Last updated on February 1st, 2024 at 11:23 am
ಕುಡ್ಲರ್ದ್ ಮೀನ್ ಪತ್ತರೆ ಪಿದಡ್‌ದಿತ್ತಿನ ಬೋಟುನು ತಡೆತ್ ಕಡಲಾಯೆರೆಡ ಪೆಟ್ಟ್ ಮಲ್ತ್ ಲಕ್ಷಾಂತರ ರೂಪಾಯಿ ಬಿಲೆತ ಮೀನ್ ಬೊಕ್ಕ ಕಡಲಾಯೆರೆಡ ಇತ್ತಿನ ಮೊಬೈಲ್ ಒಟ್ಟುಗು ಸೊತ್ತುಲೆನ್ ಲೂಟಿನ ನಡಕೆ ಕಾಪು ಲೈಟ್ ಹೌಸ್ ಕೈತಲ್ ಅಂಗಾರೆ ನಡದ್ಂಡ್.
ಆಂಧ್ರಪ್ರದೇಶದ ಕಡಲಾಯೆರಾಯಿನ ಪರ್ವತಯ್ಯೆ, ಕೊಂಡಯ್ಯೆ, ರಘುರಾಮಯ್ಯೆ, ಶಿವರಾಜ್, ಶೀನು, ಏಳ್‌ಮಲೆ, ಚಿನ್ನೋಡು, ರಾಜು ಮೊಕುಲು ಜ.27ಕ್ಕ್ ಮಹಮ್ಮದ್ ಮುಸ್ತಫಾ ಭಾಷಾಗ್ ಸೇರ್ದಿನ ಮಿರಾಶ್-2 ಟ್ರೋಲ್ ಬೋಟುಡು ಕುಡ್ಲ ಬಂದರ್‌ರ್ದ್ ಮೀನ್ ಬೋಂಟೆಗ್ ಪೋದು, ಮೀನ್ ಪತೊಂದು ಪಿರ ಬನ್ನಗ, ಜನವರಿ 30ಗು ಕಾಂಡೆ 5 ಗಂಟೆಗ್ ಕಾಪು ಲೈಟ್‌ಹೌಸ್‌ರ್ದ್ 10 ನಾಟಿಕಲ್ ಮೈಲ್ ದೂರೊಡು ಕಡಲ್ದ ನಡುಟು ಪೆಟ್ಟ್ ಮಲ್ತ್ ಮೀನ್ ಲೂಟಿನ ತೆರಿದ್ ಬೈದ್ಂಡ್.
ಹನುಮಜ್ಯೋತಿ ಪುದರ್‌ದ ಪರ್ಸಿನ್ ಬೋಟುಡಿತ್ತಿನ ಜನಕುಲೆಡ್ 7-8 ಜನ ಟ್ರಾಲ್ ಬೋಟುದ ಉಲಯಿ ಬತ್ತ್ ಬೋಟುಡಿತ್ತಿನ ಮೀನ್ ಲೂಟುದು, ಅಪಗ ಅಕಲೆನ್ ತಡೆಪರೆ ಪೋಯಿನ ಶೀನು ಬೊಕ್ಕ ರಘುರಾಮಯ್ಯಗ್ ಪರ್ಸಿನ್ ಬೋಟುದ ಕೈತಲ್ ಬತ್ತಿನ 5-6 ಜನ ಇತ್ತಿನ ನಾಡಓಡೊಗು ದೆರ್ತ್ ಪಾಡೊಂದು ಪೋದು ಪೆಟ್ಟ್ ಪಾಡ್ದೆರ್. ಬೊಕ್ಕ ಅಕಲೆನ್ ಪಿರ ಕನತ್‌ದ್ ಪರ್ಸಿನ್ ಬೋಟುಗು ಬುಡ್ದೆರ್. ಕಡಲಾಯೆರೆನ 4 ಮೊಬೈಲ್ ಬೊಕ್ಕ 2 ಲಕ್ಷ ಮೌಲ್ಯದ 12 ಬಾಕ್ಸ್ ಮೀನ್ ಸುಲಿದ್ ಕೊನೊಯೆರ್ ಪನ್ದ್ ತೆರಿದ್ ಬೈದ್ಂಡ್. ಈ ಬಗೆಟ್ ಕಾಪು ಪೋಲೀಸ್ ಸ್ಟೇಷನ್‌ಡ್ ಒಯಿಲ್ ಆದ್ ಪ್ರಕರಣದ ಜಡ್ತೆ ಆವೊಂದುಂಡು.