Last updated on August 3rd, 2023 at 08:23 pm
ಒಡಿಪು: ಅರ್ಬಿ ತೂವರೆ ಪೋದಿತ್ತಿನ ಜವನೆ ಕಾರ್ ಜಾರ್ದ್ ಬೂರ್ದ್ ಬೊಲ್ಲಗ್ ಪೋತಿನ ನಡಕೆ ಕೊಲ್ಲೂರ್ ಪೊಲೀಸ್ ಸ್ಟೇಶನ್ ಸೀಮೆದ ಅರಶಿನಗುಂಡಿ ಅರ್ಬಿಡ್ ನಡತ್‌ದ್ಂಡ್. ಜವನೆ ನೀರ್‌ಗ್ ಬೂರೊಂದುಪ್ಪುನ ದೃಶ್ಯ ಆಯನ ಪಾಸಾಡಿನ ಮೊಬೈಲ್ಡ್ ಕೈದಾತ್ಂಡ್. ಭದ್ರಾವತಿ ಮೂಲೊದ ಶರತ್ ಕುಮಾರ್ (23) ಬೊಲ್ಲಗ್ ಪೋತಿನ ಜವನೆ.
ಕೋಡೆ ಐತಾರ ಆಯಿನೆರ್ದಾವರ ಶರತ್ ಮದ್ಯಾನ ಕೊಲ್ಲೂರ್‌ಗ್ ತನ್ನ ಪಾಸಾಡಿ ಗುರುರಾಜ್‌ನೊಟ್ಟುಗು ಕಾರ್‌ಡ್ ಪೋದಿತ್ತೆರ್. ಬೊಕ್ಕ ಅಲ್ಪರ್ದ್ ಶರತ್ ಅರಶಿನಗುಂಡಿ ಅರ್ಬಿಗ್ ಪೋತೆರ್. ಈ ಪೊರ್ತುಡು ಬಂಡೆಕಲ್ಲ್‌ದ ಮಿತ್ತ್ ಉಂತುದ್ ಅರ್ಬಿಡ್ ನೀರ್ ಬೂರುನೆನ್ ತೂವೊಂದುಪ್ಪುನಗ ಈ ದುರಂತ ನಡತ್‌ಪೋತುಂಡು.
ಅಪಗನೇ ಶರತ್‌ನ ಪಾಸಾಡಿ ಗುರುರಾಜ್ ಮುಟ್ಟದ ಅರಣ್ಯ ಇಲಾಖೆ ಸಿಬ್ಬಂದಿಗ್ ಸುದ್ದಿ ಮುಟ್ಟಾದೆರ್. ಸುದ್ದಿ ತಿಕ್ಕಿನೇ ಸಿಬ್ಬಂದಿಲು ಪೊಲೀಸೆರೆಗ್ ಒಲವು ಕೊರ್ದು ಅಲ್ಪದಕ್ಲೆನ ಸಕಾಯೊಡು ಕಾರ್ಯಾಚರಣೆ ಮಲ್ತ್ಂಡಲಾ, ಶರತ್ ತಿಕ್ಕ್‌ದ್‌ಜೆರ್. ಅಗ್ನಿಶಾಮಕ ದಳ, ಅರಣ್ಯ ಇಲಾಖೆ ಸಿಬ್ಬಂದಿಲು, ಕೊಲ್ಲೂರು ಪೊಲೀಸೆರ್ ಇನಿ ಕಾಂಡೆರ್ದಿಂಚಿ ಕಾರ್ಯಾಚರಣೆ ಮಲ್ತೊಂದಿತ್ತ್‌ದ್, ಮೀಂದುನ ಎಕ್ಸ್‌ಪರ್ಟ್ ಈಶ್ವರ್ ಮಲ್ಪೆ ಬೊಕ್ಕ ಆರೆನ ಕೂಟೊಲಾ ಬೈದ್ಂಡ್.
ಶರತ್ ಸ್ವಂತ ಬೇಲೆ ಮಲ್ತೊಂದಿತ್ತ್‌ದ್, ಗುರುರಾಜ್ ಐಟಿ ಕಂಪೆನಿಯೊಂಜೆಟ್ ಬೇಲೆ ಮಲ್ತೊಂದಿತ್ತೆರ್. ಕರಿನ ಒಂತೆ ದಿನೊಟು ಬರ್ಸ ಜೋರಿತ್ತಿನೆರ್ದಾವರ ಅರಶಿನಗುಂಡಿ ಅರ್ಬಿಗ್ ಪ್ರವಾಸಿಗೆರೆಗ್ ನಿಷೇಧ ಪಾಡ್ದಿತ್ತೆರ್. ಅರಣ್ಯ ಇಲಾಖೆದ ಸಿಬ್ಬಂದಿಲು ಗೇಟ್‌ದಲ್ಪ ಇಜ್ಜಂದಿನೆನ್ ತೂದು ಇರ್ವೆರ್‌ಲಾ ಅರ್ಬಿದಡೆ ಪೋತೆರ್ ಪಂದ್ ತೆರಿದ್‌ಬೈದ್ಂಡ್.
ಗುರುರಾಜ್ ಅರ್ಬಿದ ದೃಶ್ಯೊಲೆನ್ ತನ್ನ ಮೊಬೈಲ್ಡ್ ರೆಕಾರ್ಡ್ ಮನ್ಪುನ ಪೊರ್ತುಡೇ ಶರತ್ ಕಾರ್ ಜಾರ್ದ್ ಬೂರ್ದಿನಲಾ ರೆಕಾರ್ಡ್ ಆತ್ಂಡ್. ಇತ್ತೆ ಈ ವಿಡಿಯೋ ಸಾಮಾಜಿಕ ಬಲೆತ್ತಾನೊಡು ವೈರಲ್ ಆತ್ಂಡ್.