Last updated on August 6th, 2023 at 03:09 pm
ಅವ್ 1917ನೇ ಇಸವಿ. ಬರ್ಮಾ ದೇಶದ ರಂಗೂನ್ ಪನ್ಪಿನಲ್ಪ ಒಂಜಿ ಮಧ್ಯಮ ವರ್ಗದ ತಮಿಳ್ ಕುಟುಮೊಡು ಒಂಜಿ ಪೊಣ್ಣು ಬಾಲೆ ಪುಟ್ಟುವೊಲು. ಆ ಬಾಲೆದ ಅಮ್ಮೆರ್ ಅಲೆಗ್ ಶಿವರಾಮಕೃಷ್ಣ ಅಯ್ಯರ್ ಪದ್ಮಾವತಿ ಪನ್ದ್ ಪುದರ್ ದೀಪೆರ್. ಪೊಣ್ಣುಲು ಇಲ್ಲ್ ಬುಡ್ದ್ ಪಿದಯಿ ಬರಂದಿನ, ಶಾಲೆ ಕಲ್ಪಂದಿನ ಪೊರ್ತುಡು ಈ ಪದ್ಮಾವತಿ ಪನ್ಪಿನ ಪೊಣ್ಣು ಚದಿ ಕಟ್ಟ್ ದ್ ರಂಗೂನ್ ಮೆಡಿಕಲ್ ಕಾಲೇಜ್‌ಡ್ ಎಂಬಿಬಿಎಸ್ ಮಲ್ಪುವೊಲು.
ಬರ್ಮಾ ದೇಶದ ಮಿತ್ತ್ ಜಪಾನ್ ಆಕ್ರಮಣ ಮಲ್ಪುನಗ ಮೊಕುಲು ಪಿರ ತನ್ಕುಲೆನ ಊರಾಯಿನ ಕೊಯಮತ್ತೂರುಗು ಬರ್ಪೆರ್. ಅಪಗದ ಕಾಲೊಡು ಒಂಜಿ ಪೊಣ್ಣು ಡಾಕ್ಟರ್ ಕನನೇ ಕಟ್ಟರೆ ಆವಂದಿನಂಚಿನ ಪುನೆಪು ಆದ್ 1949ನೇ ಇಸವಿಡ್ ಪದ್ಮಾವತಿ FRCP ಮಲ್ಪರೆ ಲಂಡನ್‌ಗ್ ಪೋಪೆರ್. ಅಲ್ಪರ್ದ್ ಕುಡ ಕಲ್ಪರೆ ಜಾನ್ ಹಾಫ್ಕಿನ್ಸ್ ಯುನಿವರ್ಸಿಟ್, ಯುಎಸ್‌ಗ್ ಪೋಪೆರ್. ಅಲ್ಪ ಕಾರ್ಡಿಯಾಲಜಿದ ದಂತಕತೆಯಾಯಿನ ಹೆಲನ್ ತುಸ್ಸಿಗ್ ಮೊರೊನೊಟ್ಟುಗು ಬೇಲೊ ಮಲ್ಪುವೆರ್. ಅಲ್ಪೊರ್ದು ಪದ್ಮಾವತಿ ಮೇರ್ ಹಾರ್ವರ್ಡ್ ಯುನಿವರ್ಸಿಟಿಗ್ ಪೋದು ಕಾರ್ಡಿಯಾಲಜಿ(ಹೃದಯ ರೋಗ ವಿಭಾಗ)ದ ಪಿತಾಮಹ ಮನ್ಪಿ ಪುದರ್ ಉಪ್ಪುನ ಪೌಲ್ ದೂಡ್ಲಿ ವೈಟ್ ಪನ್ಪಿನರೆಡ ತರಬೇತಿ ಪಡೆಯೊನುವೆರ್.
ಈತ್ ಪೂರಾ ಪದವಿ, ತರಬೇತಿಲು ಆದ್ ಆರೆಗ್ ಯು.ಎಸ್ ಡ್ ಒಲ್ಪಲ ಅರಾಮೊಡು ಇತ್ತೊಲಿ ಆಂಡ ಆರ್ ಭಾರತೊಗು ಪಿರ ಬರೊಡು ಪನ್ದ್ ಕಲ್ತ್ ಆಯಿನೇ ತನ್ನ ದೇಶೊಗು ಬತ್ತೆರ್. 1953ನೇ ಇಸವಿಡ್ ಲೇಡಿ ಹರ್ದಿಂಗ್ ಮೆಡಿಕಲ್ ಕಾಲೇಜ್‌ಗ್ ಸೇರುವೆರ್, ಅಲ್ಪ ಇಡೀ ಭಾರತೊಡೇ ಸುರುತ ಪೊಂಜೊವು ಹೃದಯರೋಗ ತಜ್ಞೆ ಆಪೆರ್.
