Last updated on October 29th, 2023 at 03:29 pm
ಕೇರಳದ ಎರ್ನಾಕುಲಂ ಜಿಲ್ಲೆದ ಕಲಮಸ್ಸೆರಿದ ಸಮಾವೇಶ ಕೇಂದ್ರೊಡು ಮೂಜಿ ಕಡೆಟ್ ಸ್ಫೋಟ ಆತಿನ ವರದಿಯಾತ್ಂಡ್. ಈ ಬಾಂಬ್ ಸ್ಫೋಟೊಡು ಒರ್ತಿ ಪೊಂಜೊವು ತೀರ್ದ್, 20ರ್ದ್‌ಲಾ ಎಚ್ಚ ಜನೊಕು ಗಡಿಕುಲಾತ. ಉ್ಂದೊಂಜಿ ಭಯೋತ್ಪಾದಕ ಬೇಲೆ ಆದುಪ್ಪುನ ಡೌಟ್ ತೋಜಿದ್ ಬರೊಂದುಂಡು.
ಕೇರಳದ ಎರ್ನಾಕುಲಂ ಜಿಲ್ಲೆದ ಕಲಮಸ್ಸೆರಿಯ ಸಮಾವೇಶ ಕೇಂದ್ರೊಡು ಐನ್ ನಿಮಿಷೊಡು 3 ಬಾಂಬ್ ಪುಡದ್, ಒಟ್ಟುಗು ಒಂಜೆರ್ದ್ ಎಚ್ಚ ಪುಡದ್ಂಡ್ ಪಂದ್ ತೂಯಿನಕುಲು ಪಂಡೊಂದೆರ್. ಕಾಂಡೆ 9:30ತ ಅಂದಾಜಿಗ್ ಬಾಂಬ್ ಪುಡದಿತ್ತ್‌ದ್, ಐನ್ ಜನಕ್ ಬಾರೀ ಸೀರಿಯಸ್ ಆತ್ಂಡ್. ಪೆಟ್ಟಾತಿನಕುಲೆನ್ ಕಲಮಸ್ಸೆರಿ ಮೆಡಿಕಲ್‌ ಕಾಲೇಜಿಗ್ ಲೆತೊಂದು ಪೋತೆರ್.
ಕ್ರೈಸ್ತೆರೆನ ಯೆಹೋವನ ಸಾಕ್ಷಿ ಸಮಾವೇಶೊದ ಪೊರ್ತುಡು ಈ ಸ್ಫೋಟ ನಡತ್‌ದ್ಂಡ್. ಪ್ರತ್ಯಕ್ಷದರ್ಶಿಲೆನ ಪ್ರಕಾರ, ಸ್ಫೋಟ ಆನಗ ಸುಮಾರ್ 2,000 ಜನರ ಧಾರ್ಮಿಕ ಇನಯೊಡು ಇತ್ತೆರ್. ಅಗ್ನಿಶಾಮಕ ದಳೊದ ಸಿಬ್ಬಂದಿ ಬೊಕ್ಕ ಪೆರಿಯ ಪೊಲೀಸ್ ಅಧಿಕಾರಿಲು ಅಲ್ಪ ಉಲ್ಲೆರ್ಂದ್ ವರದಿಯಾತ್ಂಡ್.
ಕೇರಳಡ್ ನಡತಿನ ಕಾರ್ಯಕ್ರಮ ಒಂಜೆಟ್ ಹಮಾಸ್ ಉಗ್ರೆ ಪಾಲ್‌ಗೆತೊಂದಿನೆಕ್ ಸಂಬಂಧಿತ್‌ದ್ ನಡತೊಂದುಪ್ಪುನ ವಿವಾದೊಲೆನ ನಡುಟೇ ಈ ಸ್ಫೋಟ ನಡತ್‌ದ್ಂಡ್. ಹಮಾಸ್ ನಾಯಕೆ ಖಲೀದ್ ಮಶಾಲ್ ಸನಿಯಾರ ಉಗ್ರಗಾಮಿ ಸಂಘಟನೆಲೆನೊಟ್ಟು ಇಸ್ರೇಲ್‌ ದಾಳಿದ ವಿರುದ್ಧ ರಾಜ್ಯೊಡು ಇಸ್ಲಾಮಿಸ್ಟ್ ಕೂಪೆಲು ಅಟ್ಟನೆ ಮಲ್ದಿತ್ತಿನ ಪ್ರತಿಭಟನಾ ಕಾರ್ಯಕ್ರಮೊನು ಉದ್ದೇಶಿತ್‌ದ್ ಪಾತೆರ್ದಿತ್ತೆ. ಖಲೀದ್ ಮಶಾಲ್ ಹಮಾಸ್ ಪಾಲಿಟ್‌ಬ್ಯೂರೋದ ಸ್ಥಾಪಕ ಪದುಕೆ ಆದುಲ್ಲೆ ಅಂಚೆನೇ 2017 ಮುಟ್ಟ ಅವೆತ ಗುರ್ಕಾರೆಲಾ ಆದಿತ್ತೆ.
ಪೆಟ್ಟಾತಿನಕುಲೆಗ್ ಸಮ ಮರ್ದ್ ಮಲ್ಪುಲೆ ಪಂದ್ ಆರೋಗ್ಯ ಇಲಾಖೆ ನಿರ್ದೇಶಕೆರ್ ಬೊಕ್ಕ ವೈದ್ಯಕೀಯ ಶಿಕ್ಷಣ ಇಲಾಖೆ ನಿರ್ದೇಶಕೆರೆಗ್ ಆರೋಗ್ಯ ಸಚಿವೆ ವೀಣಾ ಜಾರ್ಜ್ ತೆರಿಪಾದೆರ್. ಮಾತಾ ಆಸ್ಪತ್ರೆಲೆಗ್ಲಾ ಎಚ್ಚರ್ಗೆ ಕೊರ್ದು, ರಜೆಟುಪ್ಪುನ ಬೈದ್ಯೆರು ಸೇರ್ದ್ ಮಾತಾ ಆರೋಗ್ಯ ಕಾರ್ಯಕರ್ತೆರೆನ್ ಇತ್ತೆನೇ ಪಿರ ಬರ್ಯೆರ ಸಚಿವೆರ್ ಸೂಚನೆ ಕೊರ್ತೆರ್.