Last updated on September 15th, 2023 at 09:27 pm
ಫಲವಸ್ತುಲೆಡ್ ನಮ್ಮ ಆರೋಗ್ಯ ಒರಿಪಾವುನ ಜೀವೊಗು ಎಡ್ಡೆಂತಿನ ಅಂಶೊಲು ಉಪ್ಪುವ. ನಮ ಎಡ್ಡೆ ಫಲವಸ್ತುಲೆನ್ ತಿನ್ಡ, ಏತೋ ಸೀಕ್‌ಲೆರ್ದ್ ದೂರ ಉಪ್ಪೊಲಿ. ಎಚ್ಚಿನ ಫಲವಸ್ತುಲೆಡ್ ಕ್ಯಾಲರಿ ಕಮ್ಮಿ ಉಪ್ಪುನೆರ್ದಾವರ ಅವ್ ಜೀವದ ತೂಕ ಕಮ್ಮಿ ಮಲ್ಪರೆ ಎಡ್ಡೆ.
ಪೇರಂಗಾಯಿ ಉಂದೆನ್ ಪೇರಳೆ ಪನ್ದ್‌ಲಾ ಪನ್ಪೆರ್. ನಮ ಮಾತ ಉಂದೆನ್ ಉಪ್ಪು ಕಾರೊದೊಟ್ಟು ತಿನ್ಪ. ಆಂಡ ನಮಕ್ ತೆರಿಯಂದಿನ ವಿಷಯ ದಾದ ಪನ್ಡ, ಪೇರಂಗಾಯಿ ತಿನ್ಂಡ ನಮ್ಮ ಜೀವೊಡು ಇತ್ತಿನ ಚರ್ಬಿ ಕಮ್ಮಿ ಆದ್ ಸಪುರ ಆಪೆರ್!
ಪೇರಂಗಾಯಿ ಸಪುರ ಆವರೆ ಬಾರೀ ಎಡ್ಡೆ. ಒಂಜಿ ಪೇರಂಗಾಯಿಡ್ 37-55 ದಾತ್ ಮಾತ್ರ ಕ್ಯಾಲರಿ ಉಪ್ಪುನು. ಆಂಡ ಎಡ್ಡಾಯಿನ ವಿಟಮಿನ್ ಬೊಕ್ಕ ಮಿನರಲ್ ಉಂಡು. ಅಂಚಾದೇ ಕ್ಯಾಲರಿ ಕಮ್ಮಿ ಆಂಡಲ ಬೇತೆ ಬೋಡಾಯಿನ ಪೌಷ್ಟಿಕಾಂಶೊಲು ಪೂರಾ ಉಂಡು. ಪೇರಂಗಾಯಿಡ್ ಮಸ್ತ್ ಪ್ರೋಟೀನ್ ಉಂಡು. ನಮ ತಿನ್ಪಿನ ತೆನಸ್‌ಲೆಡ್ ಪ್ರೋಟೀನ್ ಬೊಕ್ಕ ಫೈಬರ್ ಇತ್ತ್ಂಡ ಅವ್ ಕರವರೆ ಮಸ್ತ್ ಪೊರ್ತು ದೊತೊನುಂಡು, ಅಂಚಾದ್ ಮಸ್ತ್ ಪೊರ್ತು ಬಂಜಿ ದಿಂಜಿದಿತ್ತಿಲೆಕ್ಕ ಆಪುಂಡು. ಪೇರಂಗಾಯಿಡ್ ಎಡ್ಡೆ ಫೈಬರ್ ಉಂಡು ಅಂಚಾದ್ ತಿಂಡಿನ ತೆನಸ್‌ಲು ಎಡ್ಡೆಡ್ ಕರವರೆ ಉಂದು ಸಾಯ ಮಲ್ಪುಂಡು. 100 ಗ್ರಾಂ ಪೇರಂಗಾಯಿಡ್ 5.4 ಗ್ರಾಂ ಫೈಬರ್ ಉಪ್ಪುಂಡು.
ಹಾರ್ಮೋನುದ ಸಮಸ್ಯೆಲು ಇತ್ತಿನಕಲೆಗ್ಲಾ ಪೇರಂಗಾಯಿ ಎಡ್ಡೆ. ಡಯಾಬಿಟಿಸ್ ಇತ್ತಿನಕುಲುಲಾ ಉಂದೆನ್ ತಿನೊಲಿ. ಪೇರಂಗಾಯಿ ತಿನ್ಂಡ ಬಿಪಿ ಬೊಕ್ಕ ಕೊಲೆಸ್ಟೆರಾಲ್ ಕಮ್ಮಿ ಆಪುಂಡು ಪನ್ದ್ ಒಂಜಿ ಅಧ್ಯಯನ ಪನ್ಪುಂಡು. ಪೇರಂಗಾಯಿಡ್ ವಿಟಮಿನ್ ಸಿ ಉಂಡು ಉಂದು ನಮ್ಮ ರೋಗನಿರೋಧಕ ಶಕ್ತಿನ್ ಜಾಸ್ತಿ ಮಲ್ಪುಂಡು. ಪೇರಂಗಾಯಿ ತಿನ್ಂಡ ಕಣ್ಣ್‌ಗ್ಲಾ ಎಡ್ಡೆ.
ದಿನೊಕು ಒಂಜಿ ಇಜಿಂಡ ರಡ್ಡ್ ಪೇರಂಗಾಯಿ ಮಾತ್ರ ತಿನೊಡು. ಲೆಕ್ಕೊರ್ದು ಜಾಸ್ತಿ ತಿನ್ಂಡ ಬಂಜಿಗ್ ಎಡ್ಡೆ ಅತ್ತ್. ಉಂದೆರ್ದಾತ್ರ ಜಿಲಾಬು, ಬಂಜಿಬೇನೆ ಸುರು ಆವು. ಕಾಂಡೆದ ತೆನಸ್ ಆಯಿಬೊಕ್ಕ, ಮದ್ಯಾಹ್ನದ ವನಸ್ ಆಯಿಬೊಕ್ಕ ಇಜಿಂಡ ಬಯ್ಯಡ್ ಪೇರಂಗಾಯಿ ತಿನ್ಂಡ ಎಡ್ಡೆ.