Last updated on September 11th, 2023 at 08:42 am
ದೇಲಂತಡೆಡ್ ಹಾರ್ಟ್ ಅಟ್ಯಾಕ್‌ ಆದ್ ಕುಸ್ಕ್‌ದ್ ಬೂರ್ದ್ ನಿವೃತ್ತ ಅಧ್ಯಾಪಕೆ ಒರಿ ತೀರ್ದಿನ ನಡಕೆ ಕೋಡೆ ವರದಿಯಾತ್ಂಡ್.
ತೀರ್ದಿನಾರ್ ಪಡುಪಣಂಬೂರು ಬೊಳ್ಳಾಯಾರ್ ನಿವಾಸಿ ನಿವೃತ್ತ ಅಧ್ಯಾಪಕೆ ಕೃಷ್ಣರಾವ್ (63) ಪಂದ್ ತೆರಿದ್‌ಬೈದ್ಂಡ್.
ಕೋಡೆ ಮೇರ್ ತೊರತ್ತಲ್‌ದ ಇಡ್ಯಾ ಶ್ರೀ ಮಹಾಲಿಂಗೇಶ್ವರ ದೇಲಂತಡೆಕ್ ಪೋದಿತ್ತೆರ್. ದೇಲಂತಡೆಕ್ ಪೋಪಿನ ಮೊಟ್ಟುಲೆನ್ ಜತ್ತ್‌ದ್ ಒಂತೆ ದೂರ ಪೋನಗನೇ ಹಾರ್ಟ್ ಅಟ್ಯಾಕ್‌ ಆದ್ ಕುಸ್ಕುದ್ ಬೂರ್ದೆರ್. ಅಲ್ಪದ ಒರಿನ ಭಕ್ತೆರ್ ಮುಟ್ಟ ಬತ್ತ್‌ದ್ ತೂವೊಕದಿತ್ತಿಲೆಕನೆ ತೀರ್ದೆರ್ ಪಂದ್ ತೆರಿದ್‌ಬೈದ್ಂಡ್.
ಈ ನಡಕೆ ದೇಲಂತಡೆದ ಸಿಸಿ ಟಿವಿಡ್ ಕೈದಾತ್ಂಡ್. ಕೃಷ್ಣರಾವ್ ಮೇರ್ ಪುನರೂರು ಭಾರತ್‌ ಮಾತಾ ಸರಕಾರಿ ಶಾಲೆಡ್ ಶಿಕ್ಷಕೆಯಾದ್ ಬೇಲೆ ಮಲ್ದೆರ್. ಬೊಳ್ಳಾಯರ್ ಶ್ರೀ ಚಂದ್ರ ಮೌಳೀಶ್ವರ ದೇಲಂತಡೆದ ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶೋತ್ಸವ ಸಮಿತಿದ ಪ್ರಧಾನ ಕಾರ್ಯಂತೆರಾದ್‌ಲಾ ಚಾಕಿರಿ ಮಲ್ದೆರ್. ಬೊಳ್ಳಾಯರ್ ಗೋಂಟು ಪುತ್ರನ್ ಮೂಲಸ್ಥಾನೊದ ಸಹ ಅರ್ಚಕೆರಾದ್, ಕೆಂಚನಕೆರೆ ಪೇರ್ ಉತ್ಪಾದಕೆರೆ ಸಂಘೊದ ಪದುಕೆ ಆದ್, ಬೆನ್ನಿದಾರಾದ್, ಎಡ್ಡೆ ಸಾಮಾಜಿಕ ಕಾರ್ಯಕರ್ತೆ ಆದ್ ಬಙ್ಙೊಡು ಕೇಂಡಿನಕಲೆಗ್ ಇಜ್ಜಿಂದ್ ಪನಂದೆ ಜನಾನುರಾಗಿಯಾದಿತ್ತೆರ್.
ಕೃಷ್ಣರಾವ್ ಮೇರ್ ಬೊಡೆದಿ, ಒರಿ ಮಗೆ ಬೊಕ್ಕ ಮಗಲೆನ್ ಅಗತ್‌ ಪೋತೆರ್.