Last updated on January 1st, 2024 at 07:09 pm
ಒಡಿಪು: ಹಿಂದೂಲೆನ ಶ್ರದ್ಧಾ ಕೇಂದ್ರವಾದ್ 500 ವರ್ಸೊದ ಕನ ಕೋಡಿ ಎತ್ತುನ ದಿನ, ಮಾತಾ ಭಾರತೀಯೆರೆಗ್ ಬಾರೀ ಪವಿತ್ರ ದಿನವಾಯಿನ ಅಯೋಧ್ಯೆ ಶ್ರೀ ರಾಮ ಮಂದಿರೊದ ಲೋಕಾರ್ಪಣೆದ ಭಾವನಾತ್ಮಕ ಐತಿಹಾಸಿಕ ಪೊರ್ತುನು ಇಲ್ಲ‌ಇಲ್ಲಡ್ ಕರಿಪೆರೆ ಜನವರಿ 22 ಕ್ ಸಾರ್ವತ್ರಿಕ ರಜೆ ಘೋಷಣೆ ಮನ್ಪೊಡು ಪಂದ್ ಮುಖ್ಯಮಂತ್ರಿ ಶ್ರೀ ಸಿದ್ದರಾಮಯ್ಯೆರೆಗ್ ಒಡಿಪು ಶಾಸಕೆ ಶ್ರೀ ಯಶ್‌ಪಾಲ್ ಸುವರ್ಣೆರ್ ಅರಿಕೆ ಮಲ್ದೆರ್.
ಜನವರಿ 22 ಕ್ ಪ್ರಧಾನಿ ಶ್ರೀ ನರೇಂದ್ರ ಮೋದಿಯೆರೆ ಉಪಸ್ಥಿತಿಟ್ ಶ್ರೀ ರಾಮ ದೇವೆರೆ ಒರುಕು ಪ್ರಾಣ ಪ್ರತಿಷ್ಠೆ ಮನ್ಪುನ ಮುಕೇನ ಕೋಟಿಗಟ್ಲೆ ಭಕ್ತೆರೆನ ಮಸ್ತ್ ಶತಮಾನೊಲೆನ ಕನ, ಮಂದಿರೊದ ಲೋಕಾರ್ಪಣೆಗ್ ಜಗತ್ತ್ ಸಾಕ್ಷಿ ಆವರೆಗುಂಡು.
ಈ ವಿಶೇಷ ದಿನೊತಾನಿ ದೇಶೊಡೊರ್ಮೆ ಮಾತಾ ದೇವಲ್ಯೊಲೆಡ್, ಮಂದಿರ ಬೊಕ್ಕ ಸಂಘ ಸಂಸ್ಥೆಲೆಡ್ ವಿಶೇಷ ಪೂಜೆ, ಭಜನಾ ಸಂಕೀರ್ತನೆ, ಅನ್ನ ಸಂತರ್ಪಣೆದ ಮುಕೇನ ಬಾರೀ ಗರ್ದ್ ಗೌಜಿಡ್ ನಡಪೆರಗಿತ್ತ್‌ದ್, ಪ್ರಧಾನಿ ಶ್ರೀ ನರೇಂದ್ರ ಮೋದಿಯೆರ್ ದೇಶೊದ ಜನೊಕ್ಲೆಡ ಈ ಪವಿತ್ರ ದಿನೊನು ಇಲ್ಲ‌ಇಲ್ಲಡ್ ತುಡರ್ ಪರ್ಬಲೆಕ ತುಡರ್ ಅರ್ಲಾದ್ ಕರಿಪೆರ ಲೆಪ್ಪು ಕೊರ್ತೆರ್.
ರಾಜ್ಯ ಸರ್ಕಾರ ಜನವರಿ 22 ಕ್ ಸಾರ್ವತ್ರಿಕ ರಜೆ ಘೋಷಣೆ ಮಲ್ತ್‌ದ್ ಪವಿತ್ರ ದಿನೊನು ಕುಸಿಟ್ ಕರಿಪೆರ ರಾಜ್ಯೊದ ಜನಕ್ಲೆಗ್ ಅನುವು ಮಲ್ತ್ ಕೊರೊಡು ಪಂದ್ ಸುವರ್ಣೆರ್ ಅರಿಕೆ ಮಲ್ದೆರ್.