Last updated on January 11th, 2024 at 10:15 am
ಕುಡ್ಲ: ಮಾಲ್ದೀವ್ಸ್‌ ದ್ವೀಪ ಕುಡ್ಲ ಭಾಗೊದ ಎಚ್ಚಿನಕ್ಲೆನ ಹನಿಮೂನ್‌ ಸ್ಪಾಟ್‌ ಪಂದೇ ಪುದರ್‌ಪೋತಿನವು. ಆಂಡ ಒಂತೆ ಪಿರಿಯ. ಅಂಚಾದೇ ಅವೆಕ್ ಪರ್ಯಾಯ ಆದುಪ್ಪುನ ಲಕ್ಷದ್ವೀಪೊಗು ಕುಡ್ಲರ್ದ್ ಪೋಪುನ ಯೋಜನೆಗ್ ಕುಡ ಚಾಲನೆ ತಿಕ್ಕ್‌ದ್ಂಡ್.
ಕೆಲ ವರ್ಸೊಲೆಗ್ ದುಂಬು ಕುಡ್ಲರ್ದ್ ಲಕ್ಷದ್ವೀಪೊಗು ಪ್ರವಾಸಿ ಪಡವು ಪೋವೊಂದಿತ್ತ್ಂಡ್. ಆಂಡ ಇತ್ತೆ ಉಂತುದು ಪೋತುಂಡು. ಈ ಪಡವು ಸೇವೆ ಕುಡ ಸುರು ಆವೊಡಾತ್ಂಡ್. ಅವೆಕ್ ಬೋಡಾದ್ ಜಿಲ್ಲಾಡಳಿತ ಬೇಲೆ ಸುರು ಮಲ್ದ್ಂಡ್. ಈ ಬಗೆಟ್ ಕೆಲ ಜನೊಕ್ಲೆನ ಇನಯ ಲೆತ್ತ್‌ದ್ ಚರ್ಚೆ ಮಲ್ತ್‌ದ್ ತೀರ್ಮಾನ ಗೆತೊನ್ರ ದುಂಬು ಬೈದ್ಂಡ್.
ಇತ್ತೆ ಮಾಲ್ದೀವ್ಸ್‌‌ದ ಒಟ್ಟುಗು ಭಾರತೊದ ಸಂಬಂಧ ಒಂತೆ ಕುಮೆದಿನೆರ್ದಾವರ ಅವೆರ್ದ್‌ಲಾ ಕಮ್ಮಿ ಕರ್ಚಿಡ್ ಲಕ್ಷ ದ್ವೀಪೊಗು ಅಂಚೆನೇ ಅಂಡಮಾನ್‌ ಕುದುರುಲೆಖ್ ಪ್ರವಾಸ ಸಂಪರ್ಕ ಮನ್ಪಾವೊಡು. ಅಂಚೆನೇ ಬೋಡಾಪಿನ ಮೂಲ ಸೌಕರ್ಯೊಲೆನ್ ಕೊರ್ನ್ಡ ಎಡ್ಡೆ ಪನ್ಪಿನ ಕುಡ್ಲದ ಟ್ರಾವೆಲ್‌ ಏಜೆನ್ಸಿದಕಲೆನ ಅಭಿಪ್ರಾಯ.
ಮಾಲ್ದೀವ್ಸ್‌‌ಗ್ ಕುಡ್ಲರ್ದ್ ಎಚ್ಚಾದ್ ಪೊಸ ಜೋಡಿಲು ಪೋವೊಂದಿತ್ತೆರ್. ಆಂಡ ಅವ್ವು ಬಾರಿ ಪಿರಿಯ; ಹೊಟೇಲ್‌‌ದ ಚಾರ್ಜೇ 1 ರ್ದ್ 2 ಲಕ್ಷ ರೂ., ಪರ್ಪುನ ನೀರ್ ಲೀ.ಗ್ 300 ರೂ. ಕೊರೊಡು ಪಂದ್ ಪ್ರವಾಸ ಪೋಪುನಕ್ಲೆನ ಪಾತೆರ.
