ಅರೆನ ಕಡೇತ ಸಂಸ್ಕಾರ ಮಲ್ಪರೆಲಾ ಕಾಸ್ ಇತ್ತ್’ಜಿ : ಕಾರ್ನಾಡ್ ಸದಾಶಿವ ರಾವ್

Last updated on August 13th, 2022 at 07:42 am

ಈ ದೇಸೊಗು ಸ್ವತಂತ್ರ ಬರೊಡಾಂಡ ಅವೇತೋ ಜನತ ಬಲಿದಾನ ಆತ್ಂಡ್, ಅವೇತೋ ನಾಯಕೆರ್ ಜನಕ್ಲೆನ್ ಸಂಘಟಿತೆರಾದ್ ಮಲ್ತ್’ದ್ ದೇಶೊಗು ತನ್ನ ಇಲ್ಲ್ ಬಿತ್ತಿಲ್ ಮಾರ್ದಿನಕುಲುಲ್ಲೆರ್. ಅಂಚಿನ ಒರಿ ಮಾಮಲ್ಲ ಮಹಾತ್ಮೆ ಕಾರ್ನಾಡ್ ಸದಾಶಿವ ರಾವ್.

1881ಟ್ಟೆ ತುಳುನಾಡ್’ದ ಒಂಜಿ ಸಿರಿವಂತ ಕುಟುಮೊಡು ಮೇರ್ ಪುಟ್ಟಿಯೆರ್. ಮದ್ರಾಸ್ ಪ್ರೆಸಿಡೆನ್ಸಿ ಕಾಲೇಜ್’ಡ್ ಕಲ್ತೆರ್ ಅಂಚೆನೆ ಬೊಂಬಾಯಿಡ್ ಕಾನೂನು ಪದವಿ ಪಡೆಯೆರ್. ಅವೆರ್ದ್ ಬೊಕ್ಕ ಮೇರ್ ಸ್ವಾತಂತ್ರ್ಯ ಚಳುವಳಿಗ್ ಜತ್ತೆರ್. ಕಂಡನೆ ಸೈತಿನ ಬೊಕ್ಕ ಪಾಪದ ಪೊಂಜೊವುಲೆನ ಉದ್ದಾರೊಗಾದ್ ಮಹಿಳಾ ಸಭೆನ್ ಉಂಡು ಮಲ್ತೆರ್. ಕರ್ನಾಟಕೊಡು ಕಾಂಗ್ರೇಸ್ ಪರಡರೆ ಮೂಲ ಕಾರಣಕರ್ತೊರಾಯೆರ್ ಅತ್ತಂದೆ ಗಾಂಧಿನ ಸತ್ಯಾಗ್ರಹೊಲೆಡ್ ಪಾಲ್ ಪಡೆಯಿನ ಕರ್ನಾಟಕದ ಸುರುತ ಕಾರ್ಯಕರ್ತೆರೆಡ್ ಒರಿ ಆದಿತ್ತೆರ್. ಇಂಚ ಸ್ವಾತಂತ್ರ್ಯ ಪೊರುಂಬಾಟೊಗು ಜತ್ತಿನ ರಾವ್ ತನ್ನ ಪಣವುಲೆನ್ ಪೂರಾ ಬಡವೆರೆನ ಉದ್ದಾರೊಗು ಪೊಡಿ ಮಲ್ತೆರ್. 

1936ಟ್ಟ್ ನಡತಿನ ಫೈಜ್ಪುರ ಕಾಂಗ್ರೇಸ್ ಅಧಿವೇಶನೊಗು ಆರ್ ಪೋನಗ ಅರೆಡ ನಯ ಪೈಸೆಲಾ ಇತ್ತ್’ಜಿ. ಪುಟ್ಟುನಗ ಸುಖದ ಸುರ್ಪತ್ತಿಗೆಡ್ ಇತ್ತಿನ ರಾವ್ ಔಲು ತೋರುನ ಗುಡ್ಚಿಲ್ಡ್ ಕುಲ್ಲುನ ಪರಿಸ್ಥಿತಿ ಬತ್ತ್ಂಡ್. ಅಲ್ಪ ಅರೆಗ್ ಜ್ವರ ಪತ್ತ್ಂಡ್. ಆಂಡಲಾ ಆರ್ ಎರೆಗ್ಲಾ ಪನಂದೆ ಬೊಂಬಾಯಿಗ್ ಪೋಯೆರ್. 9 ಜನವರಿ 1937ಟ್ಟ್ ರಾವ್ ತೀರ್ ಪೋಯೆರ್. ಆರ್ ತೀರ್ ಪೋನಗ ಅರೆಡ ಅರೆನ ಪುನ ದೆಪ್ಪರೆ ಆಪಿನಾತ್’ಲಾ ಕಾಸ್ ಇತ್ತ್’ಜಿ. 

ಅರೆಗ್ ಬೋಡಾಯಿನಾತ್ ಸಂಪೊತ್ತು ಇತ್ತ್ಂಡ್. ದಾಲಾ ಬಂಗ ದಾಂತೆ ಬದುಕುದೊಲಿ ಆಂಡ ಆರ್ ಅವೆನ್ ಪೂರಾ ಈ ದೇಸೊದ ಉದ್ದಾರೊಗು ಗಲಸಿಯೆರ್ ಬಡವೆರೆರ್ದ್ ಬಡವೆ ಆದ್ ಬದಿಕಿಯೆರ್. ಇತ್ತೆದ ಕಾಲೊಡು ನನಲಾತ್ ಬರ್ಪಿನ ಕಾಸ್ ಬರಡ್ ಪನ್ಪಿನಕಲೆನ ನಡುಟು ಇಂಚಿನ ಅಧಮ್ಯ ಚೇತನೊಲು ನಮ್ಮ ಆದರ್ಶೊವಾದುಪ್ಪಡ್. ಸ್ವಾತಂತ್ರ್ಯದ ಅಮುರ್ತೋಚ್ಚಯದ ಈ ಗಲಿಗೆಡ್ ಮೆರೆನ್ ನೆನೆಪುಗ.