Last updated on August 15th, 2023 at 06:41 pm
ಮದಿಮೆ ಆತಿನ ಪೊಣ್ಣು ಕಂಡನೆ ಇಲ್ಲಗ್ ಸೇರ್‌ದ್ ಅಲ್ಪ ಕಂಡನಗ್ಲಾ ಬೊಡೆದಿಗ್ಲಾ ಎಚ್ಚಿಕಮ್ಮಿ ಆದ್, ಮನಸ್ತಾಪ ಬತ್ತ್ ಅತ್ತಂದೆ ಪೊಣ್ಣು ತನ್ನ ಮಾಮಿ ತಮ್ಮಲಲ್ಲೆಗ್, ಕಂಡನ ಇಲ್ಲದಕಲೆಗ್ ಬೋಡಾಪಿಲೆಕ್ಕ ನಡತೊನ್ಜೊಲ್ಡ ಅಲೆನ್ ಕಂಡನೆ ಮದ್ಮೆರ್ದ್ ಬುಡುಗಡೆ ಮಲ್ತ್ ಅಪ್ಪೆಲ್ಲಗ್ ಕಡಪಾದ್ ಕೊರ್ಪಿನ ಕ್ರಮನೇ ಬರ ಪನ್ಪಾವುನು. ದುಂಬುದ ಕಾಲೊಡು ಪಿದಯಿರ್ದ್ ಕನತಿನ ಪೊಣ್ಣಗ್ ತನ್ನ ಕಂಡನೆ ಇಲ್ಲಡ್ ಒವ್ವೇ ಸ್ವಾತಂತ್ರ್ಯ ಇತ್ತಿಜಿ. ಅಪಗ ದಾದಾಂಡಲ ಮನಸ್ಥಾಪ ಬತ್ತ್, ಪೊಣ್ಣು ಕಂಡನಿಲ್ಲದಕುಲು ಪನ್ಪಿನ ಕೇನಂದೆ ಸ್ವೇಚ್ಛೆಡ್ ನಡತೊನಿಯೊಲುಡ, ಇಜಿಂಡ ಪೊಣ್ಣನ ಇಲ್ಲದಕಲೆಗ್ಲಾ ಆನನ ಇಲ್ಲದಕಲೆಗ್ಲಾ ಲಡಯಿ ಪತ್ತ್ ದ್ ಅಲ್ಪ ನುಪ್ಪು ನೀರ್ ಉಂತುಂಡ ಬಲಿಪಶು ಆವೊಂದಿತ್ತಿನಿ ಪೊಣ್ಣೇ. ಮುಲ್ಪ ಪೊಣ್ಣನ ಪಾತೆರೊಗು ಆತೊಂಜಿ ಬಿಲೆ ಇತ್ತಿನಲಾ ಕಮ್ಮಿ. ಇಂಚಿನ ಪರಿಸ್ಥಿತಿ ಬನ್ನಗ ಪೊಣ್ಣನ್ ಅಲ್ಪ ಅಪ್ಪೆ ಇಲ್ಲಗ್ ಪಿರ ಒಪ್ಪಾದ್, ಕಂಡನನೊಟ್ಟುಗು ಇತ್ತಿನ ಮಾತಾ ಸಂಬಂದ ಕಡಿತೊನೊನ ಕ್ರಮ ಬರ ಪನ್ಪವುನ. ಈ ಪೊರ್ತುಡು ಕಂಡನೆ ತನ್ನ ಬೊಡೆದಿನ ನಡತೆನ್ ಕೇಳ್ವೆ ಮಲ್ತ್ ನನ ದುಂಬಗ್ ನಿಕ್ಕ್ ಎಂಕ್ ಸಂಬಂದೊ ಇಜ್ಜಿ, ಈ ಎನ್ನ ಬೊಡೆದಿ ಅತ್ತ್ ಯಾನ್ ನಿನ್ನ ಕಂಡನೆ ಅತ್ತ್ ಪನ್ದ್ ಆಲ್ ತುತ್ತುದಿನ ಸೀರೆದ ಸೆರಂಗ್‌ದ ಕೊಡಿನ್ ತನ್ನ ಕೈಟ್ ಪರಿತ್‌ದ್ ಅಲೆನೊಟ್ಟುಗು ಆಯಗ್ ಉಪ್ಪುನ ಸಂಬಂದೊ ಕಡಿತೊನೊಂದಿತ್ತೆ. ಆನಿಗ್ ಅಕಲೆನ ದಾಂಪತ್ಯ ಸಂಬಂದ ಕಡಿದ್ ಆಲ್ ಬೊಕ್ಕ ಆ ಇಲ್ಲಗ್ ಕಾರ್ ದೀಪುಜೊಲು. ಒಂಜಿ ವೇಳೆ ಒಂತೆ ಸಮಯ ಪೋದು ಮಲ್ತಿನ ತಪ್ಪು ಪನ್ದ್ ಅಕಲೆಗ್ ಆದ್ ಕುಡೊರ ಕಂಡನೆ ಬೊಡೆದಿ ಒಂಜಾವೊಡು ಪನ್ಡಲಾ ಆಲ್ ಕುಡ ಕಂಡನ ಇಲ್ಲಗ್ ಕಾರ್ ದೀಪಿನ ಕ್ರಮ ಇಜ್ಜಿ. ಅರುವೆ ಪರಿತ್ ದಕ್ಕುನ ಕ್ರಮ ಆಯಿಬೊಕ್ಕ ಅಕುಲು ಒಂಜೇ ಇಲ್ಲಡ್ ಉಪ್ಪರೆ ಬಲ್ಲಿ, ಒಟ್ಟುಗು ವನಸ್ ಮಲ್ಪರೆ ಬಲ್ಲಿ, ನುಪ್ಪು ನೀರ್ ಆವರೆ ಬಲ್ಲಿ ಪನ್ದ್ ದೈವದ ಮಿತ್ತ್ ವಾಕ್ ಉಪ್ಪುಂಡು. ಬರ ಪನ್ಪಾದ್ ಅರಿವೆ ಪರಿತ್ ದಕ್ಕಿಬೊಕ್ಕ ಪೊಣ್ಣಗ್ ಅಲೆನ ಅಪ್ಪೆಲ್ಲದಕುಲು ಬೇತೆ ಮದ್ಮೆ ಮಲ್ಪೆರೇ ಸಿವಾಯಿ ಒವ್ವೇ ಕಾರಣೊಗು ದುಂಬುದ ಕಂಡನೆ ಕುಡ ಲೆತ್ತೆಡಲಾ ಆಯನಡೆ ಕಡಪುಡಯೆರ್. ಇತ್ತೆದ ಕಾಲೊಡು ಉಂದು ಪದ್ದತಿ ಇಜ್ಜಿ, ಆಂಡ ನಮ್ಮ ಇತಿಹಾಸ, ನಮ್ಮ ಪೂರ್ವ ಪದ್ದತಿಲೆನ ಪೊಲಬು ನಮಕ್ ಉಪ್ಪೊಡು ಪನ್ದ್ ಉಂದೆನ್ ತೆರಿಪಾವುನ ಒಂಜಿ ಎಲ್ಯ ಬೇಲೆ ಮಲ್ತಿನಿ.