Last updated on August 20th, 2023 at 06:37 pm
ಯುವ ಉದ್ಯಮಿ, ಒಡಿಪು ಮೂಲದ ಜವನೆ 31 ವರ್ಸದ ಅಮರ್ ಶೆಟ್ಟಿ ಪನ್ಪಿನಾರ್ ಬೆಂಗಳೂರುಡು ತೀರಿಯೆರ್. ಮೇರ್ ತೀರ್ಯರೆ ಭಾಗ್ಯ ಕ್ಲಿನಿಕ್ ದ ಬೈದ್ಯೆರ್ ಬೊಕ್ಕ ಸಿಬ್ಬಂದಿಲು ನೆವನ ಪನ್ದ್ ಅರೆನ ಇಲ್ಲದಕುಲು ಆರೋಪ ಮಲ್ದೆರ್.
ಅಮರ್ ಮೇರ್ ಆಜಿ ವರ್ಸ ದುಬೈಡ್ ಇತ್ತ್ ಅಲ್ಪ ಒಂತೆ ಕಾಸ್ ಮಲ್ತ್, ಬೆಂಗಳೂರುಗು ಬತ್ತ್ ಸ್ವಂತ ಬೇರ ಮಲ್ಪೊಡು ಪನ್ದ್ ಹೊಟೇಲ್ ಉದ್ಯಮೊಗು ಜತ್ತಿತ್ತೆರ್. ಆಗಸ್ಟ್ 13ಕ್ಕ್ ಜ್ವರ ಬತ್ತಿನೆಕ್ಕ್ ಮೇರ್ ಕೆ.ಪಿ ಅಗ್ರಹಾರದ ಭಾಗ್ಯ ಕ್ಲಿನಿಕ್ ಗ್ ಪೋದಿತ್ತೆರ್. ಮೆರೆನ್ ಪರೀಕ್ಷೆ ಮಲ್ತಿನ ಬೈದ್ಯೆರ್ ಮೆರೆಗ್ ಕೆಲವ್ ಮಾತ್ರೆ ಬೊಕ್ಕ ಇಂಜೆಕ್ಷನ್ ಕೊರ್ದಿತ್ತೆರ್. ಇಂಜೆಕ್ಷನ್ ಕೊರ್ತಿನ ಜಾಗೆ ಬಾತ್ ದ್ ಬೇನೆ ಸುರು ಆದಿತ್ತ್ಂಡ್. ಅಪಗ ಅಮರ್ ಮೇರ್ ರಾಜಾಜಿನಗರದ ಚೇತನ್ ಕ್ಲಿನಿಕ್ ಗ್ ಪೋದಿತ್ತೆರ್. ಅಲ್ಪ ಮೆರೆಗ್ ಗ್ಲುಕೋಸ್ ಕೊರ್ದು ಅಲ್ಪದ ಬೈದ್ಯೆರ್ ಕಿಮ್ಸ್ ಆಸ್ಪತ್ರೆಗ್ ಅಡ್ಮಿಟ್ ಆವರೆ ಪನ್ಡೆರ್. ಕಿಮ್ಸ್ ಡ್ ಮರ್ದ್ ಪಲಿಪಂದೆ ಅಮರ್ ಮೇರ್ ಆಗಸ್ಟ್ 18ಗು ತೀರಿಯೆರ್.
ಅಮರ್ ಶೆಟ್ಟಿಗ್ ಸುರುಟು ಮರ್ದ್ ಕೊರಿನ ಭಾಗ್ಯ ಕ್ಲಿನಿಕ್ ದಕಲೆನ ನಿರ್ಲಕ್ಷ್ಯೊರ್ದು ಅರೆನ ಜೀವ ಪೋಯಿನಿ ಪನ್ದ್ ಇಲ್ಲದಕುಲು ಆರೋಪ ಮಲ್ತ್ ಪೋಲೀಸೆರೆಗ್ ಒಯಿಲ್ ಕೊರ್ತೆರ್. ಅಮರ್ ಶೆಟ್ರೆನ ಪುನೊನು ಊರುಗು ಕನತ್ ಊರುಡೇ ಕಡೆತ ಕಿರಮ ಮಲ್ಪುವೆರ್.