ಕುಡ್ಲ ವಿಮಾನ ಉಂತಡೆಗ್ ಕೋಟಿ ಚೆನ್ನಯ ಪುದರ್ ದೀಲೆ – ಶಾಸಕೆ ಸುನೀಲ್ ಕುಮಾರ್

Last updated on December 15th, 2023 at 10:38 am

ಕರ್ನಾಟಕದ ನಾಲ್ ವಿಮಾನ ಉಂತಡೆಲೆಗ್ ಬೇತೆ ಬೇತೆ ಪುದರ್ ದೀಪಿನ ಬಗೆಟ್ ಪ್ರಸ್ತಾವ ವಿಧಾನಮಂಡಲೊಡು ಆವೊಂದುಪ್ಪುನಗ ಕಾರ್ಲದ ಶಾಸಕೆರಾಯಿನ ಸುನೀಲ್ ಕುಮಾರ್ ಮೇರ್, ಕುಡ್ಲದ ವಿಮಾನ ಉಂತಡೆಗ್ ಕೋಟಿ ಚೆನ್ನಯೆರೆನ ಪುದರ್ ದೀವೊಡು ಪನ್ದ್ ಆಗ್ರಹ ಮಲ್ತೆರ್. ಉಂದೆಕ್ ಪಾತೆರಿನ ಸ್ಪೀಕರ್ ಖಾದರ್ ಮೇರ್ ಅವೆಕ್ ತುಳುನಾಡ್‌ದ ಶಾಸಕೆರ್ ಸೇರ್ದ್ ನಿರ್ಣಯ ದೆತೊನುಗ, ಕೋಟಿ ಚೆನ್ನಯ ದೀವೊಡಾ ಅತ್ತ್ ಅಬ್ಬಕ್ಕನ ಪುದರ್ ದೀವೊಡಾ ಪನ್ದ್ ಚರ್ಚೆ ಉಂಡು. ಕುಡ್ಲ ವಿಮಾನ ಉಂತಡೆನ್ ಖಾಸಗಿದಕಲೆಗ್ ಕೊರ್ದು ಕುಲ್ದರ್ ಪನ್ದ್ ಪನ್ಡೆರ್. ಈ ಬಗೆಟ್ ಇತ್ತೆ ಚರ್ಚೆ ಬೊಡ್ಚಿ ಪನ್ದ್ ಪನ್ಡೆರ್.

ವಿಧಾನ ಪರಿಷತ್‌ಡ್ಲಾ ಈ ಬಗೆಟ್ ಚರ್ಚೆ ನಡತ್ ಕುಡ್ಲ ವಿಮಾನ ಉಂತಡೆಗ್ ಕೋಟಿ ಚೆನ್ನಯ ಪುದರ್ ದೀಪಿಲೆಕ್ಕ ಕಾಂಗ್ರೇಸ್‌ದ ಬಿ.ಕೆ ಹರಿಪ್ರಸಾದ್ ಅಂಚೆನೆ ಬಿಜೆಪಿದ ಕೋಟ ಶ್ರೀನಿವಾಸ ಪೂಜಾರಿ ಆಗ್ರಹ ಮಲ್ತೆರ್. ಮಾತೆರ್ಡ ಪಾತೆರ್ದ್ ಚರ್ಚೆ ಮಲ್ಪುವ ಪನ್ದ್ ಸಚಿವೆ ಎಚ್.ಕೆ ಪಾಟೀಲ್ ಪನ್ಡೆರ್.