ಕಾಂಗ್ರೇಸ್ ಚುನಾವಣಾ ಪ್ರಣಾಳಿಕೆಡ್ ಇತ್ತಿನ ತುಳು ಅಭಿವೃದ್ದಿ ಪ್ರಾಧಿಕಾರದ ರಚನೆಗ್ ತುಳುವೆರೆನ ಆಗ್ರಹ

Last updated on January 9th, 2025 at 09:13 am

ಕಾಂಗ್ರೇಸ್‌ದಕುಲು ವೋಟುದ ದುಂಬು ಪ್ರಣಾಳಿಕೆ ಕೊರ್ದು ಅವೆಟ್ ತುಳುನು ರಾಜ್ಯಭಾಷೆ ಮಲ್ಪರೆ ಸೂಕ್ತ ಕ್ರಮ ದೆತೊನುವ ಅಂಚೆನೆ ತುಳು ಅಭಿವೃದ್ಧಿ ಪ್ರಾಧಿಕಾರ ಮಲ್ತ್ ತುಳುತು ಬುಲೆಚ್ಚಿಲ್‌ಗ್ ಅನುದಾನ ಬುಡುಗಡೆ ಮಲ್ಪುವ ಪನ್ದ್ ಪನ್ದಿತ್ತೆರ್. ಈ ದಿಸೆಟ್ ಅವೆನ್ ಉಂದೇ ಬರ್ಪಿ ಜುಲೈಡ್ ನಡಪುನ ಬಜೆಟ್‌ ಅಧಿವೇಶನೊಡು ಘೋಷಣೆ ಮಲ್ಪೊಡು ಪನ್ದ್ ತುಳುವೆರ್ ಟ್ವೀಟ್ ಮಲ್ತ್ ಮುಖ್ಯಮಂತ್ರಿ ಸಿದ್ದರಾಮಯ್ಯೆರೆಡ್ ಕೇಂಡೆರ್. ತುಳು ಭಾಷೆ, ಸಂಸ್ಕೃತಿನ್ ಬುಲೆಪಾವರೆ ಸರಕಾರದ ನಿಲೆಟ್ ಸರಿಯಾಯಿನ ಅಂಗಸಂಸ್ಥೆ ಇಜ್ಜಿ, ತುಳು ಸಾಹಿತ್ಯ ಅಕಾಡೆಮಿಗ್ ಮಸ್ತ್ ಸೀಮಿತ ಅಧಿಕಾರೊಲು ಉಪ್ಪುನವು. ತುಳು ಸಾಹಿತ್ಯ ಅಕಾಡೆಮಿ ಪನ್ಪಿನವು ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಅಧೀನೊಡು ಉಪ್ಪುನ, ಉಂದೆಕ್ ಬರ್ಪಿನ ಅನುದಾನಲಾ ಕಡಿಮೆ. ಕಾಲಿ ಸಾಹಿತ್ಯೊಗು ಸೀಮಿತವಾದ್, ತುಳು ಸಾಹಿತ್ಯದ ಬುಲೆಚ್ಚಿಲ್‌ಗ್ ಉಂಡಾಯಿನ ಈ ಘಟಕ ತನ್ನ ಸೀಮಿತ ಅಧಿಕಾರೊಡು ಸಂಸ್ಕೃತಿಗ್ಲಾ ಒಂತೆ ಮಟ್ಟೊಡು ಬೆರಿಬಲ ಕೊರೊಂದುಂಡು, ಆಂಡ ಅವ್ ಯಾವುಜಿ. ಅಂಚಾದ್ ಸಮಗ್ರ ತುಳುತ ಬುಲೆಚ್ಚಿಲ್ ಆವೊಡಾಂಡ ಸ್ವಾಯತ್ತ ಅಧಿಕಾರ ಇತ್ತಿನ ತುಳು ಪ್ರಾಧಿಕಾರ ಬೋಡು. ತುಳು ಪ್ರಾಧಿಕಾರೊಗು ಅನುದಾನಲಾ ಎಡ್ಡೆ ಬರು. ತುಳು ಬಾಸೆ ನನ ದುಂಬುಗು ಆಡಳಿತ, ಶೈಕ್ಷಣಿಕ ಬಾಸೆ ಆವೊಡಾಂಡ ಅಂಚೆನೆ ತುಳುನಾಡ ಸಂಸ್ಕೃತಿದ ದಾಖಲೀಕರಣ ಬೊಕ್ಕ ಜಾಗತಿಕ ಮಾನ್ಯತೆ ಬೋಡಾಂಡ ತುಳು ಅಭಿವೃದ್ದಿ ಪ್ರಾಧಿಕಾರದ ರಚನೆ ಆವೊಡು. ಕಾಂಗ್ರೇಸ್ ತನ್ನ ಪ್ರಣಾಳಿಕೆಡ್ ಕೊರಿಲೆಕ್ಕ ಪ್ರಾಧಿಕಾರೊನು ಉಂಡು ಮಲ್ಪೆೊಡು ಪನ್ಪಿನ ಬೇಡಿಕೆನ್ ತುಳುವೆರ್ ದೀವೊಂದೆರ್.