Last updated on January 20th, 2023 at 05:07 pm
ಏಪೊಲಾ ಒಂಜತ್ತಂಡೊಂಜಿ ವಿವಾದೊಲೆನ ಮೆಯಿಕ್ ಒಯಿತ್ ಪಾಡೊನ್ನ ಪ್ರೊ. ಕೆ. ಎಸ್. ಭಗವಾನ್ ಒಂತೆ ಮನಿಪಂದೆ ಆದಿತ್ತೆರ್. ಆಂಡ ಇತ್ತೆ ಪಿರ ಬಾಯಿಗ್ ಬತ್ತಿಲೆಕ ಪಾತೆರ್ರ ಸುರು ಮಲ್ದಿನ ಭಗವಾನ್ ಶ್ರೀರಾಮೆರ್ ಬೊಕ್ಕ ಅಪ್ಪೆ ಸೀತೆನ ಬಗ್ಗೆ ಬೊರ್ಚಂದಿನ ಪಾತೆರ್ದೆರ್.
ರಾಮರಾಜ್ಯ ಪಂದ್ ದೇಶೊಡು ಕತೆ ಕಟ್ಟ್‌ದೆರ್. ರಾಮರಾಜ್ಯ ಪನ್ಪಿ ಶಬ್ದ ಗೊತ್ತಾಯೆರ ಮಹಾತ್ಮ ಗಾಂಧಿ ಕಾರಣ. ವಾಲ್ಮೀಕಿ ರಾಮಾಯಣ ಉತ್ತರ ಕಾಂಡ ಓದ್ಂಡ ರಾಮರಾಜ್ಯೊಗು ಅರ್ಥನೇ ಇಜ್ಜಿ ಪಂದ್ ಮಂಡ್ಯ ಜಿಲ್ಲೆದ ಕೆ.ಆರ್.ಪೇಂಟೆಡ್ ನಡತಿನ ಪುಸ್ತಕ ಕಜ್ಜೊಡು ವಿವಾದಾತ್ಮಕ ಪಾತೆರ ಪಂತೆರ್.
ರಾಮೆ ರಾಜ್ಯಭಾರ ಮಲ್ದಿನ ಕಾಲಿ 11 ವರ್ಸ. ಆ ಪೊರ್ತುಡ್ಲಾ ದಾಲ ಮಲ್ದಿಜೆ. ಭಟ್ರೆನಕ್ಲೆ ಒಟ್ಟು ಕುಲೊಂದು ಆ ಕತೆ ಈ ಕತೆಂದ್ ಪಟ್ಟಾಂಗ ಪಾಡೊಂದಿತ್ತೆ. ಮದ್ಯಾನ ಆನಗ ಸೀತೆನ ಒಟ್ಟು ಕುಲೊಂದು ಗಂಗಸರ ಪರೊಂದಿತ್ತೆ. ಸೀತೆಗ್ಲಾ ಪರ್ಪವೊಂದಿತ್ತೆ. ವಾಲ್ಮೀಕಿ ರಾಮಾಯಣೊದ ಉತ್ತರ ಕಾಂಡೊಡು ನೆತ್ತ ಪೊಲಬು ತಿಕ್ಕುಂಡು. ಬಂಜಿನಾಲ್ ಸೀತೆನ್ ರಾಮೆ ಕಾಡ್‌ಗ್ ಕಡಪುಡ್ದೆ, ಆಲೆನ್ ಪಾತೆರ್ಯೆರಲಾ ಬುಡೊಂದಿಜ್ಜಂಡ್ ಪಂದ್ ಮಾತ ಪಂತೆರ್.
ಈತೆಟ್ ಉಂತಂದೆ, ಲಕ್ಷ್ಮಣನ್ ರಾಮೆ ಗಡಿಪಾರ್ ಮಲ್ತೆ, ಸರಯೂ ಸುದೆತ ಬರಿಟ್ ಬುಲ್ತೊಂದು ಲಕ್ಷ್ಮಣೆ ಜೂವ ಬುಡ್ಯೆ. ರಾಮೆ ಶೂದ್ರನ ತರೆ ಕಡ್ತಿನಾಯೆ, ಆಯನ್ ಆದರ್ಶ ರಾಜೆ ಂದ್ ಎಂಚ ಪನರಾಪುಂಡು. ಜನೊಕ್ಲೆಗ್ ಸತ್ಯ ಗೊತ್ತುಜ್ಜಂದೆ ಜೋಕುಲೆಗ್ ರಾಮ ರಾಮಂದ್ ಪುದರ್ ದೀಪೆರ್. ಬೊಡೆದಿನ್ ಕಾಡ್‌ಗ್ ದೇರ್‌ನಾಯನ್ ಪೊಂಜೋಕುಲು ರಾಮ ರಾಮಂದ್ ಪೂಜಿಪೆರ್ ಪಂದ್ ಪಂತೆರ್. ಈ ಪಾತೆರೊಲು ಬಾರಿ ಚರ್ಚೆಗ್ ಕಾರಣ ಆತ.