Last updated on April 22nd, 2024 at 12:23 pm
ಮಲ್ಪೆ: ಮಲ್ಪೆ ಬೀಚ್‌ಗ್ ತಿರ್ಗೆರೆ ಬತ್ತಿತ್ತಿನ ಜವನೆ ಒರಿ ಕಡಲ್‌ಡ್ ಮುರ್ಕುದ್ ತೀರ್ದಿನ ನಡಕೆ ಎ. 21ತಾನಿ ಮಧ್ಯಾಹ್ನ ನಡತ್‌ದ್ಂಡ್.
ತೀರ್ದಿನ ಜವನನ್ ಮಂಡ್ಯ ಮೂಲೊದ ನಾಗೇಂದ್ರ ಪ್ರಸಾದ್‌ ಜಿ. ಆರ್‌. (21) ಪಂದ್ ಗುರ್ತಪತ್ತ್‌ದೆರ್. ಈ ಜವನೆ ವಿಧಾನಸೌಧೊಡು ಲಿಫ್ಟ್‌ ಅಪರೇಟರ್‌ ಆದಿತ್ತೆ ಪಂದ್ ತೆರಿದ್‌ಬೈದ್ಂಡ್.
ಒಟ್ಟು ಐವೆರ್ ಪಾಸಾಡಿಲು ಐತಾರ ಮಲ್ಪೆ ಬೀಚ್‌ಗ್ ಬತ್ತಿತ್ತ್‌ದ್, ಮೊಕುಲು ಕಡಲ್‌ ಜತ್ತ್‌ದ್ ಗೊಬ್ಬೊಂದುಪ್ಪುನಗ ನಾಗೇಂದ್ರೆ ಸಿರೆತ ಪೆಟ್ಟ್‌ಗ್ ತಿಕ್‌ದ್ ನೀರ್‌ಡ್ ಪೋತೆರ್. ಅಪಗನೆ ಬತ್ತಿನ ಯ ಮುರ್ಕು ತಜ್ಞೆ ಈಶ್ವರ ಮಲ್ಪೆರೆನ ಕೂಟ ಕಾರ್ಯಾಚರಣೆ ಮಲ್ತ್‌ದ್ ನಾಗೇಂದ್ರನ್ ಕಡಲ್‌ರ್ದ್ ಮಿತ್ತ್ ಪಾಡ್ದ್ ಮಣಿಪಾಲ ಆಸ್ಪತ್ರೆಗ್ ಲೆತೊಂದು ಪೋತೆರ್. ಆಂಡ ಬಾರೀ ಅಸ್ವಸ್ಥೆ ಆದಿತ್ತಿನ ಜವನೆ ಅರೆಸಾದಿಡೇ ಉಸುಲು ಬಿರ್ಕ್‌ದೆ. ಮಲ್ಪೆ ಪೊಲೀಸ್‌ ಸ್ಟೇಶನ್‌ಡ್ ಒಯಿಲ್ ದಾಕಲಾತ್ಂಡ್.