Last updated on February 24th, 2023 at 03:21 pm
ಕಡಬ: ರೆಂಜಿಲಾಡಿಡ್ ರಡ್ಡ್ ಜೂವೊಲೆನ ಬಲಿ ಗೆತೊಂದಿನ ಕಾಡಾನೆನ್ ಪತ್ತ್‌ದ್ ದುಬಾರೆ ಆನೆಲ್ನ ಬೂಡುಗ್ ಲೆತೊಂದು ಪೋಪಿನ ಪೊರ್ತುಡು ಅರಣ್ಯ ಇಲಾಖೆದ ಅಧಿಕಾರಿಲೆನ ಗಾಡಿಲೆನ ಮಿತ್ತ್ ಕಲ್ಲ್ ದಕ್ಕಿನ ಪ್ರಕರಣೊಡು ಪೋಲೀಸೆರ್ 7 ಜನ ಆರೋಪಿಲೆನ್ ಅರೆಸ್ಟ್ ಮಲ್ದೆರ್.
ರಡ್ಡ್ ಜನೊನು ಕೆರ್ತಿನ ಆನೆನ್ ಕೋಡೆ ಕೊಂಬಾರ್ ಗ್ರಾಮೊದ ಕಾಡ್‌ಡ್ ಪತ್ತಿನ ಅಧಿಕಾರಿಲು, ಈ ಆನೆನ್ ದುಬಾರೆಡ್ ಬುಡ್ದ್ ಬತ್ತ್‌ದ್ ಬೊಕ್ಕ ಒರಿನ ಕಾಡಾನೆಲೆನ್ ಪತ್ತುನ ಪಂದ್ ನಿರ್ಧರಿತ್‌ದಿತ್ತೆರ್.
ರಾತ್ರೆ ಸುಮಾರ್ 9 ಗಂಟೆದ ಪೊರ್ತು ಆನೆನ್ ಕೊಂಡೊಯೆರ ಪಿದಡ್ನಗ ಅಲ್ಪದಕುಲು ಆನೆ ಇತ್ತಿನ ಲಾರಿನ್ ಅಡ್ಡ ಕಟ್ಟ್‌ದ್ ಒರಿನ ಕಾಡಾನೆಲೆನ್ಲಾ ಒಟ್ಟುಗ್ ಲೆತೊಂದು ಪೋವೊಡೂಂದ್ ವಾದ ಮಲ್ದೆರ್ಪಂದ್ ಪಂಜ ವಲಯೊದ ಉಪವಲಯ ಅರಣ್ಯಾಧಿಕಾರಿ ಕಡಬ ಸ್ಟೇಷನ್‌ಗ್ ಕೊರ್ತಿನ ಒಯಿಲ್‌ಡ್ ಆರೋಪಿತ್‌ದೆರ್.
ಈ ಪೊರ್ತುಡು ಉಪವಲಯ ಅರಣ್ಯಾಧಿಕಾರಿ ಆನೆನ್ ದಿಂಜ ಪೊರ್ತು ಲಾರಿಡ್ ಉಂತಯೆರ ಆಪುಜಿ. ಈ ಆನೆನ್ ದುಬಾರೆಡ್ ಬುಡ್ದ್ ಬತ್ತ್‌ದ್ ಒರಿನ ಆನೆಲೆನ್ ಪತ್ತುವ ಪಂದ್ ಪಂಡಲಾ ಜನೊಕುಲು ಒಪ್ಯಂದೆ ವಾದೊ ಮಲ್ಪೆರೆ ಪಿದಡ್ದೆರ್. ಈ ಇಸಯೊನು ಪೋಲೀಸೆರೆಗ್ ತೆರಿಪಾಯಿನೇ ಅಕುಲು ಬತ್ತ್‌ದ್ ಜನೊಕುಲೆಗ್ ವಾಸ್ತವ ಇಚಾರ ತೆರಿಪಾಯೆರ ಪುನೆತೆರ್. ಆಂಡ ಕಾಡಾನೆಲೆರ್ದಾವರ ತನ್ಕುಲೆ ನಡುಟಿತ್ತಿನ ಜನೊಕುಲೇ ತೀರಿನೆಟ್ ಪಿಸ್‌ರ್‌ಡಿತ್ತಿನ ಜನೊಕ್ಲೆಟ್ ಎಚ್ಚಿನಕ್ಲೆಗ್ ಈ ಇಚಾರೊಲು ತೆರಿಯಂದೆ ಪೋಂಡು. ಒರರ್ದ್ ಒರಾನೆ ಪೋಲೀಸೆರೆನ ಅಂಚೆನೇ ಅರಣ್ಯ ಇಲಾಖೆದ ಗಾಡಿಲೆಗ್ ಕಲ್ಲ್ ದಕ್ಕ್‌ದೆರ್. ಈ ದಕ್ಕಟಿಗೆಡ್ ಸಿಬ್ಬಂದಿಲೆಗ್‌ಲ್ ಗಡಿಕುಲಾತ ಪಂದ್ ಒಯಿಲ್‌ಡ್ ಬರೆದುಂಡು.