Last updated on March 12th, 2023 at 06:00 pm
ಬಳ್ಳಾರಿದ ಕೂಡ್ಲಿಗಿಡ್ ನಟೆ ಬಂಗಾರು ಹನುಮಂತುನ ಇಲ್ಲ್ ಬಂಗಾರು ನಿಲಯೊದ ಇಲ್ಲೊಕ್ಕೆಲ್‌ದ ಲೆಕ್ಕೊಡು ನಡತಿನ ಸಾಮೂಹಿಕ ವಿವಾಹ ಬೊಕ್ಕ ಮುತ್ತೈಸಿಲೆನ ಮಟ್ಟೆಲ್ ದಿಂಜಾವುನ ಕಜ್ಜೊಡು ತುಳುನಾಡ ದೈವಾರಾಧನೆಗ್ ಮಕ್ಕರ್ ಮಲ್ದಿನ ನಡಕೆ ನಡತ್‌ದ್ಂಡ್.
ವಾಲ್ಮೀಕಿ ಮಹಾಸಂಸ್ಥಾನೊದ ಪೀಠಾಧ್ಯಕ್ಷೆರ್ ಪ್ರಸನ್ನಾನಂದಪುರಿ ಸ್ವಾಮಿಲು, ಹರಿಹರ ಪಂಚಮಸಾಲಿ ಪೀಠೊದ ಜಗದ್ಗುರು ವಚನಾನಂದ ಸ್ವಾಮಿಲು, ಚಿತ್ರದುರ್ಗ ಬಸವಮೂರ್ತಿ ಮಾದಾರ ಚನ್ನಯ್ಯ ಸ್ವಾಮಿಲು, ಕೂಡ್ಲಿಗಿ ಹಿರೇಮಠೊತ ಪ್ರಶಾಂತಸಾಗರ ಸ್ವಾಮಿಲು, ಕಾನಮಡುಗು ದಾಸೋಹಮಠೊತ ಧರ್ಮಾಧಿಕಾರಿ ದಾ.ಮ.ಐಮಡಿ ಶರಣಾರ್ಯೆರ್, ಹಡಗಲಿತ ಹಾಲಪ್ಪಜ್ಜ ಸ್ವಾಮಿಲು, ಮಡಿವಾಳ ಮಾಚಿದೇವ ಸ್ವಾಮಿಲು, ಬಂಜಾರ ಸ್ವಾಮಿಲು, ಸಿರಗುಪ್ಪ ಬಸವಭೂಷಣ ಸ್ವಾಮಿಲು ಇಂಚ ಹಿಂದೂ ಧರ್ಮೊದ ಮಲ್ಲ ಮಲ್ಲ ಸ್ವಾಮೀಜಿಲು ಮಿತ್ತರ್ಮೆಡಿಪ್ಪುನಗನೇ ಅಕ್ಲೆನ ಎದುರು ಧಾರ್ಮಿಕ ಭಾವನೆಲೆಗ್ ತೆಟ್ಟಾಪಿನಂಚಿನ ನಡಕೆ ನಡತ್ಂಡಲಾ ಮನಿಪಂದೆ ಕುಲ್ದಿತ್ತೆರ್.
ಸುರುಕಾದ್ ದೈವೊದ ಏಸ ಪಾಡುನವೇ ಸಮ ಅತ್ತ್, ಐತ ಇಡೆಟ್ ಏಸ ಪಾಡೊಂದು ಮಿತ್ತರ್ಮೆಗ್ ಬರ್ಪಿನವುಲಾ ತಪ್ಪು. ಕುಡ ಏಸ ಪಾಡಿನಾಯೆ ಸಚಿವೆ ಅಶ್ವಥ್ ನಾರಾಯಣ್ ಬೊಕ್ಕ ಬಂಗಾರು ಹನುಮಂತುನ ಕೈನ್ ಪತೊಂದು ನಲಿತೊಂದು ಟಿಕೆಟ್ ಕೊರ್ಪವೆ ಪಂದ್ ತೋಜುಲೆಕ ನುಡಿ ಕೊರ್ಪುನ ನಾಟಕ ಮಲ್ತಿನವು. ಮಾಪು ಮನ್ಪೆರಾವಂದಿನ ತಪ್ಪು.
ಈತ್ ಮಾಧ್ಯಮೊಲೆಡ್, ನ್ಯೂಸ್ ಪೋರ್ಟಲ್‌ಲೆಡ್ ಈ ಇಸಯೊದ ಬಗ್ಗೆ ಬತ್ತ್ಂಡಲಾ, ಇಂಚ ಮಕ್ಕರ್ ಮನ್ಪೆರ ಬಲ್ಲಿ ಪಂದ್ ತೆರಿಪಾಂಗಲಾ ಪಗೆ ಇತ್ತಿಲೆಕ ಇಂಚಿನ ನಡಕೆಲು ಗಡಿ ಗಡಿ ನಡತೊಂದುಲ್ಲ. ಅವುಲಾ ಇತ್ತೆ ಓಟು ಮುಟ್ಟ ಬನ್ನಗ ತನ್ಕುಲೆ ಅಡ್ವರ್ಟೈಸಿಂಗ್‌ಗ್ ದೈವೊಲೆನ್ ಧೈವಾರಾಧನೆನ್ ರಾಜಕಾರಣಿಲು ಗಲಸೊಂದಿಪ್ಪುನ ಧರ್ಮವಿರೋಧಿ ನಡಕೆಲು ಎಚ್ಚ ಆವೊಂದುಲ್ಲ. ಅವೆಟ್‌ಲಾ ಧರ್ಮ ರಕ್ಷಕೆರ್ ಪಂದ್ ಪಂಡೊನುನ ಪಕ್ಷೊದ ರಾಜಕಾರಣಿಲು ಈ ಇಸಯೊಡು ರಡ್ಡ್ ಪಜ್ಜೆ ಎದುರೇ ಉಲ್ಲೆರ್.