ಭಾರತದ ಸುರುತ ಕ್ಯಾಥ್‌ಲ್ಯಾಬ್ ಅಂಚೆನೆ ಕಾರ್ಡಿಯಾಕ್ ಕ್ಲೀನಿಕ್‌ನ್ ಪದ್ಮಾವತಿ ಮೇರ್ ಸುರು ಮಲ್ಪುವೆರ್. ಭಾರತದ ಸುರುತ DM ಕಾರ್ಡಿಯಾಲಜಿ ಕೋರ್ಸ್ ಸುರು ಮಲ್ಪುವೆರ್. ಪಾಪದಕಲೆಗ್ ವೈದ್ಯಕೀಯ ಸಕಾಯ ಮಲ್ಪರೆ 1962ನೇ ಇಸವಿಡ್ All India Heart Foundation (AIHF) ಸುರು ಮಲ್ಪುವೆರ್. 1967ನೇ ಇಸವಿಡ್ ಮೌಲಾನ ಆಝಾದ್ ಮೆಡಿಕಲ್ ಕಾಲೇಜ್‌ಗ್ ಸೇರುವೆರ್. ಅವ್ವೇ ವರ್ಸ ಅರೆಗ್ ಇಂದಿರಾಗಾಂಧಿ ಸರಕಾರ ಪದ್ಮ ಭೂಷಣ ಕೊರ್ಪುಂಡು.
ಒಂಜೇ ಪೊರ್ತುಡು ಮೂಜಿ ಮೂಜಿ ಮೆಡಿಕಲ್ ಕಾಲೇಜಿಲೆಡ್ ಕಾರ್ಡಿಯಾಲಜಿಸ್ಚ್ ಬೊಕ್ಕ ಅಡ್ಮಿನಿಸ್ಟೇಟರ್ ಆದ್ ಮೇರ್ ಬೇಲೆ ಮಲ್ದೆರ್. 1978ನೇ ಇಸವಿಡ್ MAMCದ ಡೈರೆಕ್ಟರ್ ಆದ್ ಮೇರ್ ನಿವೃತ್ತರಾಯೆರ್.
ನಿವೃತ್ತಿ ಆಯಿಬೊಕ್ಕ 1981ನೇ ಇಸವಿಡ್ ದೆಲ್ಲಿಡ್ National Heart Instituteನ್ ಉಂಡು ಮಲ್ತೆರ್. ತನ್ನ 95ನೇ ವರ್ಸ ಮುಟ್ಟ ದಿನೊಕು 12 ಗಂಟೆ ವಾರೊಗು 5 ದಿನ ಬೇಲೆ ಮಲ್ತೊಂದಿತ್ತೆರ್. 1992ನೇ ಇಸವಿಡ್ ಮೆರೆಗ್ ಭಾರತ ಸರಕಾರ ಪದ್ಮ ವಿಭೂಷಣದ ಮಾನಾದಿಗೆ ಮಲ್ತ್ಂಡ್.
ತನ್ನ ಜೀವನ ಇಡೀ ಈ ದೇಶೊಗಾದ್, ಹೃದಯರೋಗ ತಜ್ಞೆಯಾದ್ ಬೆಂದಿನ ಡಾ॥ಪದ್ಮಾವತಿ ಮೇರ್ 2020ನೇ ಇಸವಿಡ್, ತನ್ನ 103ನೇ ವರ್ಸೊಡು ಕೊರೊನಾ ಬತ್ತ್ ತೀರಿಯೆರ್.
ಮೆರೆಗೊರ್ತಿ ತಂಗಡಿ ಉಲ್ಲೆರ್ ಅರೆನ ಪುದರ್ ಜಾನಕಿ ಪನ್ದ್, ಆರ್ಲಾ ಡಾಕ್ಟರ್, ನರರೋಗ ತಜ್ಞೆ. ಪದ್ಮಾವತಿ-ಜಾನಕಿ ಮೊಕುಲು ಇರ್ವೆರ್ಲಾ ಮದ್ಮೆ ಆತಿಜೆರ್. ಮೊಕುಲು ತನ್ಕುಲೆನ ಜೀವಮಾನೊಡು ಬೊನ್ತಿನ ಮಾತಾ ಪನವುಲೆನ್ ಒಂಜಿ ಟ್ರಸ್ಟ್ ಮಲ್ತ್ ಪಾಡಿಯೆರ್. ಆ ಟ್ರಸ್ಟ್ ಬಡವೆರೆಗ್ ಬೃದಯ ಶಸ್ತ್ರ ಚಿಕಿತ್ಸೆ ಮಲ್ಪರೆ ಪನವುದ ಸಕಾಯ ಮಲ್ಪುಂಡು.
ಮೂಲು ಕಲ್ತ್ ಪಿದಯೂರುಗು ಪೋಪಿನ ಜವನೆರ್ ಉಪ್ಪುನ ಈ ದೇಶೊಡು ಡಾ॥ ಪದ್ಮಾವತಿ ಒರ್ತಿ ನಮ್ಮ ದೇಶೊಡೇ ಇತ್ತ್‌ದ್ ಮಾತಾ ಸಾಮಾಜಿಕ ಕಟ್ಟ್ ಪಾಡ್‌ಲೆನ್‌ಲಾ ಮೀರ್‌ದ್ ಎಂಚ ಸಾಧನೊ ಮಲ್ಪೊಲಿ ಪನ್ಪಿನೆಕ್ಕ್ ಸಾಕ್ಷಿ.