ಲಡಾಖ್‌ಡ್ ಪೊಸತಾದ್ ನಾಲ್ ಭಾಷೆಲೆಗ್ ಅಧಿಕೃತ ಭಾಷೆದ ಮಾನಾದಿಗೆ; ಕರ್ನಾಟಕಡ್ ತುಳುಕು ಏಪ ತಿಕ್ಕು ಈ ಭಾಗ್ಯ..?

Last updated on June 9th, 2025 at 03:48 pm

ದೆಲ್ಲಿ: ಲಡಾಖ್‌ದ ಭಾಷಾ ಬೊಕ್ಕ ಸಾಂಸ್ಕೃತಿಕ ಪರಂಪರೆನ್ ಒರಿತೊನುನ ಐತಿಹಾಸಿಕ ಕ್ರಮೊಟು, ಭಾರತೊದ ರಾಷ್ಟ್ರಪತಿಕುಲು ಲಡಾಖ್ ಅಧಿಕೃತ ಭಾಷೆಲೆನ ನಿಯಮ-2025 ನ್ ಘೋಷಣೆ ಮಲ್ದೆರ್, ಉಂದು ಪುರ್ಗಿ, ಭೋಟಿ, ಉರ್ದು, ಹಿಂದಿ ಬೊಕ್ಕ ಇಂಗ್ಲಿಷ್ ಈ ಐನ್ ಭಾಷೆಲೆನ್ ಲಡಾಖ್ ಕೇಂದ್ರಾಡಳಿತ ಪ್ರದೇಶೊದ ಮಾತಾ ಅಧಿಕೃತ ಉದ್ದೇಶೊಲೆಡ್ ಗಲಸೊಲಿ ಪನ್ದ್ ಅಧಿಕೃತವಾದ್ ಗೊತ್ತು ಮಲ್ದ್ಂಡ್.

ಜೂನ್ 2, 2025 ತಾನಿ ಗೆಜೆಟ್ ಅಧಿಸೂಚನೆದ ಪ್ರಕಾರ, ಸಂವಿಧಾನೊದ 240 ನೇ ವಿಧಿಟ್ ಕೊರ್ತಿನ ಅಧಿಕಾರೊಲೆನ ಅಡಿಟ್ ಈ ನಿರ್ಧಾರ ಗೆತೊಂದುಂಡು ಅಂಚೆನೇ ಉಂದೆನ್ ಜಮ್ಮು & ಕಾಶ್ಮೀರ್ ರಿಆರ್ಗನೈಜೇಷನ್ ಆ್ಯಕ್ಟ್- 2019 ದ ಸೆಕ್ಷನ್ 58(2) ದ ಒಟ್ಟುಗು ಓದುದೆರ್.

ಲಡಾಖ್‌ದ ಮಾತಾ ಪ್ರಜೆಕುಲುಲಾ ಈ ನಿರ್ಧಾರೊನು ದಿಂಜಿ ಉಡಲ್‌ಡ್ ಎದುಕೊಂದೆರ್.

ಕೇಂದ್ರಾಡಳಿತ ಪ್ರದೇಶ ಆದ್ ಕಾಲಿ ಐನಾಜಿ ವರ್ಸೊಡೇ ಲಡಾಖ್ ಆ ರಾಜ್ಯೊದ ಅಧ್ಯಯನ, ಈ ರಾಜ್ಯೊದ ಅಧ್ಯಯನ, ಎಡ್ಡೆ-ಪಡ್ಕೆ(ಸಾಧಕ-ಬಾಧಕ), ಆ ಇಲಾಖೆ, ಈ ಇಲಾಖೆ ಪನ್ದ್ ಕರ್‌ನಾಟಕ ಡ್ ನಡತೊಂದುಪ್ಪುನ ನಾಟಕದ ಲೆಕ ಮಲ್ಪಂದೆ ಪ್ರಾದೇಶಿಕ ಭಾಷೆಲೆನ್ ಅಧಿಕೃತ ಪನ್ದ್ ಘೋಷಣೆ ಮಲ್ತ್‌ದ್, ಜನೊಕುಲೆಗ್ ಅಕ್ಲೆನ ಭಾಷೆಲೆಡೇ ಸೇವೆ ಕೊರ್ಪುನ ಕ್ರಮೊನು ಗೆತೊಂದುಂಡು.

ಕರ್‌ನಾಟಕಡ್ ನನಲಾ ಅಧ್ಯಯನ, ಇಲಾಖೆ ಪನೊಂದು ಸುಮಾರ್ 50 -60 ವರ್ಸೊರ್ದಿಂಚಿ ತುಳುವೆರೆನ್ ಮಂಗೆ ಮಲ್ಪುನ ಬೇಲೆ ಆವೊಂದುಂಡು ಅತ್ತಂದೆ ಅಧಿಕೃತ ಭಾಷೆ ಆಪುನ ತೋಜುಜಿ.

ಅಧಿಕೃತ ಭಾಷೆ ಘೋಷಣೆ ಮನ್ಪುನ ಬುಡುದು ಕರ್‌ನಾಟಕ ಸರಕಾರ, ಸ್ವತಂತ್ರ ಭಾಷೆ ತುಳುನು ಕನ್ನಡೊದ ಉಪಭಾಷೆ ಪನ್ದ್ ಸುಳ್ಳು ಪನ್ಪುನೆಟೇ ಎಚ್ಚ ಉಮೇದ್ ತೋಜಾವೊಂದುಂಡು ಪನ್ದ್ ಇಂಚಿಪ ನಡತಿನ ನಡಕೆಲೆರ್ದ್ ತುಳುವೆರ್ ಅರ್ಥ ಮಲ್ತೊಂದೆರ್.

ನಮ ನಮ್ಮ ಭಾಷೆಡೇ ಆಡಳಿತ ಸಂಬಂಧಿತಿನ ಸೇವೆಲೆನ್ ಗೆತೊನರೆ ಈ ರಾಜ್ಯೊಡು ನನ ಏತ್ ವರ್ಸ ಕಾಪೊಡಾ…?