Last updated on August 3rd, 2023 at 08:25 pm
ರಾಜಧಾನಿ ಪೊಸದೆಲ್ಲಿಡ್ ಗ್ಲೋಬಲ್ ಇಂಡಿಯಾ ಎಂಟರ್‌ಟೈನ್‌ಮೆಂಟ್‌ ಪ್ರೊಡಕ್ಷನ್ಸ್ ಅಟ್ಟನೆ ಮಲ್ದಿನ ಪಂತೊಡು ಕುಡ್ಲದ ಶಮಾ ವಾಜಿದ್, “ಗ್ಲೋಬಲ್ ಮಿಸೆಸ್ ಇಂಡಿಯಾ ಇಂಟರ್ನ್ಯಾಷನಲ್ ಯೂನಿವರ್ಸ್ – 2023’ ಡ್ ಗೆಂದ್‌ದೆರ್. ಈ ಮುಕೇನ ಆರ್ 2024ತ ಗ್ಲೋಬಲ್ ಮಿಸೆಸ್ ಯೂನಿವರ್ಸ್ ಪಂತೊಡು ಭಾರತೊನು ಪ್ರತಿನಿಧಿಪೆರ ಅಜತ್‌ಬೈದೆರ್.
ದೇಶೊದ 22 ರಾಜ್ಯೊಲೆಡ್ ಈ ಪಂತೊದ ಆಡಿಷನ್‌ ನಡತ್‌ದ್ಂಡ್. ಸಾರೊರ್ದುಲಾ ಎಚ್ಚಿನ ಪೊಂಜೊವುಲೆಡ್, ಶಮಾ ವಾಜಿದ್ ಪೊಸದೆಲ್ಲಿಡ್ ನಡತಿನ ಗ್ರ್ಯಾಂಡ್ ಫಿನಾಲೆಗ್ ಎತ್ತಿನ ಟಾಪ್ 40 ಜನೊಟು ಒರ್ತಿ. ಮಾತಾ ಫೈನಲಿಸ್ಟ್‌ನಕುಲು 5 ದಿನ ಮಾರ್ಗದರ್ಶಕೆರೆರ್ದ್ ಕ್ಯಾಟ್‌ವಾಕ್, ಗ್ರೂಮಿಂಗ್, ಕೊರಿಯೋಗ್ರಫಿ, ಇಮೇಜ್ ಕನ್ಸಲ್ಟಿಂಗ್, ಫಿಟ್‌ನೆಸ್ ಇಂಚಿನ ಅಂಶೊಲೆನ ಟ್ರೈನಿಂಗ್ ದೆತೊಂದಿತ್ತೆರ್.
ಕರ್ನಾಟಕೊನು ಪ್ರತಿನಿಧಿತಿನ ಶಮಾ ವಾಜಿದ್ ಪೂಲ್ ರೌಂಡ್, ಎಥ್ನಿಕ್ ರೌಂಡ್, ಟ್ಯಾಲೆಂಟ್ ರೌಂಡ್ ಬೊಕ್ಕ ಫಾರ್ಮಲ್ ರೌಂಡ್‌ದಂಚಿನ ಬೇತೆಬೇತೆ ರೌಂಡ್‌ಲೆಡ್ ಎಡ್ಡೆ ತೂಪರಿಕೆ ಕೊರ್ದು 10 ಫೈನಲಿಸ್ಟ್‌ಲೆಡ್ ತಾನ ಪಡೆಯೆರ್. ಅಕೇರಿಗ್ ಗ್ಲೋಬಲ್ ಮಿಸೆಸ್ ಇಂಡಿಯಾ ಇಂಟರ್ ನ್ಯಾಷನಲ್ ಯೂನಿವರ್ಸ್ 2023ತ ಕಿರೀಟೊನು ಬಾಲಿವುಡ್ ಸೆಲೆಬ್ರಿಟಿ ಮಲೈಕಾ ಅರೋರಾ ಮೆರೆನ ಕೈರ್ದ್ ತರೆಕ್ ದೀಪಾವೊಂಡೆರ್.
ಶಮಾ ವಾಜಿದ್‌ಗ್ 13 ತಿಂಗೊಲ್ದ ಆನ್ ಬಾಲೆ ಉಂಡು. ಈ ಪಂತೊ ಮದಿಮೆ ಆತಿನ ಪೊಂಜೊವುನಕ್ಲೆಗ್ ಮಾತ್ರ ಇಪ್ಪುನೆರ್ದಾವರ, ಕಿನ್ಯ ಬಾಲೆನ್ ತೂವೊಂದೇ ಈ ಪಂತೊಡು ಪಾಲ್‌ಗೆತೊಂದು ಗೆಂದ್‌ದೆರ್.
ಮುಸ್ಲಿಂ ಸಮುದಾಯೊದಕುಲು ಫ್ಯಾಶನ್ ಲೋಕೊಗು ಕಾರ್‌ದೀಪುನು ಬಾರೀ ಕಮ್ಮಿ. ಅಂಚಿನೆಟ್ ಶಮಾ ವಾಜಿದ್ ಮುಸ್ಲಿಂ ಸಮುದಾಯೊದಾರ್ ಆಂಡಲಾ ಇಲ್ಲದಕಲೆನ ಪ್ರೋತ್ಸಾಹರ್ದಾವರ ಫ್ಯಾಶನ್ ಲೋಕೊಡು ಸಾಧನೆ ಮಲ್ತ್ ತೋಜಾದೆರ್. ಮೇರ್ ಶ್ರೀನಿವಾಸ ಆರ್ಕಿಟೆಕ್ಟ್ ಕಾಲೇಜಿಡ್ ಪ್ರೊಫೆಸರ್ ಆದುಲ್ಲೆರ್.