Last updated on September 6th, 2023 at 02:58 pm
ಕುಡ್ಲ ಪ್ರವಾಸಡುಪ್ಪುನ ಸಚಿವೆ ಜಮೀರ್ ಅಹಮದ್‌ ಖಾನ್‌ ಅಲ್ಪಸಂಖ್ಯಾತೆರೆನ ಕಲ್ಯಾಣ ಇಲಾಖೆದ ಹಾಸ್ಟೆಲ್‌ಗ್ ನೆನೆಪಂದೆ ಭೇಟಿ ಕೊರ್ಯೆರ್. ಕುಡ್ಲ ಅಲ್ಪಸಂಖ್ಯಾತೆರೆನ ಹಾಸ್ಟೆಲ್‌ದ ಅವ್ಯವಸ್ಥೆಲೆನ್ ತೂದು ಬೆಚ್ಚ ಆಯಿನ ಅಲ್ಪಸಂಖ್ಯಾತೆರೆನ ಕಲ್ಯಾಣ ಇಲಾಖೆ ಸಚಿವೆ ಜಮೀರ್ ಅಹಮದ್‌ ಖಾನ್‌, ತಾಲ್ಲೂಕು ವಿಸ್ತರಣಾಧಿಕಾರಿನ್ ಸಸ್ಪೆಂಡ್ ಮನ್ಪೆರೆ ಸೂಚನೆ ಕೊರ್ತೆರ್. ಅಂಚೆನೇ ಬೇತೆ ಅಧಿಕಾರಿಲೆಗ್ ನೋಟೀಸ್ ಕೊರ್ಯೆರ ಪನ್ತೆರ್.
ಕೋಡೆ ಬಯ್ಯಡ್ ಮುಖ್ಯಮಂತಿರ್ಲೆನ ರಾಜಕೀಯ ಕಾರ್ಯಂತೆರ್ ನಸೀರ್ ಅಹಮದ್‌ರೆನ ಒಟ್ಟುಗು ವೆಲೆನ್ಸಿಯಾ ರೋಡ್‌ದ ಅಲ್ಪಸಂಖ್ಯಾತೆರೆನ ಮೆಟ್ರಿಕ್ ಬೊಕ್ಕದ ಜವನೆರೆನ ಹಾಸ್ಟೆಲ್‌ಗ್ ನೆನೆಪಂದೆ ಬತ್ತಿನ ಸಚಿವೆರ್ ಹಾಸ್ಟೆಲ್‌ಡ್ ಮಡಿ ಇಜ್ಜಂದಿನ ತೂದು, ಶೌಚಾಲಯ ನಿರ್ವಹಣೆದಾಂತಿನ ತೂದು ಪಿಸಿರಾದಿತ್ತೆರ್.
ಈ ಪೊರ್ತುಡು ಅಲ್ಪದ ಜೋಕುಲು ಗುಣಮಟ್ಟೊದ ವನಸ್-ತೆನಸ್ ಕೊರೊಂದಿಜ್ಜೆರ್, ವಾರೊಡೊರ ಕೋರಿದ ಮಾಸ ಕೊರಂದೆ ಪದಿನೈನ್ ದಿನೊಕ್ಕೊರ ಕೊರ್ಪೆರ್. ಚಾರ್ಟ್‌ದ ಪ್ರಕಾರ ಕೊರೊಂದಿಜ್ಜೆರ್ ಪಂದ್ ಒಯಿಲ್ ಕೊರ್ತೆರ್. ಐನ್ ವರ್ಸ ಕರೀಂಡಲಾ ಬೆಡ್ ಶೀಟ್ ಕೊರ್ತುಜೆರ್, ತಲೆಂಬು ಇಜ್ಜಿ, ಇಂಚ ಸಾಲ್ ಸಾಲ್ ಒಯಿಲ್ ಇತ್ತ್ಂಡ್.
ಅಪಗನೇ ಸಚಿವೆರ್ ತಾಲೂಕು ವಿಸ್ತರಣಾ ಅಧಿಕಾರಿ ಮಂಜುನಾಥ್‌ನ್ ಸಸ್ಪೆಂಡ್ ಮನ್ಪುನ ಆದೇಶ ಕೊರ್ಯೆರ್. ಡಿ.ಎಂ.ಒ ಜಿನೇಂದ್ರೆ ಬೊಕ್ಕ ವಾರ್ಡನ್ ಅಶೋಕ್‌ಗ್ ಶೋಕಾಸ್ ನೋಟಿಸ್ ಕೊರ್ಯೆರ ಸೂಚನೆ ಕೊರ್ತೆರ್.