಿನ ಸುಮಾರ್ ಮಸ್ತಿರಿಲೆನ್ ಬರೆತೆರ್. ಮೇರ್ ತನ್ನ ಬರವುಡು ಮುಸ್ಲಿಂಮೆರೆನ ಕೆಲವು ಸಂಪ್ರದಾಯೊಲೆನ್ ಟೀಕೆ ಮಲ್ತೊಂದಿತ್ತೆರ್.

ಮೆರೆಗ್ ಸುಮಾರ್ ಪ್ರಶಸ್ತಿಲು ಬೈದ, ಅವೆಟ್ ಕರ್ನಾಟಕ ಸಾಹಿತ್ಯ ಅಕಾಡೆಮಿ, ದಾನ ಚಿಂತಾಮಣಿ ಅತ್ತಿಮಬ್ಬೆ ಪ್ರಶಸ್ತಿಲಾ ಸೇರ್ದ್ಂಡ್.

ಮೆರೆನ ಕಡೆತ ಕಾರ್ಯ ರಾತ್ರೆ 8 ಗಂಟೆಗ್ ನಡಪುಂಡು. ಅದಮುಟ್ಟ ಕುಡ್ಲದ ಅರೆನ ಇಲ್ಲಡ್ ಸಾರ್ವಜನಿಕೆರೆ ದರ್ಶನೊಗು ದೀಪೆರ್ಗೆ.