Last updated on February 17th, 2023 at 08:33 pm
ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್ ಪನ್ಪಿನ ಒಂಜಿ ಪೊಸ ಸಂಘಟನೆ ಫೆಬ್ರವರಿ 15ಕ್ಕ್ ರಿಜಿಸ್ಟರ್ ಆಂಡ್. ತುಳು ಭಾಷೆ, ಸಂಸ್ಕೃತಿ ಬೊಕ್ಕ ತುಳುವೆರೆನ ಬಗೆಟ್ ಸಂಶೋಧನೆ ಅಂಚೆನೆ ಸಾಮಾಜಿಕ ಅಭಿವೃದ್ದಿ ಬೊಕ್ಕ ತುಳು ಇತಿಹಾಸ, ಪುರಾತತ್ವದ ದಾಖಲೀಕರಣದ ಉದ್ದೇಶ ದೀವೊಂದು ಈ ಸಂಘಟನೆದ ಉದಿಪನ ಆಂಡ್ ಪನ್ದ್ ಸಂಘಟನೆದ ಗುರ್ಕಾರ್ಲಾಯಿನ ಮಹಿ ಮುಲ್ಕಿ ಮೇರ್ ತೆರಿಪಾಯೆರ್.
ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್ದ ಅಡಿಟ್ ಪುಣ್ಣಮೆ ಪ್ರಕಾಶನ ಪನ್ಪಿನ ಒಂಜಿ ಪ್ರಕಾಶನಾ ಸಂಸ್ಥೆನ್ಲಾ ಎಂಕುಲಪ ಉದಿಪನ ಮಲ್ದ. ಈ ಸಂಘಟನೆದ ಸುರುತ ಕಾಣಿಕೆ ಆದ್ ‘ಜೀಟಿಗೆ’ ಪನ್ಪಿನ ಪುದರ್ದ ತುಳು ಲಿಪಿ ಕಲ್ಪುನ ಉಮೇದ್ ಇತ್ತಿನಕಲೆಗ್ ಒಂಜಿ ಬೂಕುನು ಅಚ್ಚಿ ಮಲ್ತ್ ಉಂದೇ ಬರ್ಪಿ ಫೆಬ್ರವರಿ 18ಗು ರಿಲೀಸ್ ಮಲ್ಪರೆ ಉಲ್ಲ ಆತೇ ಅತ್ತಂದೆ ಫೌಂಡೇಶನ್ದ ಮುದೆ‌ಲ್‌ರ್ದ್ ನನಲಾತ್ ತುಳು ಲಿಪಿತ, ತುಳು ಭಾಷೆದ ಬೂಕುಲು ಬರ್ರೆ ಉಲ್ಲ ಪನ್ದ್ ಪ್ರತಿಷ್ಠಾನದ ಕಾರ್ಯಂತೆರಾಯಿನ ನಿಶ್ಚಿತ್ ರಾಮಕುಂಜ ಮೇರ್ ತೆರಿಪಾಯೆರ್.
ಈ ಫೌಂಡೇಶನ್ ದಕುಲು ಸೇರ್ದ್ ‘ತುಳುಪೀಡಿಯಾ’ ಪನ್ಪಿನ ಒಂಜಿ ವೆಬ್ಸೈಟ್ ಮಲ್ದ. ಈ ವೆಬ್ಸೈಟ್ ತುಳುತ ವಿಶ್ವಕೋಶ ಇತ್ತಿಲೆಕ್ಕ. ತುಳುನಾಡ್‌ದ ಬಗೆಟ್ ಒವ್ವೇ ಮಾಹಿತಿ ಬೋಡಾಂಡಲಾ ಈ ವೆಬ್ಸೈಟ್‌ಡ್ ತಿಕ್ಕುಂಡು. ತುಳುವೆರೆಗ್ ಬೋಡಾಪಿನ ವಿಷಯೊಲೆನ್ ಒವ್ವೇ ಕಲುದಾಂತೆ ನನ ದುಂಬುದ ಪೀಳಿಗೆಗ್ ತೆರಿಪಾವೊಡು ಪನ್ದ್ ಒತ್ತು ಗುರ್ಕಾರ್ಲಾಯಿನ ಬ್ಲೆನ್ಸನ್ ಕಾರ್ಡೋಝ ಪಂಡೆರ್.
ತುಳು ಭಾಷೆ ಆಡಳಿತಾತ್ಮಕ ಭಾಷೆ ಆವೊಡು ಆಂಡ ಅವೆತ್ತೊಟ್ಟುಗು ಭಾಷೆಗ್ ಬೋಡಾಪಿನ “ಲ್ಯಾಂಗ್ವೇಜ್ ಪ್ಲಾಂನಿಂಗ್” ಇತೋರ್ತು ಆತಿಜಿ. ಆ ಕಜ್ಜೊನು ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್ ಮಲ್ಪುಂಡು. ಈ ದಿಸೆಟ್ ನನ ಭವಿಷ್ಯೊಡು ಎಂಕುಲು ನನಲಾತ್ ಕಾರ್ಯಕ್ರಮೊಲೆನ್ ಮಲ್ಪರೆ ಉಲ್ಲ ಪನ್ದ್ ಪನವುದ ಪಾಲವೆರಾಯಿನ ನಿಹಾಲ್ ಪೈ ತೆರಿಪಾಯೆರ್.
ಇದಮುಟ್ಟ ಎಂಕುಲು ತುಳುಕಾದ್ ಬೆಂದಿನೆಕ್ಕ್ ಅಂಚೆನೆ ನನ ದುಂಬು ಬೆನರೆ ಉಪ್ಪುನೆಕ್ಕ್ ಒಂಜಿ ಸಂಘಟನಾತ್ಮಕ ಒರು ಕೊರೊಡು ಪನ್ಪಿನ ಉದ್ದೇಶೊಡು ಅಂಚೆನೆ ಸಾಂಸ್ಕೃತಿಕ ಮಾತ್ರ ಅತ್ತಂದೆ ಶೈಕ್ಷಣಿಕ, ಸಂಶೋಧನಾತ್ಮಕ ವಿಷಯೊಲೆನ ಬಾಕಿಲ್ ದೆಪ್ಪೊಡು ಪನ್ದ್ ಎಂಕುಲು ಈ ಪಜ್ಜೆ ದೀತ ಉಂದೆಕ್ ತುಳುವೆರೆನ ಸಹಕಾರ ಬೋಡು ಪನ್ದ್ ಒತ್ತು ಕಾರ್ಯಂತೆರಾಯಿನ ಸುಶಾನ್ ಕೋಟ್ಯಾನ್ ತೆರಿಪಾಯೆರ್.