Last updated on May 2nd, 2024 at 10:21 am
ಪೇಂಟೆದ ಕೋಟೆಕಾರ್‌ದಲ್ಪದ ಇರ್ವೆರ್ ಕೂಡೊಂದು ಮಲ್ಲ ಮಟ್ಟ್‌ಡ್ ಅಕ್ರಮವಾದ್ MDMA ಪನ್ಪಿ ಮಾದಕ ಸೊತ್ತುನು ಕಾಲೇಜ್ ಜವನೆರೆಗ್ ಅಂಚೆನೇ ಸಾರ್ವಜನಿಕೆರೆಗ್ ಮಾರೊಂದಿತ್ತಿನಕ ಇರ್ವೆರ್ ಆರೋಪಿಲೆನ್ ಪೊಲೀಸೆರ್ ಕೈದ್ ಮಲ್ತಿತ್ತ್‌ದ್, ಮೊಕಲೆರ್ದ್ 9 ಲಕ್ಷ ರೂ. ಮೌಲ್ಯೊದ ಡ್ರಗ್ಸ್ ವಶ ಮಲ್ತೊಂದೆರ್.
ಕೈದಾತಿ ಆರೋಪಿಲೆನ್ ಉಳ್ಳಾಲ ಬಸ್ತಿಪಡ್ಪು ದರ್ಗಾ ರೋಡ್ ನಿವಾಸಿ ಮೊಹಮ್ಮದ್ ಇಶಾನ್ (35) ಬೊಕ್ಕ ಉಳ್ಳಾಲ ಟಿ.ಸಿ. ರೋಡ್ ಅಕ್ಕರೆಕೆರೆ ನಿವಾಸಿ ಜಾಫರ್ ಸಾಧಿಕ್ (35 ) ಪಂದ್ ಗುರ್ತ ಪತ್ತ್‌ದೆರ್.
ಬೆಂಗ್ಳೂರ್‌ರ್ದ್ ಸೊತ್ತುಲೆನ್ ಕನತ್‌ದ್ ಕುಡ್ಲಡ್ ಕಾಲೇಜ್‌ದ ಜವನೆರೆಗ್ ಅಂಚೆನೇ ಸಾರ್ವಜನಿಕೆರೆಗ್ ಮಾರ್ದ್ ಕಾಸ್ ಮನ್ಪೆರೆ ತೂವೊಂದಿತ್ತೆರ್.
ಆರೋಪಿತಲೆರ್ದ್ 9,00,000/- ರೂ ಮೌಲ್ಯೊದ 407 ಗ್ರಾಂ ನಿಷೇಧಿತ MDMA ಮಾದಕ ಸೊತ್ತು, ಡಿಜಿಟಲ್ ಸ್ಕೇಲ್, ಮೊಬೈಲ್ ಫೋನ್‌ಲು ಅಂಚೆನೇ ಈ ಬೇಲೆಗ್ ಗಲಸೆದಿನ ಕಾರ್‌ನ್ ವಶೊಕು ಗೆತೊಂದೆರ್.
ವಶ ಮಲ್ತೊಂದಿನ ಸೊತ್ತುಲೆನ ಒಟ್ಟು ಮೌಲ್ಯ16,13,800/- ರೂ. ಪಂದ್ ಅಂದಾಜಿ ಪಾಡ್ದೆರ್. ಆರೋಪಿಲೆಡ್ ಜಾಫರ್ ಸಾದಿಕ್ ಪನ್ಪಿನಾಯನ ಮಿತ್ತ್ ಕುಡ್ಲ ಪೇಂಟೆದ ಉಳ್ಳಾಲ ಪೊಲೀಸ್ ಸ್ಟೇಶನ್‌ಡ್ ಗಾಂಜಾ ಮಾರಾಟ, ಹಲ್ಲೆ ಬೊಕ್ಕ ಕೆರ್ಯೆರ ಪುನೆಯಿನ ಅಂಚೆನೇ ಕೊಡಗು ಜಿಲ್ಲೆದ ಕುಶಾಲ ನಗರ ಸ್ಟೇಶನ್‌ಡ್ ದಗೆ/ಕಲ್ವೆ ಪ್ರಕರಣೊಲು ಸೇರ್ದ್ ಒಟ್ಟು 9 ಪ್ರಕರಣೊಲು ದಾಕಲಾದುಲ್ಲ.
ಮೊಹಮ್ಮದ್ ಇಶಾನ್ ಪನ್ಪಿನಾಯನ ಮಿತ್ತ್ ಕುಡ್ಲ ಪೇಂಟೆದ ಕೊಣಾಜೆ ಪೊಲೀಸ್ ಸ್ಟೇಶನ್‌ಡ್ MDMA ಮಾರ್ದಿನ ಪ್ರಕರಣ ದಾಕಲಾದುಂಡು.
ಈ ಪತ್ತೆ ಕಾರ್ಯೊನು ಕುಡ್ಲ ಪೊಲೀಸ್ ಆಯುಕ್ತೆ ಅನುಪಮ್ ಅಗರ್ವಾಲ್ ಮೆರೆನ ಮಾರ್ಗದರ್ಶನೊಡು ಕಾನೂನು ಬೊಕ್ಕ ಸುವ್ಯವಸ್ಥೆದ ಡಿಸಿಪಿ ಸಿದ್ದಾರ್ಥ ಗೋಯಲ್ ಬೊಕ್ಕ ಅಪರಾಧ ಬೊಕ್ಕ ಸಂಚಾರ ವಿಭಾಗೊದ ಡಿಸಿಪಿ ದಿನೇಶ್ ಕುಮಾರ್ ಮೊಕಲೆನ ನಿರ್ದೇಶನದಂಚ ಕುಡ್ಲ ಸಿಸಿಬಿ ಘಟಕೊದ ಸಹಾಯಕ ಪೊಲೀಸ್ ಆಯುಕ್ತೆದಿಯಾಯಿನ ಗೀತಾ ಕುಲಕರ್ಣಿ ಮೆರೆನ ಮುತಾಲಿಕೆಡ್ ನಡತ್‌ದ್ಂಡ್.