ಲಕ್ಷದ್ವೀಪೊಲಾ ಮಾಲ್ದೀವ್ಸ್‌ದಿತೇ ಪೊರ್ಲು ಉಂಡು. ಈತ್ತೆ ಪ್ರಧಾನಿಯೆರ್ ಅಡೆ ಭೇಟಿ ಕೊರ್ತಿನೆರ್ದಾವರ ನನಲಾತ್ ಪುದರ್ ಪೋತುಂಡು. ಒಂತೆ ಫೋನ್‌ ಕಾಲ್‌ಲಾ ಬರ್ಯೆರ ಪತ್ತ್‌ದ್, ದುಂಬಗ್ ಲಕ್ಷದ್ವೀಪೊಗು ಪ್ರವಾಸಿಗೆರ್ ಎಚ್ಚ ಆಪೆರ್ ಪಂದ್ ಕುಡ್ಲದ ವಿಕ್ರಮ್‌ ಟ್ರಾವೆಲ್ಸ್‌ದ MD ಶಿವಾನಂದ್‌ ಪನ್ಪೆರ್.
ಸದ್ಯೊಗು ಕುಡ್ಲರ್ದ್ ಲಕ್ಷದ್ವೀಪೊಗು ಪೋಯೆರೆ ಕ್ರೂಸ್‌ ಶಿಪ್ ಅತ್ತ್ಂಡ ವಿಮಾನ ಮಾತ್ರ ಅಜಕೆಡ್ ಇಪ್ಪುನವು. ರಡ್ಡೆಕ್ಲಾ ಪ್ರವಾಸಿಗೆರ್ ಕೊಚ್ಚಿಗ್ ಪೋವೊಡು. ಲಕ್ಷದ್ವೀಪೊಗು ಪೋಯೆರೆ ಬೋರ್ಡಿಂಗ್‌ ಪಾಸ್‌ನ್ಲಾ ಕೊಚ್ಚಿಡ್ ಉಪ್ಪುನ ಕಚೇರಿಡೇ ಗೆತೊನೊಡಾಪುಂಡು.
ಕುಡ್ಲಡ್ ಲಕ್ಷದ್ವೀಪ ಪ್ರವಾಸ ಸುರು ಮನ್ಪೆರ ಬೋಡಾಯಿನಾತ್ ಅವಕಾಶೊಲು ಉಲ್ಲ. (ಅಂಚೆನೇ ತುಳುನಾಡ ಬೀಚ್‌ಲೆನ ಬುಲೆಚ್ಚಿಲ್‌ಗ್ಲಾ ಆತೇ ಅವಕಾಶ ಉಂಡು ಪನ್ಪಿನ ಸುಳ್ಳತ್ತ್.) ಸುರುಟು ನವಮಂಗಳೂರು ಬಂದರ್‌ಗ್ ಕ್ರೂಸ್‌ ಪಡವುಲು ಬರ್ಪಿಲೆಕ ಮನ್ಪೊಡು. ಇತ್ತೆ ಮುಂಬಯಿರ್ದ್ ಪಿದಡುನ ಲಕ್ಷದ್ವೀಪೊದ ಕ್ರೂಸ್‌ ಪಡವುಲು ಗೋವಾಗ್ ಬರ್ಪ. ಅವು ಕುಡ್ಲಗ್ ಬರೊಡು. ಮುಲ್ಪ ಪ್ರವಾಸಿಗೆರೆಗ್ ಕ್ರೂಸ್‌ ಲಾಂಜ್‌ ವ್ಯವಸ್ಥೆ ಇತ್ತ್‌ದ್, ಗಲಸೊನೊಲಿ.
