Last updated on April 1st, 2024 at 04:30 pm
ಕೋಟ: ಅನ್ನಭಾಗ್ಯೊದ ಅರಿನ್ ಅಕ್ರಮವಾದ್ ಗೆತೊಂದು ದೀದಿತ್ತಿನ ಶಿರಿಯಾರ ಗ್ರಾಮೊದ ದೇವ ರೈಸ್‌ ಇಂಡಸ್ಟ್ರೀಸ್‌ಗ್ ಆಹಾರ ಬೊಕ್ಕ ನಾಗರಿಕ ಪೂರೈಕೆ ಇಲಾಖೆದ ಸಿಬ್ಬಂದಿ ಬೊಕ್ಕ ತಹಶೀಲ್ದಾರೆರ್ ಐತಾರ ದಾಳಿ ಮಲ್ತ್‌ದ್ 540 ಕೆ.ಜಿ. ಅರಿನ್ ವಶೊಕು ಗೆತೊಂದೆರ್.
ಪತ್ತ ಒಲವು ಇತ್ತಿನ ಒಡಿಪು ಆಹಾರ ಉಪನಿರೀಕ್ಷಕೆರಾಯಿನ ಜಯಮಾಧವ ಬೊಕ್ಕ ಬ್ರಹ್ಮಾವರ ತಹಶೀಲ್ದಾರ್‌ ಶ್ರೀಕಾಂತ್‌ ಹೆಗ್ಡೆ, ಕೋಟ ಸ್ಟೇಶನ್ ಉಪನಿರೀಕ್ಷಕೆ ತೇಜಸ್ವಿ ಒಟ್ಟುಗು ದಾಳಿ ಮಲ್ದೆರ್. ಈ ಪೊರ್ತೂಡು ಆಹಾರ ನಿರೀಕ್ಷಕೆರಾಯಿನ ಶಿವರಾಜ್‌, ಸುರೇಶ್‌, ಲೀಲಾನಂದ ಬೊಕ್ಕ ಸಿಬ್ಬಂದಿಧಯಲು ಒಟ್ಟುಗಿತ್ತೆರ್. ಇಂಡಸ್ಟ್ರೀಸ್‌ದ ದನಿನ ಮಿತ್ತ್ ಪ್ರಕರಣ ದಾಕಲಾತ್ಂಡ್.
ಕೋಟ ಕಂದಾಯ ನಿರೀಕ್ಷಕೆರಾಯಿನ ಮಂಜುನಾಥೆ ಮೇರ್ ಮಿತ್ತ್‌ದ ಅಧಿಕಾರಿಲೆನ ಸೂಚನೆದಂಚ ರೈಸ್‌ ಇಂಡಸ್ಟ್ರೀಸ್‌ಗ್ ದಾಳಿ ಮಲ್ತ್‌ದೊ ಜಿಪಿಎಸ್‌ ಫೊಟೋ ದೆಪ್ಪುನಗ ಮುಟ್ಟದಾರಾಯಿನ ಪ್ರಭಾಕರ ಮೇರ್ ಮೊಬೈಲ್‌ ಫೋನ್‌ನ್ ಒಯ್ತೊಂದು ಇಲಾಖೆದ ಬೇಲೆಗ್ ಅಡ್ಡ ಬೈದೆರ್ ಪಂದ್ ಕೋಟ ಪೊಲೀಸ್‌ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.
ಪ್ರತಿದೂರು
ರೈಸ್‌ಮಿಲ್‌ ಎನ್ನ ಬಿನ್ನೆರೆನವು; ನಡಕೆದ ಬಗೆಟ್ ತೆರಿದ್ ಜಾಗೆಗ್ ಪೋದಿತ್ತಿನಾಯನ ಮಿತ್ತ್ ಅಧಿಕಾರಿಲೇ ಹಲ್ಲೆ ಮಲ್ತ್‌ದ್, ಕಲು ದೂರು ದಾಕಲ್ತ್‌ದೆರ್. ಈ ಬಗೆಟ್ ಯಾನ್ಲಾ ಪೊಲೀಸೆರೆಗ್ ಪ್ರತಿದೂರು ಕೊರ್ತೆ, ಕಾನೂನು ಪೊರ್ಮ್ಬಾಟ ಮಲ್ಪುವೆ ಪಂದ್ ಪ್ರಭಾಕರ ನಾಯಕ್‌ ಮೇರ್ ಮಾಧ್ಯಮೊಗು ತೆರಿಪಾದೆರ್.