Last updated on December 5th, 2023 at 09:05 pm
ಇಂಚಿಪ್ಪೊದ ದಿನೊಟು ಭಾರತ ಬೊಕ್ಕ ಪಾಕಿಸ್ತಾನೊದ ನಡುಟು ಪೊದು ಎಚ್ಚ ಆತ್ಂಡ್. ಸೀಮಾ ಹೈದರ್‌ ಪನ್ಪಿನಾಲ್ ನೇಪಾಳೊಡೆ ಆದ್ ಬತ್ತ್‌ದ್ ಭಾರತೊದ ಸಚಿನ್ ಪನ್ಪಿನಾಯನ್ ಮದಿಮೆ ಆತಿನವು ಇಂಚಿಪ್ಪೊದ ಸುದ್ದಿ. ಇನಿ ಕುಡೊರ್ತಿ ಪಾಕಿಸ್ತಾನಿ ಪೊಂಜೊವು ಪಡ್ಡಾಯಿ ಬಂಗಾಳ ಮೂಲೊದ ಒರ್ಯನ್ ಮದುವೆ ಆಯೆರೆಗಾದ್ ಭಾರತೊಗು ಬೈದಲ್. ಪಾಕಿಸ್ತಾನೊದ ಕರಾಚಿ ನಿವಾಸಿ ಜವಾರಿಯಾ ಖಾನಮ್ ಅಮೃತಸರೊದ ಅಟ್ಟಾರಿ-ವಾಘಾ ಗಡಿ ಕಡತ್‌ದ್ ಭಾರತೊಗು ಬೈದಲ್. ಅಲ್ಪ ಆಲೆನ್ ಮದಿಮೆ ಆಪುನ ಆಣ್ ಸಮೀರ್ ಖಾನ್ ಬೊಕ್ಕ ಆಯನ ಇಲ್ಲದಕುಲು ಬಾರೀ ಗೌಜಿಡ್ ಎದುಕೊಂದೆರ್. ಇತ್ತೆ, ಜವೇರಿಯಾ ಖಾನ್‌ನ ಕುಟುಮದಕುಲು ಪಾಕಿಸ್ತಾನೊದ ಗುರುದಾಸ್‌ಪುರ ಪನ್ಪಿ ಊರ್‌ಡ್ ಉಲ್ಲೆರ್. ಅಕುಲ್ಲಾ ಭಾರತೊದ ಗಡಿ ಕಡತ್ ಬತ್ತಿನೇ, ರಡ್ಡ್ ಕುಟುಮೊದಕುಲ್ಲಾ ಕೋಲ್ಕತ್ತಾಗ್ ಪೋಪೆರ್. ಅಲ್ಪ ಇಸ್ಲಾಮಿಕ್ ಕಟ್ಟ್‌ದ ಪ್ರಕಾರ ಮೊಕಲ್ನ ಮದಿಮೆ ನಡಪರೆಗುಂಡು.
ಜವೇರಿಯಾ ಖಾನ್‌ಗ್ ಸುರುಟು ಭಾರತ ಸರ್ಕಾರ ವೀಸಾ ಕೊರ್ಯೆರ ಒತ್ತೊಂದಿಜ್ಜಂಡ್. ಬೊಕ್ಕ ಜವೇರಿಯಾ ಖಾನ್ ಈ ವಿಚಾರೊಡು ಪಂಜಾಬ್‌ ಮೂಲೊದ ಸಾಮಾಜಿಕ ಕಾರ್ಯಕರ್ತನ ಸಕಾಯೊಡು 45 ದಿನೊತ ವೀಸಾ ಗೆತೊಂದಲ್. ಮದಿಮೆದ ಮಾತಾ ಕಟ್ಟ್-ಕಟ್ಲೆಲು ಕರಿನನೇ, ಪೊಸ ಜೋಡಿಲು ವೀಸಾ ಎಕ್ಸ್‌ಟೆಂಡ್ ಮನ್ಪುನ ಅಂದಾಜಿಡ್ ಉಲ್ಲೆರ್ ಪಂದ್ ತೆರಿದ್‌ಬೈದ್ಂಡ್.