ಜಿಲ್ಲಾಧಿಕಾರಿ ದಾದ ಪನ್ಪೆರ್
ಆಜಿ ಏಲ್ ವರ್ಸೊಗು ದುಂಬೇ ಲಕ್ಷದ್ವೀಪೊಗು ಪಂದೇ ಬೇತೆನೇ ಜೆಟ್ಟಿನ್(Jetty) 65 ಕೋಟಿ ರೂ. ಕರ್ಚಿಡ್ ಕುಡ್ಲದ ಪರ ಬಂದರ್‌ಡ್ ಕಟ್ಟಿವುನ ಯೋಜನೆ ಇತ್ತ್ಂಡ್. 300 ಮೀಟರ್‌ ಉದ್ದೊದ ಜೆಟ್ಟಿ ಕಟ್ಟಾವುನು, ಗೋಡಾನ್ ಅಂಚೆನೇ ಪ್ರಯಾಣಿಕೆರೆಗಾದ್ ಎಡ್ಡೆ ಉಂತಡೆಲೆನ್ ಕಟ್ಟಾವುನ ಆ ಯೋಜನೆನ್ ಬೇಗೊಡೇ ಸಿಆರ್‌ಝಡ್‌ ಬೊಕ್ಕ ಬೇತೆ ಡಿಪಾರ್ಟ್ಮೆಂಟ್‌ಲೆನ ಅನುವು ಗೆತೊಂದು ಜಾರಿಮನ್ಪೊಡು. ಆಂಡ ಕೆಲ ಒಲವುದ ಪ್ರಕಾರ ನೆಕ್ಕ್ ದುಂಬೇ ಬಂದರ್‌ಡ್ ತನ್ಕುಲೆ ಕಚೇರಿ ಬೊಕ್ಕ ಬೇತೆ ಸೌಲಭ್ಯೊಲೆನ್ ಕೊರ್ಯೆರ ಲಕ್ಷದ್ವೀಪೊದ ಆಳ್ಮೆಗ್ ಅನುವು ಕೊರ್ದಿತ್ತ್ಂಡ್. ಬಂದರ್ ಇಲಾಖೆಲಾ ನೆಕ್ಕ್ ಒಪ್ಯುನ ಜಾಗೆ ಕೊರ್ರಲಾ ಒತ್ತೊಂದಿತ್ತ್ಂಡ್. ಆಂಡಲಾ ಯೋಜನೆ ಜಾರಿಯಾದಿಜ್ಜಂಡ್.
ಸದ್ಯ ಲಕ್ಷದ್ವೀಪರ್ದ್ ಜನ ಕುಡ್ಲಗ್ ಬತ್ತ್‌ದ್ ತನ್ಕುಲೆಗ್ ಬೋಡಾಪಿ ಸಾಮಾನ್‌ಲೆನ್ ಕೊನೊವೊಂದುಲ್ಲೆರ್. ಆಂಡ ಮುಲ್ಪದ ಜನೊಕ್ಲೆಗ್ ಪೋಪಿನ ವ್ಯವಸ್ಥೆ ಆವೊಡು, ಬೋರ್ಡಿಂಗ್‌ ಪಾಸ್‌ ಮುಲ್ಪನೇ ತಿಕ್ಕುಲೆಕ ಆವೊಡು ಪನ್ಪಿನ ಪ್ರವಾಸಿಗೆರೆ ಆಗ್ರಹ. ಕೊಚ್ಚಿರ್ದ್ ಲಕ್ಷದ್ವೀಪೊಗು ದೂರ ಜಾಸ್ತಿ (391 ಕಿ.ಮೀ.), ಕುಡ್ಲರ್ದ್ ಪೋಪುಂಡ ಕಮ್ಮಿ (356 ಕಿ.ಮೀ.). ಉ್ಂದುಲಾ ಕುಡ್ಲಗ್ ಇಪ್ಪುನ ಕುಡೊಂಜಿ ಅನುಕೂಲ.
ಕುಡ್ಲರ್ದ್ ದುಂಬು ವಿ ರೀತಿ ಲಕ್ಷದ್ವೀಪೊಗು ಪ್ರವಾಸಿ ಪಡವು ಪೋವೊಂದಿತ್ತ್ಂಡ್ ಪನ್ಪಿನೆನ್ ತೆರಿಯೊಂದು ಕುಡ ಸುರು ಮನ್ಪುಲೆಕ ಸಂಸದೆರ್ ಸೂಚನೆ ಕೊರ್ತೆರ್. ಆ ಬಗೆಟ್ ಒಲವು ಇತ್ತಿನಕ್ಲೆನ ಇನಯ ಲೆತ್ತ್‌ದ್ ತೀರ್ಮಾನ ಗೆತೊನುವ ಪಂದ್ ಜಿಲ್ಲಾಧಿಕಾರಿಲು ಪಂಡೆರ್.