Last updated on May 22nd, 2023 at 09:45 am
ಬಂಟ್ವಾಳ: ಮದಿಮೆದ ವಿಚಾರೊಡು ನಡತಿನ ಪೆಟ್ಟ್‌ಡ್ ಒರ್ಯನ ಕೈ ಕಡ್ತ್‌ದ್, ಕೊಲೆಗ ಮನ್ಪೆರ ಪುನೆತಿನ ನಡಕೆ ಬಂಟ್ವಾಳ ಕಸಬಾ ಗ್ರಾಮೊದ ತಿರ್ತ ಮಂಡಾಡಿಡ್ ನಡತ್‌ದ್ಂಡ್. ಆರೋಪಿ ಪಂದ್ ಪನ್ತಿನ ಸಂತೋಷ್, ಆಯನ ಪಾಸಾಡಿ ಶಿವರಾಜ್ ಕುಲಾಲ್ ಪನ್ಪಿನಾಯನ ಕೊಲೆ ಯತ್ನ ಮಲ್ತ್‌ದ್ ಪದ್ರಾಡಾತೆ.
ಶಿವರಾಜ್ ಕುಲಾಲ್ ಕುಡ್ಲದ ಮೆಸ್ಕಾಂ ಕಚೇರಿಡ್ ಕಂತ್ರಾಟ್ ಬೇಲೆ ಮಲ್ತೊಂದಿತ್ತ್‌ದ್, ಇಂಚಿಪ್ಪೊಗು ಕಂತ್ರಾಟ್ ಮುಗಿನೆರ್ದಾವರ ಇಲ್ಲಡೇ ಆಪ್ಪೆದೆರ್. ಮೇ 21 ಕ್ ರಾತ್ರೆ ಮೆರೆನ ಮೊಬೈಲ್‌ಗ್ ಪೊಸ ನಂಬರ್‌ದ ಕಾಲ್ ಬತ್ತಿತ್ತ್ಂಡ್. ಕಾಲ್ ಮಲ್ತಿನ ಜನ ತನ್ನ ಪುದರ್ ಸಂತೋಷ್ ಪಂದ್ ಪನೊಂದೆ. ಈ ಜನ ಶಿವರಾಜ್ ಕುಲಾಲೆರ್ನ ಗುರ್ತದ ಜನ ಆದಿತ್ತ್‌ದ್, ನಿನಡ ಪಾತೆರ್ಯೆರೆ ಉಂಡು, ಬಿ ಕಸಬಾ ಗ್ರಾಮೊದ ಅರಬ್ಬಿ ಗುಡ್ಡೆದ ಗಣೇಶ ಸ್ಟೋರ್ ಅಂಗಡಿಗ್ ಬಲ ಪಂದ್ ಪಂತೆ.
ಅಂಚೆನೇ ಶಿವರಾಜ್ ಕುಲಾಲ್ ಅಡೆ ಪೋದಿಪ್ಪುನಗ ಅಲ್ಪ ಸಂತೋಷ್, 5 ವರ್ಸ ದುಂಬುದ ತನ್ನ ಅಕ್ಕನ ಮದಿಮೆದ ವಿಚಾರೊಡು ಲಡಾಯಿಗ್ ಉಂತುದೆರ್. ಈ ಪೊರ್ತುಡು ರಡ್ಡ್ ಜನೊತ ನಡುಟ್ಲಾ ವಾದ ಆದ್ ಕಡೆಕ್ ಸಂತೋಷ್, ಶಿವರಾಜ್ ಕುಲಾಲ್ ಮಿತ್ತ್ ಹಲ್ಲೆ ಮಲ್ತ್‌ದೆ. ಎಲ್ಯ ತಲ್ವಾರ್‌ದ ಸುರುತ ಪೆಟ್ಟ್‌ನ್ ಎಂಚನಾ ತಪ್ಪಾವೊಂಡಿನ ಶಿವರಾಜ್ ರಡ್ಡನೇ ವಾರ್‌ಗ್ ದತ್ತ ಕೈ ಅಡ್ಡ ದೀತೆರ್. ಪೆಟ್ಟ್‌ದ ಬರಸ್‌ಗ್ ಕೈ ತುಂಡಾತ್ಂಡ್. ಈ ಬಗ್ಗೆ ಬಂಟ್ವಾಳ ನಗರ ಪೊಲೀಸ್ ಸ್ಟೇಷನ್‌ಡ್ ಪ್ರಕರಣ ದಾಖಲಾದ್, ಜಡ್ತೆ ನಡತೊಂದುಂಡು.