Last updated on September 10th, 2023 at 10:07 pm
ಇನಿ ಶ್ರೀಲಂಕಾದ ಕೊಲಂಬೊಡು ನಡತೊಂದಿತ್ತಿನ ಏಷಿಯಾ ಕಪ್ 2023ತ ಭಾರತ-ಪಾಕಿಸ್ತಾನ ಸೂಪರ್-4 ಸ್ಟೇಜ್‌ದ ಗೊಬ್ಬು ಬರ್ಸೊರ್ದಾವರ ಅರ್ದೊಡೇ ಉಂತೊಡಾದ್ ಬತ್ತ್ಂಡ್. ಟಾಸ್ ಗೆಂದಿನ ಪಾಕಿಸ್ತಾನ ಫೀಲ್ಡಿಂಗ್‌ಗ್ ಜತ್ತ್‌ದಿತ್ತ್ಂಡ್.
ಸುರುರ್ದೇ ಎಡ್ಡೆ ಗೊಬ್ಬಿನ ಭಾರತೊದ ಓಪನಿಂಗ್ ಬ್ಯಾಟ್ಸ್‌ಮೆನ್ ರೋಹಿತ್ ಶರ್ಮಾ ಬೊಕ್ಕ ಶುಭ್‌ಮನ್ ಗಿಲ್ ಇರ್ವೆರ್ಲಾ ಅರ್ಧ ಶತಕ ಮಲ್ತ್‌ದ್ ಸುರುತ ವಿಕೆಟ್‌ಗ್ 121 ರನ್ ಒಟ್ಟು ಮಲ್ತೆರ್. 24 ನೇ ಓವರ್ ಸುರು ಆಯಿನೇ ಬತ್ತಿನ ಬರ್ಸ ಪಿರ ಗೊಬ್ಬು ಸುರು ಆವಂದಿಲೆಕ ಮಲ್ತ್ಂಡ್. ಏಷಿಯಾ ಕಪ್ 2023 ದ ಸುರುತ ಭಾರತ-ಪಾಕ್ ಗೊಬ್ಬುಲಾ ಬರ್ಸರ್ದಾವರ ಕಡೆಕೊಡಿ ಎತ್ತ್‌ದಿಜ್ಜಂಡ್.
ಇನಿ 24.1 ಓವರ್‌ಡ್ ಉಂತಿನ ಗೊಬ್ಬು ಎಲ್ಲೆ ಪಿರ 24ನೇ ಓವರ್‌ದ ರಡ್ಡನೇ ಬಾಲ್‌ರ್ದ್ ಸುರು ಆವರೆ ಉಂಡು. 2 ವಿಕೆಟ್‌ಗ್ 147 ರನ್ ಒಟ್ಟು ಮಲ್ದಿನ ಭಾರತೊದ ಕಡೆರ್ದ್ 8 ರನ್ ಮಲ್ದಿನ ವಿರಾಟ್ ಕೊಹ್ಲಿ ಬೊಕ್ಕ 17 ರನ್ ಮಲ್ದಿನ ಕೆ. ಎಲ್. ರಾಹುಲ್ ಕ್ರೀಸ್‌ಡ್ ಉಲ್ಲೆರ್.