Last updated on September 15th, 2023 at 08:00 pm
ಉದ್ಯಮಿ ಗೋವಿಂದ ಪೂಜಾರಿ ಎಂಎಲ್ಎ ಟಿಕೆಟ್‌ಗಾದ್ ಕೋಟ್ಯಾಂತರ ರೂಪಾಯಿ ಕಾಸ್ ಕಲೆವೊಂದಿನ ನಡಕೆ ಬೊಲ್ಪುಗು ಬತ್ತಿನ ಬೆರಿಟೇ ಇತ್ತೆ ಇಂಚಿನನೇ ಒಂಜಿ ದಗೆತ ಪ್ರಕರಣ ಕೊಪ್ಪಳ ಜಿಲ್ಲೆಡ್ಲಾ ಬೊಲ್ಪುಗ್ ಬೈದ್ಂಡ್. ಮುಲ್ಪಲಾ ಉದ್ಯಮಿ ಒರಿ ಲಕ್ಷ ಲಕ್ಷ ಕಾಸ್ ಕಲೆವೊಂದೆರ್.
ಕೊಪ್ಪಳ ಜಿಲ್ಲೆದ ಕನಕಗಿರಿ ಕ್ಷೇತ್ರೊದ ಬಿಜೆಪಿ ಟಿಕೆಟ್ ಆಕಾಂಕ್ಷಿಯಾದಿತ್ತಿನ ಗಾಯತ್ರಿ ತಿಮ್ಮಾರೆಡ್ಡಿ ಪನ್ಪಿನಾರೆಗ್ ಟಿಕೆಟ್ ದೆಪ್ಪಾದ್ ಕೊರ್ಯೆರ ಅರೆನ ಕಂಡನೆ ಜಿ.ತಿಮ್ಮಾರೆಡ್ಡಿ ಗಿಲ್ಲೆಸೂಗುರ್ ಮಲ್ಲೆಟ್ ಪುನೆದಿತ್ತೆರ್. ಈ ಪೊರ್ತುಡು ಟಿಕೆಟ್ ದೆಪ್ಪಾದ್ ಕೊರ್ಪವ ಪಂಡ್‌ದ್ ಮೂಜಿ ಜನ ದಗೆ ಮಲ್ದೆರ್ ಪಂದ್ ತೆರಿದ್ ಬೈದ್ಂಡ್.
ಕನಕಗಿರಿ ಎಸ್ಸಿ ರಿಸರ್ವ್‌ಡ್ ಕ್ಷೇತ್ರೊದ ಆಕಾಂಕ್ಷಿಯಾದಿತ್ತಿನ ಗಾಯತ್ರಿ ತಿಮ್ಮಾರೆಡ್ಡಿ ಮೇರ್ ಬಿಜೆಪಿ ಟಿಕೆಟ್‌ಗಾದ್ ಭಾರಿ ಪುನೆವೊಂದಿತ್ತೆರ್. ಈ ಪೊರ್ತುಡು ದೆಲ್ಲಿ ಮೂಲೊದ ವಿಶಾಲ್ ನಾಗ್ ಬೊಕ್ಕ ಬೆಂಗ್ಳೂರ್‌ದ ಜೀತು ಗೌರವ್ ಪನ್ಪಿನಕುಲು ಟಿಕೆಟ್ ದಿಪ್ಪಾದ್ ಕೊರ್ಪ ಪಂಡ್‌ದ್ 21 ಲಕ್ಷ ರೂಪಾಯಿ ನಾಮ ಪಾಡ್ದೆರ್.
ಈ ಬಗೆಟ್ ಮೂಜಿ ಜನೊತ ಮಿತ್ತ್ ಬೆಂಗ್ಳೂರ್‌ದ ಅಶೋಕ ನಗರ ಸ್ಟೇಶನ್‌ಡ್ ತಿಮ್ಮಾರೆಡ್ಡಿ ಒಯಿಲ್ ಕೊರ್ತೆರ್.
ರಾಜ್ಯೊಡು ಸಮೀಕ್ಷೆ ಮಲ್ತೊಂದುಲ್ಲ. ಯಾನ್ ಕೇಂದ್ರ ಬಿಜೆಪಿ ಚುನಾವಣಾ ಸಮೀಕ್ಷೆ ಮುಖ್ಯಸ್ಥೆ ಪಂದ್ ಪೊಲಬು ಪಂಡಿನ ವಿಶಾಲ್ ನಾಗ್, ಎಂಕ್ ಅಮಿತ್ ಶಾನ ಗುರ್ತ ಉಂಡು. ಅಂಚಾದ್ ಅಲ್ಪ ಈರೆನ ಪುದರ್ ಮಿತ್ತ್ ಕನಪ ಪಂದ್ ಪಂದಿತ್ತೆರ್‌ಗೆ.
ಅಂಚ ಆಯನ್ ನಂಬುದು ಟಿಕೆಟ್ ಆಕಾಂಕ್ಷಿನ ಕಂಡನೆ, ವಿಶಾಲ್‌ನ ಬ್ಯಾಂಕ್ ಅಕೌಂಟ್‌ಗ್ 2 ಲಕ್ಷ ಅಂಚೆನೇ ಕೈಟ್ 19 ಲಕ್ಷ ಕೊರ್ತೆರ್‌ಗೆ. ಅಂಚಿ ಟಿಕೆಟ್‌ಲಾ ತಿಕ್ಕಂದೆ, ಇಂಚಿ ಕಾಸ್‌ಲಾ ಪಿರ ತಿಕ್ಕಂದಿನೆರ್ದಾವರ ಒಯಿಲ್ ಕೊರ್ತೆರ್.